ရီးရဲလ်မက်ဒရစ်လူငယ်ကြယ်ပွင့်ဂွန်ဇာလိုဂါစီယာကို ခေါ်ယူဖို့ စိတ်ဝင်စားနေတဲ့ ဒေါ့မွန်
ရီးရဲလ်မက်ဒရစ်တိုက်စစ်မှူးဂွန်ဇာလိုဂါစီယာကို ခေါ်ယူဖို့အတွက် ကလပ်အသင်းအတော်များများက အပြိုင်အဆိုင် စောင့်ကြည့်နေကြပါတယ်။
ရီးရဲလ်မက်ဒရစ်အသင်းက ဒီလူငယ်ဗဟိုတိုက်စစ်မှူးကို လာမယ့်နွေရာသီအပြောင်းအရွှေ့ဈေးကွက်မှာ ရောင်းချဖို့ ပြင်ဆင်နေပြီး၊ သူ့ကိုရောင်းချခြင်းမှ ယူရိုသန်း ၆၀ အထိ ရရှိဖို့ မျှော်လင့်နေပါတယ်။
အပြောင်းအရွှေ့ကျွမ်းကျင်သူနီကိုလိုရှီရာရဲ့အဆိုအရ "ဒီနွေရာသီမှာ ရီးရဲလ်မက်ဒရစ်မှထွက်ခွာခွင့်ရနိုင်တဲ့ ဂွန်ဇာလိုဂါစီယာကိုခေါ်ယူဖို့ ဒေါ့မွန်အသင်း စိတ်ဝင်စားမှုတွေ ပြသနေတယ်" လို့ သိရပါတယ်။
၎င်းက ဆက်လက်ပြီး "ဂျူဗင်တပ်စ်အသင်းကလည်း ဒီစပိန်တိုက်စစ်မှူးအတွက် အခြေအနေတွေကို စုံစမ်းမေးမြန်းထားပြီး စောင့်ကြည့်နေသလို၊ ရိုးမားနဲ့ ပရီးမီးယားလိဂ်ကလပ်အချို့ကလည်း သူ့ကိုခေါ်ယူနိုင်မယ့် အခွင့်အလမ်းကို စောင့်မျှော်နေကြပါတယ်" လို့လည်း ဆိုပါတယ်။
လက်ရှိမှာတော့ ဒီတိုက်စစ်မှူးနဲ့ ရီးရဲလ်မက်ဒရစ်အသင်းတို့ရဲ့စာချုပ်သက်တမ်းက ၂၀၃၀ ပြည့်နှစ်အထိ ရှိနေပါတယ်။
