ဟယ်ရီကိန်း ဟာ ဘိုင်ယန်မြူးနစ်နဲ့ အင်္ဂလန် အတွက် ကစားတဲ့အခါ အလွန်အေးတဲ့ ရာသီဥတုတွေမှာတောင် ဘာကြောင့် အင်္ကျီလက်ရှည်နဲ့ လက်အိတ်တွေ မဝတ်ရသလဲဆိုတာကို ရှင်းပြခဲ့ပါတယ်။ ခေတ်သစ်ဘောလုံးမှာ ကစားသမားတွေဟာ ရာသီဥတုဒဏ်ကို ကာကွယ်ဖို့အတွက် အဝတ်အစားတွေ ဝတ်ဆင်လာတာဟာ ပိုပြီးတော့ အဖြစ်များလာပါတယ်။ အများစုကတော့ လေထုအပူချိန် အသင့်အတင့် နွေးနေချိန်မှာတောင် အင်္ကျီအောက်ခံတွေကို ဝတ်ဆင်လေ့ရှိကြပါတယ်။

တချို့ကတော့ အင်္ကျီလက်တို ဝတ်ထားပေမဲ့ လက်တွေကို နွေးအောင် ထားချင်ကြတယ်။ snoods လို့ခေါ်တဲ့ လည်ပင်းစည်းတွေကလည်း ခဏတာ ခေတ်စားခဲ့ပေမဲ့ နောက်ပိုင်းမှာတော့ ပိတ်ပင်ခံခဲ့ရပါတယ်။ ကိန်းကတော့ သူ့ရဲ့ စံချိန်တင် ကစားသမားဘဝတစ်လျှောက်မှာ အဲဒီလို အဝတ်အစားတွေကို ရှောင်ရှားခဲ့ပါတယ်။

သူ့ရဲ့ နည်းလမ်းက အလွန်ရိုးရာဆန်တယ်လို့ ယူဆနိုင်ပါတယ်။ ဂိုးသွင်းနိုင်စွမ်းအပေါ် အခြေခံတဲ့ နံပါတ် ၉ ကစားသမား တစ်ဦးဖြစ်ပြီး အသက် ၃၂ နှစ်အရွယ် တိုက်စစ်မှူးဟာ သူ့ရဲ့ အလေ့အကျင့်တွေကို ပြောင်းလဲဖို့ အစီအစဉ် မရှိသေးပါဘူး။ ကိန်းက သူ့ရဲ့ လက်မောင်းနဲ့ လက်တွေကို ဘာကြောင့် ဖော်ထားရတာလဲလို့ Cleats Club ချန်နယ်ကနေ မေးမြန်းခဲ့တဲ့အခါ "ဒါက ကျွန်တော် ငယ်စဉ်ကတည်းက လုပ်ခဲ့တဲ့အရာတစ်ခုဖြစ်ပြီး ကစားသမားဘဝတစ်လျှောက်လုံး ဒီလိုပဲ ဆက်လုပ်နေတာပါ"

"ကွင်းထဲမှာ ကစားနေတဲ့အခါ သင်က ဘယ်လိုပဲဖြစ်ဖြစ် နွေးထွေးနေတာပါ။ တခါတလေကျတော့ ပွဲမစခင် လေ့ကျင့်ခန်းလုပ်ချိန် ဒါမှမဟုတ် ဒုတိယပိုင်း ပြန်ထွက်လာချိန်တွေမှာ အရမ်းအေးပါတယ် အထူးသဖြင့် ဒီမှာ ဂျာမနီမှာ ဆောင်းရာသီက တကယ်ကို အေးပြီး ဆီးနှင်းတွေ ကျပါတယ်။ ဒါပေမဲ့ ကျွန်တော်က အခုဆိုရင် အသားကျနေပါပြီ ဒါက ကျွန်တော် နှစ်ပေါင်းများစွာ လုပ်ခဲ့တဲ့အရာပါ" လို့ ရှင်းပြပါတယ်။

ကိန်းဟာ ၂၀၂၄-၂၅ ရာသီမှာ ဘိုင်ယန်နဲ့အတူ ဘွန်ဒက်စ်လီဂါ ဖလားကို ရယူပြီး ဆုဖလားမရရှိသေးတဲ့ အခြေအနေကို ချိုးဖျက်နိုင်ခဲ့ပါတယ်။ သူဟာ ဂျာမန်ဘီလူးကြီးတွေ အတွက် ၉၆ ပွဲမှာ ဂိုးပေါင်း ၈၅ ဂိုး သွင်းယူထားပါတယ်။ ဒါ့အပြင် သူဟာ တော့တင်ဟမ်နဲ့ အင်္ဂလန်အတွက်လည်း သမိုင်းတစ်လျှောက် ဂိုးအများဆုံး သွင်းယူသူဖြစ်ပြီး  အင်္ဂလန်အတွက်လည်း ၇၃ ဂိုး သွင်းထားပါတယ်။