မန်စီးတီးဂိုးသမား အီဒါဆန်ကို အယ်လ်-အီတီဟက်အသင်းက ချိတ်ဆက်နေပေမယ့်လည်း ဂွါဒီယိုလာကတော့ တပည့်ဖြစ်သူကို အသင်းမှာပဲ ဆက်နေစေချင်နေပါတယ်။

ပြီးခဲ့တဲ့ရာသီတုန်းက တော့တင်ဟမ်နဲ့ပွဲမှာ အချင်းများခဲ့ပြီးနောက် အီဒါဆန်ဟာ စီးတီးကနေ ထွက်ခွာဖို့ ပြင်ဆင်လာခဲ့တယ်လို့ သတင်းတွေက ဆိုပါတယ်။

အဆိုပါအနေအထားမျိုးတွေဖြစ်နေပေမယ့်လည်း ဂွါဒီယိုလာက အီဒါဆန်ကို ဆက်ထိန်းနိုင်မယ့်အရေး လက်မလျော့သေးတာဖြစ်ပါတယ်။

“ကျွန်တော် အက်ဒီကို အသင်းမှာပဲဆက်ရှိစေချင်ပါတယ်။ သူ့ကိုဒီအသင်းမှာဆက်မြင်ချင်ပါတယ်။ ပြီးခဲ့တဲ့ရာသီတုန်းက အောင်မြင်မှုတွေဟာ သူမပါပဲမရနိုင်ပါဘူး။ သူက အဝတ်လဲခန်းထဲမှာ အရေးပါတဲ့ကစားသမားတစ်ဦးပါ”လို့ ဂွါဒီယိုလာက ပြောကြားခဲ့ပါတယ်။

၂၀၁၇ ဘင်ဖီကာအသင်းထံကနေ ပြောင်းလာပြီးကတည်းက အီဒါဆန်ဟာ စီးတီးအသင်းနဲ့အတူ ပရီးမီးယားလိဂ် ၆ ကြိမ် ဆဲ့ ချန်ပီယံလိဂ်ဖလား ၁ လုံးအပါအဝင် ဆုဖလား ၁၇ လုံးအထိ ရယူထားနိုင်ခဲ့ပါတယ်။

တကယ်လို့ ဘရာဇီးသားအနေနဲ့ ဆော်ဒီမြေကိုထွက်ခွာခဲ့ဖြစ်ခဲ့ရင် စီးတီးအနေနဲ့ အစားထိုးဖို့ ခက်ခဲနိုင်တာဖြစ်ပါတယ်။

အယ်လ်-အီတီဟက်အသင်းကလည်း အီဒါဆန်ကို ချိတ်ဆက်နေဆဲဖြစ်ကာ ယခင်တုန်း ဘန်ဇီးမား ၊ ဒီယာဘီ နဲ့ ကန်တီတို့ကို ခေါ်ယူထားခဲ့ပါတယ်။

အခြားတစ်ဖက်မှာလည်း စီးတီးကွင်းလယ်လူ ဒီဘရိုင်းတစ်ယောက် ဆော်ဒီမြေကိုပြောင်းဖို့ ချိတ်ဆက်နေပါတယ်။ 

အီဒါဆန်ထွက်ခွာခဲ့ရင် အော့တီဂါက ဦးစားပေးဂိုးသမားဖြစ်လာဖွယ်ရှိနေပြီး အရန်ဂိုးသမားရှာဖွေရဖွယ်ရှိနေပါတယ်။