ဒဏ်ရာပြဿနာအကျပ်အတည်းကြီးကြီးမားမားနဲ့ ရင်ဆိုင်နေရတဲ့ ဘိုင်ယန်မြူးနစ်အတွက် နောက်ထပ်ထိုးနှက်ချက်တစ်ခုအဖြစ် အင်တာမီလန်နဲ့ရင်ဆိုင်ရမယ့် ချန်ပီယံလိဂ်ကွာတားဖိုင်နယ်ပ-ကျော့ပွဲစဉ်မှာ အားထားရတဲ့ကွင်းလယ်ကစားသမားမူစီယာလာကို လက်လွှတ်သွားရဖွယ်ရှိပါတယ်။ ဒီနေ့မနက်ပိုင်း၊ အော့စ်ဘတ်ကို ၃-၁ ဂိုးဖြင့် အနိုင်ရရှိတဲ့ ဘွန်ဒက်စ်လီဂါပွဲစဉ်ရဲ့ ပွဲချိန် ၅၄ မိနစ်မှာ ကွင်းလယ်လူက တံကောက်ကြောဒဏ်ရာနဲ့အတူ လဲကျသွားခဲ့ပါတယ်။ အသက်-၂၂ နှစ်အရွယ်ကစားသမားက ပွဲချိန် ၄၂ မိနစ်မှာ အသင်းအတွက် အရေးပါတဲ့ချေပဂိုးကို သွင်းယူပေးခဲ့ပါတယ်။ ဘိုင်ယန်မြူးနစ်အားကစားဒါရိုက်တာ မက်အီဘယ်လ်ကလည်း “ အခြေအနေတော့ သိပ်မကောင်းလှပါဘူး။ လာမယ့်အင်္ဂါနေ့ပွဲစဉ်အတွက် အသင်းမှာ သူမရှိနိုင်ပါဘူး”လို့ ပြောပါတယ်။

လတ်တလောမှာ ဘိုင်ယန်မြူးနစ်က နောက်ခံလူတွေဖြစ်တဲ့ ဟီရိုကီအီတို၊ အယ်လ်ဖွန်ဆိုဒေးဗီးစ်နဲ့ အူပါမီကာနိုတို့အပြင် ဂိုးသမားနူအာ၊ တောင်ပံကစားသမား ကင်စလေကိုးမန်းတို့ကို ဒဏ်ရာကြောင့် လက်လွှတ်ထားရပါတယ်။ဘိုင်ယန်မြူးနစ်ကပ္ပတိန်ကင်မစ်ချ်က “ ဒီနေရာမှာ မူစီယာလာမှမဟုတ်ပါဘူး၊ ဘယ်သူပဲဖြစ်နေပါစေ အတော်လေးခါးသီးလွန်းပါတယ်။ အခုအချိန်မှာတော့ ကျွန်တော်တို့အသင်းက ရူးလောက်စရာ ဒဏ်ရာပြဿနာများစွာနဲ့ ရင်ဆိုင်နေရပါတယ်”လို့ ပြောပါတယ်။

မူစီယာလာက အခုဘောလုံးရာသီ၊ ဘိုင်ယန်မြူးနစ်အတွက် ပြိုင်ပွဲစုံ ၁၈ ဂိုးအထိ သွင်းယူပြီး အသင်းရဲ့အဓိကကစားသမားတစ်ဦး ဖြစ်လာခဲ့ပါတယ်။ ဘိုင်ယန်မြူးနစ်နည်းပြ ကွန်ပနီက “ အခုဘောလုံးရာသီအစပိုင်းမှာလည်း ကျွန်တော်တို့တွေ မူစီယာလာမပါဝင်ဘဲ အချိန်အနည်းငယ် ကစားခဲ့ဖူးပါတယ်။ ကျွန်တော်က ဆရာဝန်မဟုတ်သလို ရှည်ရှည်ဝေးဝေးလည်း မစဉ်းစားချင်ပါဘူး။ ဒါပေမယ့် ကံမကောင်းစွာနဲ့ဘဲ မူစီယာလာက အင်တာနဲ့ပွဲစဉ်ကို လွဲချော်သွားလိမ့်မယ်လို့ ယူဆမိပါတယ်။ ဒီနေ့ သို့မဟုတ် မနက်ဖြန်မှာ စစ်ဆေးမှုတွေ လုပ်ပြီးရင် အခုထက်ပိုပြီး သိရှိရပါလိမ့်မယ်။ ဒါပေမယ့် မကြာခဏဖြစ်လေ့ဖြစ်ထရှိတဲ့ အကျပ်အတည်းအခိုက်အတန့်မျိုးမှာ ကျွန်တော်တို့တွေ ရပ်တန့်ပစ်လိုက်ဖို့ မသင့်လျော်ဘူးဆိုတဲ့ ခံစားချက်မျိုး ကျွန်တော့်ဆီမှာ အမြဲတမ်းရှိနေခဲ့ပါတယ်”လို့ ပြောပါတယ်။

အော့စ်ဘတ်ကို အနိုင်ရရှိပြီးနောက် ဘိုင်ယန်မြူးနစ်က အနီးဆုံးပြိုင်ဘက်လေဗာကူဆင်ထက် တစ်ပွဲပိုကစား၊ ကိုးမှတ်အသာရရှိကာ အမှတ်ပေးဇယားကို ဆက်လက်ဦးဆောင်ခဲ့ပါတယ်။ သူတို့တွေက စီးရီးအေအမှတ်ပေးဇယားဦးဆောင်သူ အင်တာမီလန်နဲ့ နှစ်ကျော့ရင်ဆိုင်ရဖို့ရှိနေပြီး အဲ့ဒီပွဲစဉ်တွေအကြားမှာ ခါးသီးပြိုင်ဘက်ဒေါ့မွန်နဲ့ပါ ရင်ဆိုင်ရမှာဖြစ်လို့ ပွဲကျပ်ကာလကို ဖြတ်သန်းသွားရဖို့ ရှိနေပါတယ်။

ကွန်ပနီက “ ကျွန်တော်တို့က အခုလိုအခြေအနေမျိုးရောက်ရှိလာဖို့အတွက် အလုပ်တွေ လုပ်ဆောင်ခဲ့ပါတယ်။ လက်ကျန်လိဂ်ပွဲစဉ်ခြောက်ခုနဲ့အတူ ချန်ပီယံလိဂ်ပွဲစဉ်တွေမှာ အောင်မြင်မှုသရဖူဆွတ်ခူးနိုင်ဖို့ ကျွန်တော်တို့ရဲ့အခွင့်အလမ်းတွေကို အသုံးချသွားချင်တယ်။ ဒါကြောင့် တခါတလေမှာ ဝမ်းနည်းစရာကောင်းတဲ့ ဇာတ်လမ်းဇာတ်ကွက်တွေမှတဆင့် စိတ်ဆင်းရဲစရာတွေကို မယူဆောင်ဘဲ အခုရာသီ၊ ကျွန်တော်တို့ ဖြေရှင်းခဲ့ရတဲ့ ပြဿနာတွေဆီမှ ခွန်အားတွေကိုသာ ရယူလိုက်ပါ”လို့ ပြောပါတယ်။