လီဗာပူးဂန္ထဝင် ဂျေမီကာရေဂါကတော့ မန်စီးတီးအသင်း အဲဗာတန်နဲ့ပွဲမှာ အမှားအယွင်းဖြစ်ခဲ့တာကြောင့် လူတိုင်း စိတ်ပျက်နေကြလိမ့်မယ်လို့ သူယုံကြည်ကြောင်း ထုတ်ဖော်ပြောဆိုလိုက်ပါတယ်။

မန်စီးတီးဟာ တနင်္လာနေ့ညက Hill Dickinson အားကစားကွင်းမှာ အဲဗာတန်နဲ့ ၃ ဂိုးစီ သရေကျခဲ့တာကြောင့် ပရီးမီးယားလိဂ်ဖလားကို အရယူနိုင်ဖို့ ကြိုးပမ်းမှုမှာ အကြီးအကျယ် ထိုးနှက်ချက်ဖြစ်သွားခဲ့ပါတယ်။

အာဆင်နယ်အနေနဲ့ သူတို့ရဲ့ ကျန်ရှိနေတဲ့ နောက်ဆုံးပွဲစဉ် ၃ ပွဲစလုံးကို အနိုင်ရမယ်ဆိုရင် ၂၀၀၄ ခုနှစ်နောက်ပိုင်း ပထမဆုံးအကြိမ် လိဂ်ဖလားကို ရယူနိုင်တော့မှာ ဖြစ်ပါတယ်။ မန်စီးတီးကတော့ အာဆင်နယ်အသင်း ကျန်တဲ့ပွဲတွေမှာ အမှားအယွင်းရှိဖို့ပဲ ဆုတောင်းနေရတဲ့ အခြေအနေပါ။

တခြားပွဲစဉ်ရလဒ်တွေအပေါ် မူတည်ပြီး အာဆင်နယ်ဟာ လာမယ့် မေလ ၁၃ ရက် ဗုဒ္ဓဟူးနေ့မှာတင် ချန်ပီယံဖြစ်သွားနိုင်ခြေရှိတာကြောင့် မန်စီးတီးအတွက် အမှားအယွင်းမရှိဖို့ ဖိအားတွေ ပိုများလာစေပါတယ်။

ပွဲအပြီးမှာတော့ ကာရေဂါက အခုရလဒ်ဟာ စိတ်လှုပ်ရှားစရာကောင်းတဲ့ ချန်ပီယံလုပွဲကို အဟန့်အတားဖြစ်သွားစေတယ်လို့ ဝန်ခံပြောကြားခဲ့ပါတယ်။

"ဒီပွဲကရတဲ့ တစ်မှတ်က ရာသီအကုန်မှာ ဘယ်လောက်အရေးပါမလဲဆိုတာ ကျွန်တော်တို့ မသိနိုင်သေးပါဘူး။ ဒါပေမဲ့ လူတိုင်းနီးပါး စိတ်ပျက်နေကြတဲ့ အနေအထားမျိုး ခံစားရတယ်" လို့ Sky Sports မှာ ကာရေဂါက ပြောပါတယ်။

"ကျွန်တော့်အမြင်မှာတော့ မန်စီးတီး စိတ်ပျက်မှာ သေချာပါတယ်။ ဘာလို့လဲဆိုတော့ သူတို့က ၁ ဂိုး ဂိုးမရှိနဲ့ အသာရနေချိန်မှာ ပေါ့ပေါ့ပါးပါးရှိနေခဲ့လို့ပါ။ အိမ်မှာကြည့်နေတဲ့ အာဆင်နယ်ကစားသမားတွေ၊ ပရိသတ်တွေနဲ့ နည်းပြကတော့ သူတို့ရဲ့အဓိကပြိုင်ဘက် အမှတ်လျော့သွားတာတောင်မှ (မန်စီးတီးက ရှုံးမသွားဘဲ သရေပဲဖြစ်ခဲ့တာကြောင့်) တကယ်ကို စိတ်မကောင်းဖြစ်နေကြမှာပါ" လို့ သူက ဆိုပါတယ်။

"တကယ်တော့ မန်စီးတီး ရှုံးသွားသင့်တဲ့ပွဲပါ။ ဒါပေမဲ့ တကယ့်ကို မယုံနိုင်စရာကောင်းတဲ့ ပွဲတစ်ပွဲပါပဲ"

မန်စီးတီးဟာ ဘရန်ဖို့ဒ်၊ ပဲလေ့စ်နဲ့ ရာသီပိတ်ပွဲစဉ်အဖြစ် အက်စတွန်ဗီလာတို့နဲ့ အိမ်ကွင်းပွဲစဉ် ၃ ပွဲ ကစားဖို့ ကျန်ပါသေးတယ်။ နည်းပြ ဂွာဒီယိုလာအနေနဲ့လည်း အာဆင်နယ်ကို ကျော်ဖြတ်ပြီး အခွင့်အရေးရဖို့ဆိုရင် သူ့အသင်းဟာ အမှားအယွင်းမရှိ ပြောင်မြောက်တဲ့ ခြေစွမ်းပြဖို့ လိုအပ်နေတာကို သိရှိထားပါတယ်။