ပိုကယ်လ်ဖလားကွာတားဖိုင်နယ်ပွဲစဉ်မှာ လက်ရှိချန်ပီယံစတုဂတ်အသင်းကို အိမ်ကွင်းမှာ ၀-၃ ဂိုးဖြင့်ရှုံးနိမ့်ပြီး ပြိုင်ပွဲမှထွက်ခွာခဲ့လာမှုအပေါ် ဟိုစတိန်းကီရယ်လ်နည်းပြမာဆယ်ရပ်ပ်က သုံးသပ်ပြောကြားလာပါတယ်။

အသင်းသမိုင်းတစ်လျှောက် တတိယအကြိမ်မြောက်အဖြစ် ဆီမီးဖိုင်နယ်အဆင့်ကို တက်လှမ်းနိုင်ဖို့ မျှော်လင့်ခဲ့တဲ့ ဒုတိယတန်းကလပ်ဟိုစတိန်းကီရယ်လ်က ပွဲကစားချိန် မိနစ် ၉၀ အထိ စတုဂတ်အသင်းကို အကောင်းဆုံး ယှဉ်ကစားနိုင်ခဲ့ပါတယ်။

ဒါပေမဲ့လည်း ပွဲပြီးခါနီးနောက်ဆုံးမိနစ်တွေမှာ ပေးလိုက်ရတဲ့ဂိုးတွေကြောင့် ဂိုးပြတ်ရှုံးနိမ့်မှုနဲ့အတူ ပြိုင်ပွဲမှစိတ်ပျက်ဖွယ်ထွက်ခွာလာရပါတယ်။

နည်းပြ မာဆယ်ရပ်ပ်က "ကျွန်တော်တို့ ပွဲကို အကောင်းဆုံး စတင်နိုင်ခဲ့သလို ဂိုးရနိုင်မယ့် အခွင့်အရေးကောင်း နှစ်ကြိမ်လည်း ရခဲ့ပါတယ်။ ကျွန်တော့်အမြင်အရ ခံစစ်ပိုင်းက ကောင်းကောင်းကာကွယ်နိုင်ခဲ့ပေမဲ့ တန်ပြန်တိုက်စစ်စတင်နိုင်မယ့်အခွင့်အရေးတွေတော့ လိုအပ်နေခဲ့ပါတယ်"လို့ ပြောကြားခဲ့ပါတယ်။

ဟိုစတိန်းကီရယ်လ်က အစောပိုင်းအဆင့်တွေမှာ ဘွန်ဒက်စ်လီဂါကလပ်တွေဖြစ်တဲ့ ဝုဖ်ဘတ်နဲ့ ဟမ်းဘတ်တို့ကို အဝေးကွင်းတွေမှာ အနိုင်ယူပြီး အခုအဆင့်အထိ တက်လှမ်းလာခဲ့တာပါ။ အခု စတုဂတ်နဲ့ပွဲကတော့ ဒီရာသီ၊ ပိုကယ်လ်ဖလားပြိုင်ပွဲအတွင်း သူတို့ရဲ့ ပထမဆုံးသောအိမ်ကွင်းပွဲစဉ်လည်း ဖြစ်ပါတယ်။

"ပွဲပြီးခါနီးမှာတော့ ချေပဂိုးရဖို့အတွက် အစွမ်းကုန်တိုက်စစ်ဆင်ခဲ့ပြီး အခွင့်အရေးလည်း ရခဲ့ပါတယ်။ ဒါပေမဲ့ အဲဒီအချိန်မှာ ပေါ်ထွက်လာတဲ့ နေရာလွတ်တွေကို စတုဂတ်အသင်းက အကောင်းဆုံးအသုံးချသွားခဲ့တာပါ။ ရလဒ်ပိုင်းအရ ကြည့်မယ်ဆိုရင်တော့ ကျွန်တော်တို့ ဒီနေ့ပွဲမှာ ခြေစွမ်းမပြနိုင်ခဲ့ဘဲ တိုက်စစ်ပိုင်း အားနည်းချက်တွေကြောင့် ရှုံးနိမ့်သွားခဲ့ပါတယ်" လို့ မာဆယ်ရပ်ပ်က ဆက်လက်ဖွင့်ဟခဲ့ပါတယ်။

လက်ရှိ ကွာတားဖိုင်နယ်အဆင့်မှာတော့ ဟာသာဘာလင်တစ်ခုတည်းသာ ဒုတိယတန်းကလပ်အဖြစ် ကျန်ရှိပါတော့တယ်။

ဟာသာဘာလင်က လာမယ့်အင်္ဂါနေ့မှာ ပုံစံကောင်းရနေတဲ့ ဖရိုင်းဘတ်အသင်းကို အိမ်ကွင်းမှာ ဧည့်ခံကစားရဖို့ရှိနေပြီး ဗုဒ္ဓဟူးနေ့မှာတော့ ပွဲကြီးပွဲကောင်းအဖြစ် ဘိုင်ယန်မြူးနစ်နဲ့ လိုက်ပ်ဇစ်တို့ ထိပ်တိုက်ရင်ဆိုင်သွားပါလိမ့်မယ်။