ဘာစီလိုနာကွင်းလယ်လူ ဇာဗီက အင်တာဗျူတစ်ခုမှာ သူ့အနေနဲ့ အသင်းဟောင်း ဘာစီလိုနာရဲ့ပွဲတွေကို ကြည့်ရတာ ကြိုက်နှစ်သက်ဆဲလို့ ဝန်ခံပြောကြားလိုက်ပါတယ်။ ဒါ့အပြင်
 ဇာဗီက သူ့ကြည့်ရတာ ကြိုက်နှစ်သက်တဲ့ကစားသမားကိုလည်း ထုတ်ဖော်ပြောကြားခဲ့ပါတယ်။ “ဘယ်ကစားသမားကို ကြည့်ရတာ  ပိုအကြိုက်ဆုံးလဲ?။ အဲ့တာကတော့ လီယိုပါ။ ဘာစီလိုနာအနိုင်ရတာကို ကြည့်ရတာက ကြိုက်ပါတယ်။ ကမ္ဘာပေါ်က ဘောလုံးသမားတော်တော်များများကို ကျွန်တော်ကြိုက်ပါတယ်။

ဒါပေမယ့် ကျွန်တော့်အတွက်တော့ လီယိုက နံပတ် ၁ ဖြစ်နေဆဲပါ”လို့ ဇာဗီက ပြောကြားခဲ့ပါတယ်။ ဘာစီလိုနာက အခုပြိုင်ပွဲမှာ ပါဝင်မှာမဟုတ်ပဲ မက်ဆီရဲ့အင်တာမိုင်ယာမီက ပယ်လ်မားရီးယက်စ် ၊ ပေါ်တို ၊ အယ်-အက်လီအသင်းတွေနဲ့ တစ်အုပ်စုတည်းကျရောက်နေပါတယ်။ အင်တာဗျူးမှာ ဇာဗီက ဂွါဒီယိုလာရဲ့ဘာစီလိုနာ နဲ့ စပိန်အသင်းကြား ခြားနားမှုကို “ခြားနားမှုက မက်ဆီပါ။ ကျွန်တော်တို့နိုင်ငံအသင်းမှာ လီယိုမရှိပါဘူး။ သူ့လိုအားထားရမယ့်သူမျိုးမရှိခဲ့ပါဘူး။

အသင်းက သူ့အပေါ်အများကြီးမီခိုခဲ့တာပါ။ ဒါပေမယ့် ကျွန်တော်တို့ အောင်မြင်ခဲ့ပါတယ်။ ဥရောပချန်ပီယံ ၊ ကမ္ဘာ့ဖလား နဲ့ ယူရိုချန်ပီယံဖြစ်ခဲ့ပါတယ်။ ဘာစီလိုနာမှာတုန်းက အရမ်းကောင်းတဲ့မျိုးဆက်တစ်ခုရှိခဲ့ပါတယ်။ အဲ့မျိုးဆက်နဲ့အတူ အရာအားလုံးရယူနိုင်ခဲ့ပါတယ်”လို့ ဇာဗီက ပြောကြားခဲ့ပါတယ်။

ဇာဗီက ကလပ်ကမ္ဘာ့ဖလားဟာ ကမ္ဘာပေါ်က အသင်းတိုင်းပါဝင်မှာဖြစ်တာကြောင့် လူတော်တော်များများစောင့်ကြည့်ကြလိမ့်မယ်လို့ ယုံကြည်နေပါတယ်။
“ဒီပြိုင်ပွဲက အလှည့်အပြောင်းတစ်ခုဖြစ်နိုင်ပါတယ်။ အဲ့တာက ကမ္ဘာပေါ်ကအသင်းတိုင်းပါဝင်မှာဖြစ်တာကြောင့် ပရိသတ်တွေ စောင့်ကြည့်နေကြမှာ သေချာပါတယ်”လို့ ဇာဗီက ထပ်လောင်းပြောကြားခဲ့ပါတယ်။