ရီးရဲလ်မက်ဒရစ် တိုက်စစ်မှူး ကီလီယန် အမ်ဘာပေရဲ့ မိခင်ဖြစ်သူ ဖေဇာ လာမာရီက သားဖြစ်သူရဲ့ နာမည်ကျော်ကြားမှုအတွက် စိတ်ခံစားမှုကို ပွင့်ပွင့်လင်းလင်း ထုတ်ဖော်ပြောကြားခဲ့ပါတယ်။ ပဲရစ္စမှာ နေထိုင်ရတဲ့ဘဝဟာ ပြင်းထန်တဲ့ မီဒီယာ အာရုံစိုက်မှုအောက်မှာ လူသားဆန်တယ်လို့ မခံစားရတော့ဘူးလို့ သူမက ဆိုပါတယ်။ စူပါစတားဘဝနဲ့အတူ ပါလာတဲ့ ဖိအားတွေ၊ အထီးကျန်မှုတွေ၊ မီဒီယာရဲ့ စွဲလမ်းမှုတွေကို ပြန်ပြောင်းပြောဆိုရင်း သားဖြစ်သူ ပီအက်စ်ဂျီအသင်းမှာ ရှိစဉ်က သူ့လက်ထဲကနေ လျှောထွက်သွားခဲ့တဲ့ အခိုက်အတန့်ကိုပါ ဖွင့်ဟခဲ့ပါတယ်။

ရီးရဲလ်မက်ဒရစ် တိုက်စစ်မှူး အမ်ဘာပေရဲ့ မိခင်ဖြစ်သူ ဟန်းဘောလ် ကစားသမားဟောင်းတစ်ဦးဖြစ်တဲ့ လာမာရီဟာ Demain le Sport အစီအစဉ်မှာ ပါဝင်ရင်း နာမည်ကျော်ကြားမှုရဲ့ မှောင်မိုက်တဲ့ဘက်ခြမ်းကို ထူးထူးခြားခြား ထုတ်ဖော်ပြောဆိုခဲ့ပါတယ်။ ပီအက်စ်ဂျီ မှာ မီဒီယာ အာရုံစိုက်မှုတွေ ပြင်းထန်လွန်းလို့ သားဖြစ်သူရဲ့ နေ့စဉ်ဘဝကို ဘယ်လိုမျိုး မဖြစ်နိုင်လောက်အောင် ဖန်တီးခဲ့လဲဆိုတာကို သူမက စိတ်ခံစားမှုအပြည့်နဲ့ ပြောပြခဲ့ပါတယ်။

"ပဲရစ္စ မှာရှိတဲ့ ကီလီယန်ဟာ သူ့ရဲ့ အားနည်းချက်တွေကို ဖော်ပြနေတဲ့ မှန်ဘီလူးကြီးအောက်မှာ ရောက်နေသလိုပါပဲ။ သူဟာ လူသားတစ်ဦး မဟုတ်တော့ဘူး။ ကျွန်မမှာ အရမ်းကို စိတ်ဓာတ်ကျခဲ့ရတဲ့ အချိန်တွေ ရှိခဲ့တယ်။ သူဟာ လမ်းပေါ်မှာတောင် လမ်းလျှောက်လို့ မရနိုင်တော့ဘူး။ ဒါက ကျွန်မကို ဝမ်းနည်းစေပါတယ်" လို့ ပြောကြားခဲ့ပါတယ်။

လာမာရီက သူမရဲ့ မိသားစုအတွက် နာမည်ကျော်ကြားမှုကို ဘယ်တုန်းကမှ မရှာဖွေခဲ့ကြောင်း ဝန်ခံခဲ့ပြီး "ကျွန်မတို့ဟာ လူသိရှင်ကြား ပုဂ္ဂိုလ်တွေ ဖြစ်လာဖို့အတွက် ပြင်ဆင်ထားတာ မရှိပါဘူး" လို့ ပြောခဲ့ပါတယ်။ အမ်ဘာပေ နာမည်ကျော်ကြားမှုဟာ မိုးကြိုးပစ်သလို မြန်ဆန်လွန်းတာကြောင့် သူတို့ရဲ့ဘဝ ဘယ်လောက် မြန်မြန်ဆန်ဆန် ပြောင်းလဲသွားလဲဆိုတာကိုလည်း လာမာရီက ဖွင့်ဟခဲ့ပါတယ်။ ပြင်သစ်တိုက်စစ်မှူးအတွက် အရေးပါခဲ့တဲ့ ၂၀၁၈ ကမ္ဘာ့ဖလားပွဲကို ပြန်ပြောင်းစဉ်းစားရင်း ကမ္ဘာကျော်ဖြစ်လာတဲ့ သားကို ကြည့်ရင်း ခံစားခဲ့ရတဲ့ စိတ်ပိုင်းဆိုင်ရာ ထိခိုက်မှုတွေကို သူမက ဖော်ပြခဲ့ပါတယ်။

"၂၀၁၈ ကမ္ဘာ့ဖလားကာလတုန်းက ကျွန်မ အိမ်မှာ တစ်ယောက်တည်းပါ။ သူ့ကို Champs-Elysees လမ်းမကြီးပေါ် လျှောက်သွားတာ မြင်လိုက်ရတဲ့အချိန်မှာ သူဟာ ကျွန်မလက်ထဲကနေ လျှောထွက်သွားပြီဆိုတာ သိလိုက်ရတယ်။ ကျွန်မဟာ ဆင်းရဲတဲ့ ဒေသ ဘွန်နီ ကနေ Royal Monceau ကို ချက်ချင်း ပြောင်းရွှေ့ခဲ့ရသလို ခံစားရတယ်။ ကျွန်မတို့ဟာ Les Tuche မိသားစုလိုပဲလို့ ခံစားခဲ့ရတယ်" လို့ ရုတ်တရက် ချမ်းသာသွားတဲ့ ဆင်းရဲတဲ့မိသားစုအကြောင်း ရိုက်ကူးထားတဲ့ ရုပ်ရှင်ကို ကိုးကားပြီး ဝန်ခံခဲ့ပါတယ်။

ပီအက်စ်ဂျီ နဲ့ နှစ်ပေါင်းများစွာ စာချုပ်ကိစ္စ အခြေအတင် ဖြစ်ခဲ့ရပြီးနောက်မှာ အမ်ဘာပေဟာ ၂၀၂၄ ခုနှစ်မှာ အလွတ်ပြောင်းရွှေ့ကြေးနဲ့ ရီးရဲလ်မက်ဒရစ်ကို နောက်ဆုံးမှာ ရောက်ရှိသွားခဲ့ပါတယ်။ ပီအက်စ်ဂျီ မှာ သူရဲ့ နောက်ဆုံးရာသီဟာ မတည်ငြိမ်ခဲ့ပါဘူး။ စာချုပ်တိုးဖို့ ငြင်းဆိုခဲ့တဲ့အတွက် အရန်ခုံမှာ ထားခံရပြီး အသင်းရဲ့ အကြီးအကဲတွေနဲ့ ဆက်ဆံရေး တင်းမာခဲ့ရပါတယ်။

ရီးရဲလ်မက်ဒရစ်ကို ရောက်ပြီး ပထမရာသီမှာ ၄၄ ဂိုးသွင်းခဲ့ပေမဲ့ အဓိကဖလားကြီး မရရှိခဲ့ပေမဲ့ နည်းပြသစ် ဇာဘီ အလွန်ဆိုလက်အောက်မှာ အမ်ဘာပေရဲ့ ခြေစွမ်းဟာ အံ့မခန်း မြင့်တက်လာခဲ့ပါတယ်။ အသက် ၂၆ နှစ်အရွယ် ကစားသမားဟာ ဒီရာသီမှာ ၁၀ ပွဲကစားပြီး ၁၄ ဂိုးအထိ သွင်းယူထားပြီး ရီးရဲလ်ရဲ့ စုစုပေါင်းသွင်းဂိုးရဲ့ တစ်ဝက်ကျော်ကို သူက တစ်ဦးတည်း ဖန်တီးပေးခဲ့တာ ဖြစ်ပါတယ်။

ဗီလာရီးရဲလ်နဲ့ပွဲမှာ ဒဏ်ရာအနည်းငယ်ကြောင့် ခဏတာ နာကျင်မှု ရှိခဲ့ပေမဲ့ အမ်ဘာပေရဲ့ ဒဏ်ရာဟာ မစိုးရိမ်ရတဲ့အခြေအနေဖြစ်ပြီး ပြင်သစ်လက်ရွေးစင်အသင်းနဲ့အတူ အောက်တိုဘာလရဲ့ အဇာဘိုင်ဂျန်နဲ့ အိုက်စလန်ပွဲတွေအတွက် ပူးပေါင်းပါဝင်နေပါပြီ။ ပြင်သစ်တိုက်စစ်မှူးဟာ ပဲရစ္စမှာကတည်းက လက်လှမ်းမမီနိုင်တော့ဘူးလို့ ထင်ရတဲ့ အောင်မြင်မှုနဲ့ စိတ်အေးချမ်းမှုအကြားမှာ ဟန်ချက်ညီညီ နေထိုင်တတ်သွားပုံ ရပါတယ်။