ချဲလ်ဆီးအသင်းဟာ ယာယီနည်းပြ ကလမ်မက်ဖာလိန်းနဲ့ပဲ ဒီရာသီကုန်အထိ ဆက်သွားဖို့ ပြင်ဆင်နေပါတယ်။ ဘရိုက်တန်နဲ့ပွဲမှာ အရှက်တကွဲ ရှုံးနိမ့်ခဲ့ပြီးနောက် ဗုဒ္ဓဟူးနေ့မှာတော့ ချဲလ်ဆီးအသင်းဟာ နည်းပြ လီယမ်ရိုဆင်နီယာကို ရာထူးကနေ ထုတ်ပယ်ခဲ့ပါတယ်။ ဒီရလဒ်ကြောင့် ချဲလ်ဆီးအသင်းဟာ ဒီရာသီမှာ ချန်ပီယံလိဂ်ဝင်ခွင့်ရဖို့အတွက် ရုန်းကန်နေရတဲ့ အခြေအနေကို ရောက်သွားခဲ့ပါတယ်။

စတန်းဖို့ဒ်ဘရစ်ချ်မှာ ရိုဆင်နီယာရဲ့ နည်းပြသက်တမ်းဟာ သုံးလလောက်ပဲ ကြာမြင့်ခဲ့ပြီး အခုတော့ သူ့နေရာမှာ မက်ဖာလိန်းနဲ့ အစားထိုးလိုက်ပြီ ဖြစ်ပါတယ်။ နွေရာသီကျမှ အမြဲတမ်းနည်းပြသစ်တစ်ဦးကို ခန့်အပ်ဖို့ မစီစဉ်ခင်အထိ ချဲလ်ဆီးအသင်းဟာ မက်ဖာလန်းနဲ့ပဲ ဒီရာသီကို အဆုံးသတ်သွားဖို့ ဆန္ဒရှိနေတယ်လို့ The Mirror သတင်းစာက ဖော်ပြထားပါတယ်။

ချဲလ်ဆီးဒါရိုက်တာတွေဟာ ရိုဆင်နီယာက ဝန်ထမ်းတွေ၊ ဘုတ်အဖွဲ့ဝင်တွေနဲ့ ဆက်ဆံရေးကောင်းမွန်တာကြောင့် သူ့ကို ရာထူးကထုတ်ဖို့ တွန့်ဆုတ်နေခဲ့ကြတာပါ။ ဒါပေမဲ့ ဘရိုက်တန်နဲ့ပွဲက ခြေစွမ်းနဲ့ ရိုဆင်နီယာရဲ့ တုံ့ပြန်မှုတွေကြောင့် သူတို့မှာ အခုလို ဆုံးဖြတ်ချက်ချဖို့ ဖိအားဖြစ်လာခဲ့တာပါ။ သတင်းရင်းမြစ်တွေရဲ့ အဆိုအရ နှစ်ဦးနှစ်ဖက် လမ်းခွဲမှုဟာ ပြေလည်မှုရှိခဲ့ပြီး ဗုဒ္ဓဟူးနေ့ ညနေပိုင်းမှာ တရားဝင်မထုတ်ပြန်ခင်ကတည်းက ရိုဆင်နီယာနဲ့ သူ့ရဲ့အဖွဲ့သားတွေကို ဒီဆုံးဖြတ်ချက်အကြောင်း ကြိုတင် အသိပေးခဲ့တယ်လို့ သိရပါတယ်။