အင်တာမီလန်အသင်းရဲ့ ကွင်းလယ်လူ ဟာကန် ချာဟာနိုဂလူးက လက်ရှိနည်းပြ ခရစ္စတီယန် ချီဗူနဲ့ အရင်နည်းပြဟောင်း ဆီမြွန်နီ အင်ဇာဂီတို့အကြား မတူညီတဲ့ အချက်တွေရှိတယ်လို့ ဝန်ခံပြောကြားလိုက်ပါတယ်။

ချီဗူဟာ ပြီးခဲ့တဲ့ရာသီက ပါးမားအသင်းကို ခဏတာ တာဝန်ယူခဲ့တာကလွဲလို့ စီနီယာအသင်းကို ကိုင်တွယ်ဖူးတဲ့ အတွေ့အကြုံ မရှိသလောက် နည်းပါးပေမဲ့ အင်တာမီလန်အသင်းကို ပထမဆုံးအကြိမ်မှာတင် စီးရီးအေ ချန်ပီယံဆု (Scudetto) ရရှိနိုင်မယ့် အခြေအနေကောင်းတစ်ခုဆီ ပို့ဆောင်ပေးထားနိုင်သူ ဖြစ်ပါတယ်။

ချာဟာနိုဂလူးက KAFA Sports ကို ပြောကြားရာမှာတော့ "သူက အရင်ကတည်းက လူငယ်အသင်း (Primavera) ကို ကိုင်တွယ်နေတာပါ။ တစ်ခါတလေ ကျွန်တော်တို့က သူ့အသင်းနဲ့ လေ့ကျင့်ရေးပွဲစဉ်တွေ ကစားဖြစ်ကြပါတယ်။ သူ ကျွန်တော်တို့နဲ့ စပြီး အလုပ်လုပ်တဲ့အခါမှာ အသင်းက သူ့ကို အရမ်းမြန်မြန်ဆန်ဆန်ပဲ လက်ခံခဲ့ကြပါတယ်" လို့ ဆိုပါတယ်။

"သူကိုယ်တိုင်လည်း အင်တာမီလန်မှာ ကစားခဲ့ဖူးသူဆိုတော့ ဒါဟာ ငြင်းစရာမလိုတဲ့ အားသာချက်တစ်ခုပါပဲ။ သူက လူငယ်ကစားသမားတွေအပါအဝင် လူတိုင်းကို အခွင့်အရေး ပေးပါတယ်။ အင်ဇာဂီနဲ့တော့ မတူဘူးပေါ့၊ သူတို့နှစ်ယောက်မှာ မတူညီတဲ့ ဘောလုံးအတွေးအခေါ်ကိုယ်စီ ရှိကြပါတယ်" လို့ ၎င်းက ပြောခဲ့ပါတယ်။

အေစီမီလန်ကနေ ပြောင်းရွှေ့ခဲ့တဲ့ အငြင်းပွားဖွယ်ရာ အပြောင်းအရွှေ့နဲ့ ပတ်သက်ပြီး တူရကီလက်ရွေးစင်ကစားသမားက "ကျွန်တော်တို့ မီလန်ဘက်က စာချုပ်သစ် ကမ်းလှမ်းလာမယ့်အချိန်ကို နောက်ဆုံးမိနစ်အထိ စောင့်ခဲ့ပေမဲ့ ဘာမှဖြစ်မလာခဲ့ပါဘူး။ အဲ့ဒီနောက်မှာတော့ ကျွန်တော့်အေးဂျင့်က ရောက်လာပြီး ဘာစီလိုနာက ကမ်းလှမ်းထားသလို ဂျူဗင်တပ်စ်ကလည်း စိတ်ဝင်စားနေတယ်လို့ ပြောခဲ့ပါတယ်။ ဒါပေမဲ့ နောက်ဆုံးအချိန်မှာတော့ အင်တာမီလန်က ရောက်လာခဲ့တာပါ။ အင်ဇာဂီက ကျွန်တော့်ကို တကယ်ခေါ်ချင်လို့ ဖုန်းတွေ ထပ်ခါတလဲလဲ ဆက်ခဲ့တာပါ" လို့ ပြန်ပြောင်း ပြောပြခဲ့ပါတယ်။