လီယွန်နယ်မက်ဆီဟာ အာဂျင်တီးနားအသင်းနဲ့မပူးပေါင်းခင် အင်တာမီယာမီအတွက် နောက်ဆုံးပွဲစဉ်ဖြစ်တဲ့ စိန့်လူးဝစ်စီးတီးနဲ့ပွဲစဉ်မှာပါဝင်ဖို့ ကြံ့ခိုင်မှုပြည့်ဝနေတယ်လို့ ကလပ်ဘက်က အသိပေးထုတ်ပြန်လာခဲ့ပါတယ်။ 

မက်ဆီသာမက တိုက်စစ်မှူး လူးဝစ်ဆွာရက်ဇ်ကလည်း ကြံ့ခိုင်မှုပြည့်ဝနေတယ်လို့သိရပြီး တောင်အမေရိက ကစားသမား ၂ ဦးစလုံးဟာ ကိုပါအမေရိကဖလားပြိုင်ပွဲမတိုင်ခင်မှာ ကလပ်အတွက် နောက်ဆုံးအနေနဲ့ ပါဝင်ကစားသွားနိုင်ဖွယ်ရှိနေတာဖြစ်ပါတယ်။ 

သောကြာနေ့ကပြုလုပ်ခဲ့တဲ့ သတင်းစာရှင်းလင်းပွဲမှာ မက်ဆီရဲ့ ကြံ့ခိုင်မှုအခြေအနေနဲ့ပတ်သက်ပြီး အင်တာမီယာမီလက်ထောက်နည်းပြ ဂျာဗီယာမိုရေးစ်က "ကစားသမားတွေအားလုံး ကစားဖို့အတွက် အကောင်းဆုံးအခြေအနေမှာရှိနေပါတယ်။ ဒီနေ့ကျွန်တော်တို့ လေ့ကျင့်မှုတွေပြုလုပ်ပြီး နည်းပြဝန်ထမ်းတွေကလည်း ကစားသမားတွေကို စောင့်ကြည့်မှုတွေပြုလုပ်သွားမှာပါ။ ဒါပေမယ့် ကစားသမားတွေမှာ ထိခိုက်ဒဏ်ရာရထားတာတွေတော့မရှိပါဘူး။ လေ့ကျင့်ရေးအစီအစဉ်ပြီးရင်တော့ ကစားသမားတွေနဲ့ ဆွေးနွေးမှုတွေပြုလုပ်ရဦးမှာပါ။ အားလုံး ပါဝင်ကစားနိုင်ဖို့တော့ သေချာပါတယ်။ ကျွန်တော်တို့အနေနဲ့ နိုင်ငံတကာပြိုင်ပွဲတွေမစတင်ခင်မှာ နောက်ဆုံးအနေနဲ့ အကောင်းဆုံး ကစားသွားဖို့လိုပါတယ်။ ဒီအတွက် ကစားသမားတွေကလည်း ကြံ့ခိုင်မှုပြည့်ဝနေပါတယ်" လို့ပြောကြားခဲ့ပါတယ်။ 

မက်ဆီနဲ့ဆွာရက်ဇ်တို့ဟာ အတ္တလန္တာကို ၃-၁ နဲ့ရှုံးနိမ့်ခဲ့တဲ့ပွဲစဉ်မှာ ပါဝင်ကစားခဲ့ကြပြီး ဘာစီလိုနာနဲ့ ပီအက်စ်ဂျီကြယ်ပွင့်ဟောင်းက အင်တာမီယာမီအတွက် နှစ်သိမ့်ချေပဂိုးတစ်ဂိုးသွင်းယူပေးခဲ့ပါတယ်။ ရှုံးပွဲကြုံတွေ့ခဲ့ရသော်လည်း အင်တာမီယာမီဟာ အမှတ်ပေးဇယား ထိပ်ဆုံးမှာ ဆက်လက်ဦးဆောင်နေပြီး ဒုတိယနေရာက စင်စင်နာတီကို ၁ မှတ်ဖြတ်ထားနိုင်ပါသေးတယ်။ 

လီယွန်နယ်မက်ဆီက ကိုပါအမေရိကပြိုင်ပွဲမှာ နိုင်ငံအသင်းအတွက် ပါဝင်ကစားသွားမှာဖြစ်လို့ အင်တာမီယာမီအနေနဲ့ ဘောလွန်းဒီအော် ၈ ဆုရှင်မပါဝင်ဘဲ ဇူလိုင်လ ၁၄ ရက်နေ့အထိ ရုန်းကန်သွားရဖွယ်ရှိနေပါတယ်။ 

လာမယ့်စိန့်လူးဝစ်စီးတီးနဲ့ပွဲစဉ်အပြီးမှာတော့ မက်ဆီဟာ အီ‌ကွေဒေါ၊ ဂွါတီမာလာတို့နဲ့ကစားမယ့် ‌ခြေစမ်းပွဲစဉ်တွေအတွက် အာဂျင်တီးနားနဲ့ ပူးပေါင်းသွားမှာဖြစ်ပြီး ထို့နောက်မှာတော့ ၂၀၂၁ ကိုပါအမေရိက ချန်ပီယံဆိုတဲ့ဂုဏ်ပုဒ်ကို ဆက်လက်ထိန်းသိမ်းဖို့ ကြိုးစားသွားရမှာဖြစ်ပါတယ်။ ကိုပါအမေရိကဖလား အုပ်စုအဆင့်မှာ အာဂျင်တီးနားဟာ ချီလီ၊ ကနေဒါ၊ ပီရူးတို့နဲ့ အုပ်စုတစ်ခုတည်းကျရောက်နေပါတယ်။