ဒေါ့မွန်နောက်ခံလူရှလော့တာဘတ်ချ်က ဝုဖ်ဘတ်ကိုအနိုင်ရရှိခဲ့တဲ့ပွဲစဉ်အပြီး သူတို့အသင်းရဲ့ ချန်ပီယံဆု မျှော်လင့်ချက်တွေကို ထပ်မံအတည်ပြုပြောကြားလိုက်ပါတယ်။

ဗောက်စ်ဝက်ဂွန်ကွင်းပွဲစဉ်အတွင်း ဒေါ့မွန်က ဂူရက်စီရဲ့နောက်ကျသွင်းဂိုးနဲ့အတူ ဝုဖ်ဘတ်ကို စိတ်လှုပ်ရှားဖွယ် ၂-၁ ဂိုးဆိုတဲရလဒ်ဖြင့် အနိုင်ရရှိခဲ့ပါတယ်။

အခုနိုင်ပွဲကြောင့် ဒေါ့မွန်က အမှတ်ပေးဇယားထိပ်ဆုံးနေရာရှိ ဘိုင်ယန်မြူးနစ်နဲ့ရမှတ်ကွာဟမှုကို ၃ မှတ်အထိ ယာယီလျှော့ချနိုင်ခဲ့ပါတယ်။

ပွဲစဉ်အပြီး Sky သတင်းဌာနနဲ့တွေ့ဆုံချိန် ရှလော့တာဘတ်ချ်က "ကျွန်တော်တို့အသင်းမှာ နှစ်ပေါင်းများစွာ ပျောက်ဆုံးနေတဲ့အရာဆိုပြီး လူတွေကိုယ်တိုင်ပြောခဲ့ကြတဲ့ စိတ်ဓါတ်ပိုင်းကို အခုသက်သေပြနိုင်ခဲ့ပါပြီ" လို့ ပြောကြားခဲ့ပါတယ်။

သူက ပထမပိုင်းမှာ ကောင်းကောင်းကစားနိုင်ခဲ့ပေမယ့် ဒုတိယပိုင်းမှာတော့ ခြေစွမ်းအနည်းငယ်ကျဆင်းခဲ့တယ်လို့ ဝန်ခံခဲ့ပါတယ်။ ဒါပေမဲ့လည်း အသင်းမှာ ပွဲရလဒ်ကို အဆုံးအဖြတ်ပေးနိုင်တဲ့ တစ်ဦးချင်းအရည်အသွေးရှိသူတွေ ပိုင်ဆိုင်ထားတယ်လို့ ဆိုပါတယ်။

"အန်မီချာရဲ့ အားပါတဲ့ပြေးလွှားမှု၊ ဖေဘီယိုဆေးလ်ဗားရဲ့ပေးပို့မှုနဲ့အတူ ဂူရက်စီကိုယ်တိုင် အဆုံးသတ်နိုင်ခဲ့တယ်ဆိုတာကို တွေ့ရပါမယ်။ ဂူရက်စီက တိုက်စစ်မှူးတစ်ဦးရှိနေသင့်တဲ့နေရာမှာ အတိအကျရှိနေခဲ့တာပါ" လို့ သူက ချီးကျူးစကား ဆိုခဲ့ပါတယ်။

ဒုတိယပိုင်းမှာ ချေပဂိုးပေးလိုက်ရပြီးနောက် ဝုဖ်ဘတ်ရဲ့ အပြင်းအထန်ဖိအားပေးမှုကို ဒေါ့မွန်တို့ ရင်ဆိုင်ခဲ့ရပါတယ်။ အထူးသဖြင့် မိုဟာမက်အာမိုရာမှာ ဂိုးရရှိဖို့ အခွင့်အရေးအများအပြားရရှိခဲ့ပေမယ့် ကံမကောင်းစွာနဲ့ဘဲ လွဲချော်နေခဲ့ပါတယ်။

"ဒါက ဘောလုံးပွဲတွေမှာ ဖြစ်တတ်ပါတယ်။ အထူးသဖြင့် နိုင်ပွဲက အရေးကြီးနေတဲ့အချိန်မျိုးမှာပေါ့။ သူတို့က ဖိအားတွေ တိုးလာခဲ့ပေမယ့် ကံကောင်းထောက်မစွာနဲ့ ကျွန်တော်တို့ တစ်ဂိုးပဲ ပေးခဲ့ရပါတယ်" လို့ ရှလော့တာဘတ်ချ်က ဖွင့်ဟခဲ့ပါတယ်။

အမှတ်ပေးဇယားအောက်ခြေမှာရုန်းကန်နေရတဲ့ပြိုင်ဘက်ကို ခက်ခက်ခဲခဲအနိုင်ယူခဲ့ရပေမယ့် ဒေါ့မွန်ရဲ့ အလားအလာအပေါ် ရှလော့တာဘတ်ချ် ယုံကြည်မှုအပြည့် ရှိနေပါတယ်။ "အဓိကကတော့ ကျွန်တော်တို့ အာရုံစိုက်ထားဖို့နဲ့ ဇယားထိပ်ကို တက်လှမ်းနိုင်မယ်လို့ ယုံကြည်ထားဖို့ပါပဲ"လို့ သူကဆိုပါတယ်။

ဒါ့အပြင် သူက "ကျွန်တော့်ရဲ့ စိတ်အားထက်သန်မှုက အသင်းအတွက် အထောက်အကူဖြစ်စေမယ်လို့ မျှော်လင့်ပါတယ်။ ဒီနိုင်ပွဲက ကျွန်တော့်အတွက် ဘယ်လောက်အရေးပါတယ်ဆိုတာ အသင်းဖော်တွေလည်း မြင်တွေ့ခဲ့ပါတယ်" လို့လည်း ဖြည့်စွက်ပြောကြားခဲ့ပါတယ်။

အမ်မရီချန်ဒဏ်ရာရနေချိန် အသင်းကပ္ပတိန်လက်ပတ်ကို တာဝန်ယူထားရမှုအပေါ် ရှလော့တာဘတ်ချ် ကျေနပ်နေပါတယ်။ "အမ်မရီမရှိတဲ့အချိန် ကျွန်တော်က အသင်းခေါင်းဆောင်ပါ။ ဒါက အသင်းသားတွေကို ဦးဆောင်လမ်းပြပေးရမယ်လို့ အဓိပ္ပာယ်ရပါတယ်" လို့ အသက် ၂၆ နှစ်အရွယ် နောက်ခံလူက ရှင်းပြပါတယ်။

ဒါပေမဲ့ သူဟာ ဒီပွဲမှာ လက်ထိဘောကြောင့် အခုရာသီအတွက် ငါးကြိမ်မြောက်အဝါကတ်ပြသခံခဲ့ရလို့ လာမယ့်သောကြာညပိုင်း၊ မိန့်ဇ်နဲ့ရင်ဆိုင်ရမယ့်ပွဲစဉ်ကို လွဲချော်သွားရပါလိမ့်မယ်။ "တကယ်ကို နာကျင်ရပါတယ်" လို့ သူက ဝမ်းနည်းစွာနဲ့ဝန်ခံခဲ့ပါတယ်။