အီဂျစ်ဘောလုံးလောကရဲ့ဂန္ထဝင်ကစားသမားမိုဟာမက်အဘူထရီကာက အခုနွေရာသီ၊ မာဆေးဆိုဒ်ကလပ်အသင်းမှ မိုဆာလက်ထွက်ခွာဖို့စီစဉ်ရခြင်းရဲ့နောက်ကွယ်မှာ လီဗာပူးနည်းပြအန်းစလော့ဟာ အဓိကအကြောင်းရင်းဖြစ်တယ်လို့ အခိုင်အမာပြောကြားလိုက်ပါတယ်။

မိုဆာလက်က လီဗာပူးမှာ ကိုးနှစ်ကြာကစားခဲ့ပြီးနောက် အခုဘောလုံးရာသီကုန်ဆုံးချိန်၊ အသင်းမှထွက်ခွာတော့မယ်လို့ ပြီးခဲ့တဲ့မတ်လကုန်ပိုင်းမှာ ကြေညာခဲ့ပါတယ်။

လက်ရှိစာချုပ်သက်တမ်း ၁၈ လကျော် ကျန်ရှိနေသေးပေမဲ့လည်း မိုဆာလက်က အသင်းမှ အလွတ်ပြောင်းရွှေ့ကြေးဖြင့် ထွက်ခွာသွားပါလိမ့်မယ်။

Bein Sport အစီအစဉ်မှာ အဘူထရီကာက "လီဗာပူးမှ မိုဆာလက်ထွက်ခွာရတဲ့ အကြောင်းရင်းတွေအနက် တစ်ခုကတော့ အန်းစလော့ရှိနေတာကြောင့်ပါပဲ။ ဘာလို့လဲဆိုတော့ မကြာသေးခင်ကပဲ သူတို့ကြားမှာ ပြဿနာအချို့ ရှိနေတယ်ဆိုတာကို ကျွန်တော်တို့ တွေ့ရှိခဲ့ရလို့ ဖြစ်ပါတယ်" လို့ ပြောပါတယ်။

ဒါ့အပြင် "စလော့၊ ခင်ဗျားပဲ သူ့ကို အသင်းကနေ တွန်းထုတ်ခဲ့တာပါ။ မိုဆာလက်မှာ လီဗာပူးနဲ့ (၂) နှစ်စာချုပ်ပဲ ကျန်ပါတော့တယ်..."

"မိုဆာလက်က စိတ်အေးလက်အေးနဲ့ အလုပ်လုပ်ချင်ပြီး သူ့ကစားသမားဘဝရဲ့ နောက်ထပ်အခန်းကဏ္ဍတွေကို ပျော်ပျော်ရွှင်ရွှင် ဖြတ်သန်းချင်တာပါ။ သူ့အတွက် အန်းစလော့ဆီမှဖြစ်စေ၊ တခြားသူဆီမှဖြစ်စေ အသိအမှတ်ပြုမှုတွေကို ရယူနေဖို့ မလိုပါဘူး" လို့လည်း ဆိုပါတယ်။

ဆက်လက်ပြီး အဘူထရီကာက "ကျွန်တော် သူနဲ့ စကားပြောခဲ့ပြီး ဘယ်ကလပ်အသင်းဆီ သွားသင့်တယ်ဆိုတာကိုလည်း အကြံပေးခဲ့ပါတယ်။ ကျွန်တော်နဲ့ မိုဆာလက်ကြားမှာ ဆက်ဆံရေးက ညီအစ်ကိုတွေလို၊ သူငယ်ချင်းတွေလို ရင်းနှီးတဲ့ ဆက်ဆံရေးမျိုးပါ" လို့ ထပ်လောင်းပြောကြားခဲ့ပါတယ်။

"ဘုရားသခင်ရဲ့အလိုတော်အရ မိုဆာလက်ကို ကျွန်တော် သဘောကျပါတယ်။ ကျွန်တော့်ရဲ့ အလုပ်အတွက် သူ့ကို အသုံးမချပါဘူး။ သူနောက်ထပ်သွားမယ့် အသင်းနဲ့ ပတ်သက်ပြီး ကျွန်တော့်ရဲ့အမြင်ကိုတော့ ပြောပြထားပါတယ်။ တကယ်တော့ မိုဆာလက်က တစ်ဦးဦးရဲ့လမ်းညွှန်မှု ဒါမှမဟုတ် အကြံပေးမှုတွေကို လိုအပ်နေတဲ့သူ မဟုတ်ပါဘူး" လို့ ပြောဆိုသွားခဲ့ပါတယ်။