မန်ချက်စတာစီးတီးနည်းပြ ပက်ဂွါဒီယိုလာက ကြာသပတေးနေ့နံနက်က လက်စတာကို ၂-၀ နဲ့အနိုင်ရခဲ့တဲ့ ပရီးမီးယားလိဂ်ပွဲစဉ်မှာ အသင်းအတွက် ဦးဆောင်ဂိုးသွင်းယူပေးခဲ့တဲ့ တောင်ပံကစားသမား ဂျက်ခ်ဂရီးလစ်ရှ်ကို ချီးကျူးပြောဆိုမှုတွေ ပြုလုပ်လာခဲ့ပါတယ်။ 

ဂရီးလစ်ရှ်အနေနဲ့ ၂၀၂၃ ခုနှစ်၊ ဒီဇင်ဘာလနောက်ပိုင်း ပထမဆုံးအကြိမ်အဖြစ် ပရီးမီးယားလိဂ်မှာ သွင်းဂိုးပြန်လည်ရရှိခဲ့တာလည်းဖြစ်ပါတယ်။ အင်္ဂလန်လက်ရွေးစင်က ယခုလက်စတာနဲ့ပွဲစဉ်ဟာ သူ့ရဲ့ညီဖြစ်သူ ကီးလန်အတွက် ရည်ရွယ်ပြီးကစားခဲ့တာဖြစ်ကြောင်းကို ဆိုရှယ်မီဒီယာမှတစ်ဆင့် "ဒီပွဲက မင်းအတွက် ကီးလန်" လို့ပို့စ်တင်ပြီး ပြောကြားခဲ့ပါတယ်။ 

ကီးလန်ဟာ ၉ လသားအရွယ်၊ ဧပြီလ၊ ၂၀၀၀ ခုနှစ်မှာ ဆုံးပါးခဲ့တာဖြစ်ပြီး ထိုစဉ်က ဂရီးလစ်ရှ်ဟာ အသက်-၄ နှစ်အရွယ်သာရှိပါသေးတယ်။ ပွဲအပြီးမှာ ဂွါဒီယိုလာက "ဂျက်ခ်က မယုံနိုင်စရာလူသားတစ်ယောက်ပါ။ သူ့ညီအကြောင်းကိုတော့ ကျွန်တော်မသိပါဘူး။ ဒါပေမယ့် ဒီအဖြစ်အပျက်က သူ့ရဲ့ အဖေ၊ အမေနဲ့ မိသားစုဝင်တွေအားလုံးအတွက် အရမ်းကိုခက်ခဲခဲ့မှာပါ။ အခုလို သူ့အနေနဲ့ သူ့ညီကိုသတိရတယ်ဆိုတာကောင်းပါတယ်။ ပြီးတော့ နေ့စဉ်နေ့တိုင်းမှာလည်း သတိရနေမယ်ဆိုတာ သေချာပါတယ်။ သူ ဒီပွဲမှာဂိုးသွင်းနိုင်ခဲ့ပြီး အရမ်းကောင်းအောင်ကစားနိုင်ခဲ့ပါတယ်" လို့ပြောကြားခဲ့ပါတယ်။ 

ယခုပွဲစဉ်မှာ ဂရီးလစ်ရှ်ဟာ သူရဲ့ပုံမှန်နေရာဖြစ်တဲ့ ဘယ်တောင်ပံနေရာမှာ ကစားခွင့်မရခဲ့ပေမယ့် မန်စီးတီးအတွက် ပွဲအစ ၂ မိနစ်မှာပဲ အဖွင့်ဂိုးသွင်းယူနိုင်ခဲ့တာဖြစ်ပါတယ်။ ဒဏ်ရာပြဿနာတွေ၊ ခြေစွမ်းမမှန်မှုတွေနဲ့ ရုန်းကန်နေရတဲ့ အသက်-၂၉ နှစ်အရွယ်ကစားသမားအတွက် ယခုသွင်းဂိုးဟာ ဒီရာသီအတွင်း ပထမဆုံးသော ပရီးမီးယားလိဂ်သွင်းဂိုးလည်းဖြစ်ခဲ့ပါတယ်။ 

ဆက်လက်ပြီး ဂွါဒီယိုလာက "ဂရီးလစ်ရှ်က အလယ်မှာကစားရတာကို သဘောကျပါတယ်။ ဘယ်လိုပုံစံဖြစ်ဖြစ် ကစားဖို့အဆင်သင့်ရှိနေတဲ့သူပါ။ ပုံမှန်နေရာကနေ အခြားနေရာကိုပြောင်းပြီးကစားရတာက မလွယ်မှန်း ကျွန်တော်သိပါတယ်။ ပြီးခဲ့တဲ့အက်ဖ်အေဖလားပွဲစဉ်မှာလည်း သူတကယ်ကောင်းအောင်ကစားနိုင်ခဲ့ပါတယ်" လို့ပြောကြားခဲ့ပါတယ်။ 

ယခုရှုံးပွဲကြောင့် လက်စတာကတော့ တန်းဆင်းဇုန်ထဲမှာ ဆက်လက်ကျန်ရှိခဲ့ပြီး ရာသီကုန်ဖို့က ၈ ပွဲသာလိုအပ်တော့တာကြောင့် ပရီးမီးယားလိဂ်မှာဆက်လက်ကျန်ရှိဖို့ အတော်လေးရုန်းကန်သွားရတော့မှာဖြစ်ပါတယ်။ လက်စတာနည်းပြ ဗန်နစ္စတယ်ရွိုင်းက "ကျွန်တော့်အတွက်အရေးကြီးဆုံးအချက်ကတော့ ပွဲရဲ့အခြေအနေကို တွက်ချက်ပြီး ဒီအခြေအနေမှာ အကောင်းဆုံးနည်းပြဖြစ်နေဖို့ပါ။ အရမ်းကို ခက်ခဲတဲ့အခိုက်အတန့်မှာရောက်ရှိနေပါတယ်။ ဒါကို ကောင်းမွန်တဲ့နည်းလမ်းနဲ့တုံ့ပြန်နိုင်ဖို့ မျှော်လင့်ပါတယ်" လို့ပြောကြားခဲ့ပါတယ်။