ဒီရာသီမှာ ယူနိုက်တက်စတား ဟွိုက်လန်းတစ်ယောက် ဂိုးပေါက်ပျောက်နေပေမယ့် ယူနိုက်တက်ဂန္ထဝင်ဟောင်း ဝိန်းရွန်းနီက သူ့အပေါ်ယုံကြည်မှုပေးဖို့ တောင်းဆိုလိုက်ပါတယ်။ဒိန်းမတ်သားဟာ ဒီဇင်ဘာ ၇ ရက်နေ့ နော်တင်ဟမ်ကို ၃-၂ နဲ့အရေးနိမ့်ခဲ့တဲ့ပွဲမှာ ဂိုးသွင်းနိုင်ပြီးကတည်းက ဂိုးပေါက်ပျောက်နေခဲ့တာဖြစ်ပါတယ်။ သူ့ရဲ့နောက်ဆုံးသွင်းဂိုးက ပလာဇန်ကို ၂ ဂိုးသွင်းယူခဲ့တာဖြစ်ပြီး အဲ့နောက် ဂိုးပေါက်ရှာမတွေ့တော့တာဖြစ်ပါတယ်။

ဟွိုက်လန်းဟာ ယူနိုက်တက်အသင်းကစားသမားတွေထဲ ဝေဖန်ခံနေရတဲ့ကစားသမားတွေထဲကတစ်ဦးဖြစ်ပြီး တန်ဟက်လက်အောက်မှာအပြင် အခုအာမိုရင်လက်အောက်မှာပါ ဝေဖန်ခံနေရတာဖြစ်ပါတယ်။ ယူနိုက်တက်ဟာ အက်ဖ်အေကော ကာရာဘောင်ကနေပါထွက်ခွာခဲ့ရပြီဖြစ်ကာ လက်ရှိပရီးမီးယားလိဂ်မှာလည်း အဆင့် ၁၄ နေရာမှာ ရပ်တည်နေပါတယ်။ ဒါပေမယ့် အင်္ဂလန်စတားဟောင်းက ဟွိုက်လန်းရဲ့ဂိုးသွင်းစွမ်းရည်ကို ယုံကြည်နေပြီး အချိန်ပေးဖို့ ပြောကြားခဲ့ပါတယ်။

“ယူနိုက်တက်အတွက်ကစားပေးရတဲ့တိုက်စစ်မှူးတစ်ဦးက ဂိုးမသွင်းနိုင်ဘူးဆိုရင် ဘယ်လောက် ဖိအားများလဲဆိုတာ ခံစားရနိုင်ပါတယ်။ လူတော်တော်များများက ခင်ဗျားအကြောင်းပြောနေကြမှာပါ။ ယူနိုက်တက်အတွက် ခင်ဗျားလုပ်နိုင်မှာလား?။ ကျွန်တော်မြင်တဲ့အကောင်းဆုံးအရာကတော့ ရိုးရိုးလေးပါ။ ပြိုင်ဘက်ဧရိယာထဲမျာ နေရာယူပြီး လာသမျှကို သေချာလေးအဆုံးသတ်ဖို့ပါ။ ဒါပေမယ့် အဲ့တာက ရိုးရှင်းတဲ့ပွဲတွေမှာတော့ အဆင်ပြေနိုင်ပါတယ်။

ခင်ဗျားအသင်းဖော်တွေက အခွင့်အရေးပေးခဲ့ရင် ၁၀ ကြိမ်မှာ ၉ ကြိမ်လောက်ဂိုးရနိုင်ပါတယ်။ ဟွိုက်လန်းက အဲ့လိုမလုပ်နိုင်သေးပေမယ့် သူ့အပေါ်မှာ ယုံကြည်မှုရှိဖို့ လိုအပ်ပါတယ်။ သူက ကစားသမားကောင်းတစ်ဦးဖြစ်သလို အလုပ်လည်းကြိုးစားပါတယ်။ အဲ့တာက တကယ်အရေးကြီးတယ်လို့ ကျွန်တော်ထင်ပါတယ်။ သူ့အနေနဲ့ ဂိုးလိုအပ်ပြီး အခွင့်အရေးတစ်ကြိမ်ရရင် တစ်ကြိမ်အသုံးချနိုင်ဖို့ လိုအပ်ပါတယ်”လို့ ရွန်းနီက ပြောကြားခဲ့ပါတယ်။

ယူနိုက်တက်ဟာ မနေ့ညတုန်းက အာဆင်နယ်နဲ့ သရေကျခဲ့ပြီး ဦးဆောင်ဂိုးကို ဖာနန်ဒက်စ်က သွင်းယူပေးနိုင်ခဲ့ပေမယ့် ဒီကလန်ရိုက်စ်က ချေပဂိုးပြန်လည်သွင်းယူပေးခဲ့ပါတယ်။
အသက် ၂၂ နှစ်သားကတော့ ဇီကာဇီးနေရာမှာ အစားဝင်လာခဲ့ပေမယ့် ထိရောက်တဲ့စွမ်းဆောင်ရည်တော့ ပြသနိုင်ခြင်းမရှိတာဖြစ်ပါတယ်။ အာမိုရင်ကတော့ အာဆင်နယ်နဲ့ပွဲမှာ ဟွိုက်လန်းကို သူ့ရဲ့စွမ်းဆောင်ရည်ကြောင့် အရန်ခုံထိုင်ခိုင်းတာမဟုတ်ဘူးလို့ အခိုင်အမာပြောကြားခဲ့ပါတယ်။

“နိုးပါ။ သူ့ရဲ့လန်းဆန်းမှုကြောင့် အရန်ခုံထိုင်ခိုင်းထားတာပါ။ သူပွဲအပြီးမှာ မောပန်းနေပါတယ်။ ကျွန်တော်တို့ မတူညီတဲ့အရာတွေကို ကြိုးစားခဲ့ပါတယ်”လို့ အာမိုရင်က ပြောကြားခဲ့ပါတယ်။ ပထမရာသီမှာ ဟွိုက်လန်းတစ်ယောက် ၄၃ ပွဲမှာ ၁၆ ဂိုးအထိသွင်းယူပေးထားနိုင်ခဲ့ပါတယ်။ အာဆင်နယ်နဲ့ပွဲအပြီးမှာ ယူနိုက်တက်ဟာ ယူရိုပါလိဂ်ကို အာရုံစိုက်ရတော့မှာဖြစ်ပြီး ပထမအကျော့တုန်းက ဆိုစီဒက်ကို ၁-၁ သရေကျထားခဲ့ပါတယ်။