အက်သလက်တီကိုမက်ဒရစ်နည်းပြ ဒီယေဂိုဆီမြွန်နီက ဟန်ဆီဖလစ်ဦးဆောင်နေတဲ့ ပြိုင်ဘက်ဘာစီလိုနာအသင်းရဲ့ ကစားဟန်ကို အလွန်ကြိုက်နှစ်သက်မိကြောင်း ပြောကြားလာခဲ့ပြီး ဘာစီလိုနာရဲ့ ကစားပုံကို ချီးကျူးပြောဆိုမှုတွေ ပြုလုပ်လာခဲ့ပါတယ်။ 

လာမယ့်အပတ် လာလီဂါပွဲစဉ်မှာတော့ ဘာစီလိုနာနဲ့ အက်သလက်တီကိုတို့ဟာ ထိပ်တိုက်တွေ့ဆုံသွားမှာဖြစ်ပြီး ဇယားထိပ်ပိုင်း တိုက်ပွဲတစ်ခုကို မြင်တွေ့သွားရမှာဖြစ်ပေမယ့် ဆီမြွန်နီကတော့ ဘာစီလိုနာကို ချီးကျူးလာခဲ့တာဖြစ်ပါတယ်။  ဆီမြွန်နီက “ကျွန်တော် လက်ရှိ
ဘာစီလိုနာအသင်းကို အရမ်းကြိုက်ပါတယ်။ ဘာကြောင့်လဲဆိုတော့ သူတို့ရဲ့ ကစားဟန်နဲ့ ခြေစွမ်းကြောင့်ပါပဲ။ သူတို့အနေနဲ့ အခုလို တိုက်စစ်ပိုင်းစွမ်းဆောင်ရည်မြင့်ပြီး ခံစစ်ကိုလည်း အထောက်အကူ့ပြုနိုင်တဲ့ ကစားပုံမျိုးကို ဘယ်လောက်အထိ ထိန်းသိမ်းထားနိုင်မလဲမသိပေမယ့် သူတို့မှာ လူငယ်ကစားသမားကောင်းတွေ အများကြီးရှိနေတာတော့ သိပါတယ်။ ဒါက ဖလစ်ရောက်လာမှ တိုးတက်လာတဲ့အရာတွေပါ”

“သူတို့မှာ ရာသီတိုင်းလိုလို ဂိုးသွင်းနှုန်းမြင့်နေတဲ့ တိုက်စစ်မှူး လီဝန်ဒေါစကီးလည်း ရှိနေပါသေးတယ်။ ဖလစ်က ပရိသတ်တွေအတွက် ဘောလုံးပွဲကြည့်ရတန်အောင် လုပ်ပေးနိုင်တဲ့နည်းပြမျိုးပါ။ သူတို့ကစားဟန်က အရမ်းလှပပါတယ်။ ပြိုင်ဘက်ကို ဖိအားပေးပုံတွေ၊ နောက်တန်းပိုင်းကစားပုံတွေ၊ တစ်ဦးချင်းကျော်ဖြတ်ပုံတွေ အကုန်လုံးကြည့်ကောင်းနေပါတယ်။ သူတို့က တကယ်ကောင်းတဲ့အသင်းပါ” လို့ပြောကြားခဲ့ပါတယ်။ 

လက်ရှိအချိန်မှာတော့ အက်သလက်တီကိုဟာ ဘာစီလိုနာနဲ့ ရမှတ် ၃ မှတ်အကွာ လာလီဂါအမှတ်ပေးဇယားရဲ့ အဆင့် ၃ နေရာမှာရပ်တည်နေပါတယ်။ ပြိုင်ပွဲစုံ နောက်ဆုံး ၁၀ ပွဲဆက်တိုက်အနိုင်ရထားတဲ့ အက်သလက်တီကိုဟာ လာမယ့်ပွဲစဉ်မှာတော့ ဂီတာဖေးနဲ့ ယှဉ်ပြိုင်သွားရမှာဖြစ်ပါတယ်။