စပိန်အသင်းနည်းပြ လူးဝစ်ဒီလာဖွန်တေက ယနေ့ည နယ်သာလန်အသင်းနဲ့ ကစားမယ့် နေရှင်းလိဂ် ကွာတားဖိုင်နယ် ပထမအကျော့ပွဲစဉ်မှာ သူ့အသင်းက တိုက်စစ်အားသန်ကစားပုံကို ဆက်လက်ထိန်းသိမ်းသွားမယ်လို့ ပြောကြားလိုက်ပါတယ်။

"ကျွန်တော်တို့က ကစားသမားတွေရဲ့ အကောင်းဆုံးစွမ်းရည်ကို ထုတ်သုံးရမှာဖြစ်ပြီး၊ ကျွန်တော်တို့ကစားသမားတွေက ဘောလုံးကို ပျော်ရွှင်စွာကစားချင်ကြတယ်၊ တိုက်စစ်ကို အများကြီးဆင်နွှဲချင်ကြတယ်။ ဒါက အောင်မြင်မှုအတွက် ဖော်မြူလာတစ်ခုတော့ မဟုတ်ပါဘူး။ တခါတလေမှာ ပြောင်းလဲရတာတွေလည်း ရှိနိုင်ပါတယ်။ ဒါပေမဲ့ ကစားသမားတွေက ဒီစတိုင်ကို လိုလားကြတယ်"လို့ ဒီလာဖွန်တေက ဗုဒ္ဓဟူးနေ့က သတင်းစာရှင်းလင်းပွဲမှာ သတင်းထောက်တွေကို ပြောကြားခဲ့ပါတယ်။

ဥရောပချန်ပီယံတွေကတော့ ၂၀၂၃ ခုနှစ်မှာ ဆွတ်ခူးခဲ့တဲ့ နေရှင်းလိဂ်ဖလားကို ကာကွယ်နိုင်တဲ့ ပထမဆုံးအသင်းဖြစ်လာဖို့ ကြိုးပမ်းသွားမှာပါ။ စပိန်အသင်းဟာ အုပ်စုတွင်းမှာ ၅ ပွဲနိုင် ၁ ပွဲသရေ ရလဒ်တွေရယူပြီး အုပ်စု ဇယားထိပ်မှာ ရှိနေခဲ့ပါတယ်။ နယ်သာလန်အသင်းကတော့ ဂျာမနီနောက်မှာ ဒုတိယနေရာနဲ့ အုပ်စုအဆင့်ကို အဆုံးသတ်ခဲ့ပါတယ်။

ဒီလာဖွန်တေက ဒီပွဲရဲ့ အရေးပါပုံကို အလေးပေးပြောကြားခဲ့ပြီး ဥရောပချန်ပီယံရှစ် ဖိုင်နယ်ပွဲစဉ်နဲ့တူတဲ့ ပွဲစဉ်တစ်ခုဖြစ်တယ်လို့ ဖွင့်ဟခဲ့ပါတယ်။ ဒီလာဖွန်တေက"ဒါကအရမ်းခက်ခဲတဲ့ပွဲပါ၊ ပြိုင်ဘက် ကစားသမားကောင်းတွေနဲ့ကစားရမှာပါ။ သူတို့အားလုံးက ဥရောပမှာ အမြင့်ဆုံးအဆင့်မှာ ကစားနေကြတာပါ။မနက်ဖြန်ပွဲက ဥရောပချန်ပီယံရှစ်ဖိုင်နယ်ပွဲစဉ်လိုပါပဲ"လို့ ပြောခဲ့ပါတယ်။

စပိန်အသင်းကတော့ မကြာသေးခင်က ကစားခဲ့တဲ့ပွဲစဉ်မှာ ထိခိုက်ဒဏ်ရာရရှိထားတဲ့ ဘာစီလိုနာတိုက်စစ်မှူး ဖာရန်တောရက်စ်မပါဘဲ ကစားရမှာဖြစ်ပါတယ်။ ဆက်လက်ပြီး ဒီလာဖွန်တေက"ကျွန်တော်တို့က အမြဲတမ်း ကစားသမားတွေရဲ့ ကျန်းမာရေးကို ဂရုစိုက်ပါတယ်။ သူ ကစားနိုင်မှာပါ။ ဒါပေမဲ့ ကျွန်တော်တို့က ဘာစွန့်စားမှုမှ မလုပ်ပါဘူး။ တနင်္ဂနွေနေ့မှာ ဒုတိယအကျော့အတွက် သူ့ကို အကောင်းဆုံးအခြေအနေနဲ့ ပြန်ရမယ်လို့ မျှော်လင့်ပါတယ်"လို့  ရှင်းပြခဲ့ပါတယ်။