ဟယ်ရီကိန်းက ဘိုင်ယန်မြူးနစ်နည်းပြဟောင်း၊ လက်ရှိအင်္ဂလန်လက်ရွေးစင်အသင်းနည်းပြ တူချယ်နဲ့ ဆက်ဆံရေးအကြောင်းကို အားရပါးရရှင်းပြခဲ့ပါတယ်။ အင်္ဂလန်လက်ရွေးစင်အသင်းရဲ့နောက်ဆုံးသတင်းစာရှင်းလင်းပွဲမှာ အသက်-၃၁ နှစ်အရွယ်ဂိုးမုဆိုးက ဘိုင်ယန်မြူးနစ်ဆီပြောင်းရွှေ့ဖို့ဆုံးဖြတ်မှုမှာ သောမတ်စ်တူချယ်ဟာ လွှမ်းမိုးမှုအထူးကြီးမားခဲ့တဲ့ အကြောင်းရင်းတစ်ရပ်ဖြစ်ခဲ့တယ်လို့ ထုတ်ပြောလာပါတယ်။

ဟယ်ရီကိန်းက “ဘိုင်ယန်မြူးနစ်ဆီပြောင်းရွှေ့ဖို့အတွက် ကနဦးစဉ်းစားခဲ့ရာမှာ သောမတ်စ်တူချယ်က အဓိကအကြောင်းအရင်းတစ်ရပ် ဖြစ်ခဲ့ပါတယ်။ သူက နည်းပြကောင်းတစ်ဦးဆိုတာ ကျွန်တော် သိပါတယ်။ သူနဲ့စကားပြောဖြစ်တဲ့အခါ ခွန်အားတွေ၊ စိတ်အားထက်သန်မှုတွေ၊ ကောင်းမွန်တဲ့စိတ်ဓါတ်ပိုင်းတွေကို ယူဆောင်လာပေးတက်ပါတယ်။ကျွန်တော်လည်း သူနဲ့အတူ ပြီးခဲ့တဲ့ဘောလုံးရာသီကို အကောင်းမွန်ဆုံး ဖြတ်သန်းခဲ့ပါတယ်”လို့ ရှင်းပြပါတယ်။

ဆက်လက်ပြီး တိုက်စစ်မှူးက ဂျာမန်မြေမှာ အလျှင်အမြန်အခြေကျသွားမှုနဲ့ပတ်သက်လို့ သူ့ရဲ့ပင်ကိုစရိုက်နဲ့ ယုံကြည်မှုအပေါ်ထားရှိတဲ့ စွမ်းရည်အကြောင်းကို အခြေပြုကာ ရှင်းပြသွားခဲ့ပါတယ်။ ဟယ်ရီကိန်းက “ဘယ်လိုအခြေအနေ၊ ဘယ်လိုနေရာမျိုးမှာ ကစားနေရပါစေ…. အသင်းကို ကူညီပေးနိုင်ဖို့နဲ့ ဂိုးတွေသွင်းယူနိုင်ဖို့ကသာ ကျွန်တော့်ကိုယ်ကျွန်တော် စိတ်ခွန်အားပေးနေမိတဲ့အချက်တွေ ဖြစ်ပါတယ်။

ပြီးခဲ့တဲ့ဘောလုံးရာသီ၊ ဘွန်ဒက်စ်လီဂါပြိုင်ပွဲမှာ အကောင်းဆုံးစတင်နိုင်ခဲ့လို့ ကျွန်တော် ဂုဏ်ယူမိပါတယ်။ နယ်မြေသစ်ဆီ ရောက်ရှိသွားချိန် ဘာကိုမျှော်လင့်ထားနိုင်မလဲဆိုတာ ကျွန်တော်လည်း မသိခဲ့ပါဘူး။ ဒါပေမယ့် သောမတ်စ်တူချယ်ရဲ့အကူအညီ၊ လက်ထောက်နည်းပြဘာရီရဲ့အကူအညီနဲ့အတူ ကျွန်တော် အလျှင်အမြန်အခြေကျခဲ့ပြီး ကစားသမားဘဝသက်တမ်းတလျှောက် အကောင်းဆုံးအရာကို လုပ်နိုင်ခဲ့ပါတယ်”လို့ ပြောပါတယ်။

၂၀၂၄ ခုနှစ်၊ မေလမှာ ဘိုင်ယန်မြူးနစ်နဲ့လမ်းခွဲခဲ့တဲ့ တူချယ်က အင်္ဂလန်လက်ရွေးစင်အသင်းနည်းပြအဖြစ် ခန့်အပ်ခံရပြီးနောက် ဟယ်ရီကိန်းနဲ့ထပ်မံလက်တွဲသွားရပါလိမ့်မယ်။