
အာဆင်နယ်နဲ့ပွဲစဉ်ကို လွဲချော်ခဲ့တဲ့ ပယ်မာရဲ့ဒဏ်ရာအခြေအနေကို အသိပေးလာတဲ့ မာရက်စ်ကာ
ချဲလ်ဆီးနည်းပြ အန်ဇိုမာရက်စ်ကာက စနေနေ့ညက အာဆင်နယ်ကို ၁-၀ နဲ့ရှုံးနိမ့်ခဲ့တဲ့ပရီးမီးယားလိဂ်ပွဲစဉ်မှာ ပါဝင်နိုင်ခဲ့ခြင်းမရှိတဲ့ အသင်းရဲ့အဓိက ကွင်းလယ်လူ ကိုးလ်ပယ်မာရဲ့ ဒဏ်ရာအခြေအနေကို အသိပေးပြောကြားလာခဲ့ပါတယ်။
ယခုနှစ်ရာသီအစမှာ ပယ်မာဟာ ချဲလ်ဆီးအတွက် သွင်းဂိုးတွေတောက်လျှောက်သွင်းယူပြီး ထိပ်တန်းခြေစွမ်းကို ပြသနိုင်ခဲ့ပေမယ့် အသင်းရဲ့ပြိုင်ပွဲစုံ နောက်ဆုံး ၁၀ ပွဲမှာတော့ ဂိုးမရခဲ့ဘဲ ခြေစွမ်းပိုင်းလည်း အနည်းငယ်ကျဆင်းလာခဲ့တာဖြစ်ပါတယ်။ အင်္ဂလန်လက်ရွေးစင်ဟာ လေ့ကျင့်ရေးကွင်းမှာ ဒဏ်ရာပြဿနာကြုံတွေ့ထားခဲ့ရတာကြောင့် ယမန်နေ့ညက အာဆင်နယ်နဲ့ယှဉ်ပြိုင်ခဲ့ရတဲ့ ပရီးမီးယားလိဂ်ပွဲစဉ်ကိုလည်း လွဲချော်ခဲ့ပါတယ်။
တိုက်စစ်ပိုင်းကစားသမားအစုံအလင်အသုံးမပြုနိုင်ခဲ့တဲ့ချဲလ်ဆီးဟာ အာဆင်နယ်ကို အဝေးကွင်းမှာသွားရောက်ရင်ဆိုင်ခဲ့ရပြီး မီခေးလ်မီရီနိုရဲ့ တစ်လုံးတည်းသောသွင်းဂိုးကြောင့် ရှုံးပွဲကြုံတွေ့ခဲ့ရပါတယ်။ ပယ်မာအနေနဲ့ အဆိုပါပွဲစဉ်ကိုလွဲချော်ခဲ့ပေမယ့် သောမတ်စ်တူချယ်စတင်ဦးဆောင်သွားမယ့် အင်္ဂလန်အသင်းရဲ့လူစာရင်းမှာတော့ ရွေးချယ်ခံထားခဲ့ရပါတယ်။
အာဆင်နယ်ကိုရှုံးနိမ့်ခဲ့တဲ့ပွဲစဉ်အပြီးမှာ ပယ်မာမပါဝင်နိုင်ခဲ့တာနဲ့ပတ်သက်ပြီး မာရက်စ်ကာက "ပယ်မာအနေနဲ့ အင်္ဂလန်အသင်းအတွက်လည်း ကစားနိုင်မယ်လို့ ကျွန်တော်မထင်ပါဘူး။ ဘာကြောင့်လဲဆိုတော့ သူက စနေနေ့ကမှ ဒဏ်ရာပြဿနာကြုံတွေ့ထားခဲ့ရလို့ပါ။ ကြွက်သားဒဏ်ရာပြဿနာဖြစ်ပြီး တနင်္လာနေ့မှာ အကဲဖြတ်မှုတွေပြုလုပ်သွားရပါမယ်" လို့ပြောကြားခဲ့ပါတယ်။
နိုင်ငံတကာပွဲစဉ်တွေကျင်းပချိန်အတွင်းမှာ ပယ်မာအနေနဲ့ ကြံ့ခိုင်မှုပြန်လည်ရရှိအောင် အားမွေးနိုင်မလားဆိုတဲ့မေးခွန်းကို အီတလီသားနည်းပြက "ကျွန်တော်တို့အနေနဲ့ ကစားသမားတွေဒဏ်ရာပြဿနာကြုံတွေ့စေဖို့ ဆန္ဒမရှိပါဘူး။ ဒါပေမယ့် ပယ်မာအနားယူလိုက်မယ်ဆိုရင်တော့ ရုပ်ပိုင်းဆိုင်ရာရော၊ စိတ်ပိုင်းဆိုင်ရာမှာပါ ပိုကောင်းလာနိုင်ပါတယ်" လို့ဖြေကြားခဲ့ပါတယ်။
သို့သော်လည်း မာရက်စ်ကာက ချဲလ်ဆီးအနေနဲ့ အာဆင်နယ်ကိုရှုံးနိမ့်ခဲ့ခြင်းမှာ ပယ်မာ အသင်းမှာ မပါဝင်နိုင်လို့မဟုတ်ကြောင်း ပြောကြားခဲ့ပြီး အခြားကစားသမားတွေ ဒဏ်ရာကြုံတွေ့နေရတာကြောင့်ဖြစ်တယ်လို့ဆိုပါတယ်။ မာရက်စ်ကာက "ရိုးရိုးသားသားပြောရယ်ဆိုရင် အသင်းရဲ့တိုက်စစ်ပိုင်းမှာ နိုနီမာဒူကီ၊ နီကိုလက်စ်ဂျန်ဆန်နဲ့ ပယ်မာတို့ပါဝင်မယ်ဆိုရင်တော့ ပွဲရဲ့အဖြေက ပြောင်းလဲမှုတွေရှိနိုင်ပါတယ်။ ဒါပေမယ့် ကစားသမားတစ်ယောက်တည်းနဲ့တော့ ထူးခြားမှုရှိမှာမဟုတ်ပါဘူး။ ကျွန်တော်တို့ ကစားသမားတစ်ယောက်တည်းအပေါ်မှာပဲ မှီခိုနေလို့မရပါဘူး။ ရလဒ်က အသင်းရဲ့ကစားသမားတိုင်းအပေါ်မှာ မူတည်နေပါတယ်။ ပယ်မာကို ဖိအားတွေအများကြီးပေးစရာမလိုပါဘူး" လို့ပြောကြားခဲ့ပါတယ်။