ချဲလ်ဆီးနည်းပြ အန်ဇိုမာရက်စ်ကာဟာ မန်ချက်စတာယူနိုက်တက်မှ အသင်းသို့ အငှားစာချုပ်နဲ့ လာရောက်ကစားနေတဲ့ တောင်ပံကစားသမား ဂျေဒန်ဆန်ချိုရဲ့အနာဂတ်နဲ့ပတ်သက်ပြီး ရှင်းရှင်းလင်းလင်းပြောကြားခြင်းမရှိသေးဘဲ ကစားသမားဟာ စတန်းဖို့ဒ်ဘရစ်ချ်မှာဆိုရင်တော့ ပိုကောင်းနိုင်တယ်လို့သာ ဆိုပါတယ်။ 

ပြီးခဲ့တဲ့နွေရာသီအပြောင်းအရွှေ့ကာလမှာ ယူနိုက်တက်မှထွက်ခွာလာခဲ့တဲ့ ဆန်ချိုကို ချဲလ်ဆီးအနေနဲ့ စာချုပ်ပါသဘောတူညီတွေအရ ရာသီအကုန်မှာ ပေါင် ၂၅ သန်းဝန်းကျင်နဲ့ အပြီးသတ်ဝယ်ယူခွင့်ရှိနေပါတယ်။ သို့သော်လည်း ချဲလ်ဆီးအနေနဲ့ အသက်-၂၅ နှစ်အရွယ်ကစားသမားကို အပြီးသတ်မဝယ်ဘူးဆိုရင်တော့ သဘောတူညီချက်အရ ယူနိုက်တက်ကို ပေါင် ၅ သန်းလျော်ကြေးပေးသွားရမှာဖြစ်ပါတယ်။ 

အင်္ဂလန်သားဟာ ချဲလ်ဆီးအတွက် ပရီးမီးယားလိဂ် ၁၆ ပွဲပါဝင်ကစားထားပြီးဖြစ်ပေမယ့် ၂ ဂိုးသွင်းပြီး ဂိုးဖန်တီးမှု ၅ ကြိမ်သာပြုလုပ်ထားနိုင်ပါတယ်။ အဆိုပါဂိုးဖန်တီးမှု ၅ ကြိမ်ထဲမှ ၄ ကြိမ်ကို ဆန်ချိုဟာ ချဲလ်ဆီးအတွက် ပထမဆုံး ၃ ပွဲကစားပြီးချိန်မှာပဲ ပြုလုပ်ထားခဲ့တာဖြစ်လို့ ပြီးခဲ့တဲ့ ဇန်နဝါရီလကတည်းက သွင်းဂိုးရော၊ ဂိုးဖန်တီးမှုတွေပါ ပျောက်ဆုံးနေခဲ့တာဖြစ်ပါတယ်။ 

ဆန်ချိုရဲ့အနာဂတ်နဲ့ပတ်သက်ပြီး မေးမြန်းမှုပြုလုပ်ရာမှာ မာရက်စ်ကာက "အသင်းရဲ့ကစားသမားတိုင်းက ကျွန်တော်တို့ဘက်မှာပါပဲ။ သူတို့အားလုံးကို ချစ်ပါတယ်။ ဒါပေမယ့် လောလောဆယ်မှာတော့ ရာသီကို ပိတ်သိမ်းနိုင်ဖို့အတွက်ပဲ စဉ်းစားရမယ့်အချိန်ပါ။ နောက်ရာသီအတွက် အာရုံစိုက်လို့မရသေးပါဘူး။ ကျန်တဲ့ ၉ ပွဲအတွက် အပြည့်အဝအာရုံစိုက်ထားပါတယ်။ နွေရာသီမှာ ဘာတွေဖြစ်လာမလဲဆိုတာကတော့ စောင့်ကြည့်ကြရမှာပါ။ ကစားသမားတွေအားလုံးကို အသင်းမှာ ပျော်စေချင်ပါတယ်" လို့ဖြေကြားခဲ့ပါတယ်။ 

ဆန်ချိုကို ဘာပြောချင်သလဲလို့မေးမြန်းရာမှာလည်း အီတလီသားနည်းပြက "ရိုးရိုးသားသားပြောရမယ်ဆိုရင် ခင်ဗျားက ကျွန်တော့်ထက်ပိုပြီး ဆန်ချိုအကြောင်းသိနေသလိုပါပဲ။ ကျွန်တော့်အတွက်တော့ ဆန်ချိုရဲ့အခြေအနေက ပြောင်းလဲမှုမရှိပါဘူး။ သေချာတာကတော့ သူဒီမှာ ပိုကောင်းလာနိုင်ပါတယ်။ ဒါက ဆန်ချိုတစ်ယောက်တည်းအတွက်ပြောတာမဟုတ်ပါဘူး။ အသင်းရဲ့ကစားသမားအားလုံးအတွက်ပါ။ ကစားသမားတွေအားလုံး တူညီတဲ့အခြေအနေတွေမှာရှိနေကြပါတယ်။ ဒါကြောင့် ဆန်ချိုကို ကျွန်တော့်အနေနဲ့ ပြောစရမရှိပါဘူး။ကျွန်တော် သူနဲ့နေ့တိုင်း စကားပြောဖြစ်ပါတယ်။ သူကတော့ ရာသီကုန်အထိ အသင်းအတွက် အစွမ်းကုန်ပေးဆပ်သွားဖို့ ဆန္ဒရှိနေပြီးသားပါ" လို့ပြောကြားခဲ့ပါတယ်။ 

လာမယ့်သောကြာနေ့နံနက်မှာတော့ ချဲလ်ဆီးဟာ လန်ဒန်ဒါဘီပွဲစဉ်အဖြစ် တော့တင်ဟမ်နဲ့ ယှဉ်ပြိုင်သွားရမှာဖြစ်ပြီး အဆိုပါပွဲစဉ်အပြီး တနင်္ဂနွေနေ့မှာ ဘရန့်ဖို့ဒ်နဲ့ ကစားသွားရပါမယ်။ ပထမအကျော့က တော့တင်ဟမ်နဲ့ပွဲစဉ်မှာ သွင်းဂိုးရယူနိုင်ခဲ့တဲ့ ဆန်ချိုအနေနဲ့ ဒီတစ်ခေါက်မှာလည်း သွင်းဂိုးပြန်လည်ရရှိသွားမလား စောင့်ကြည့်ရမှာဖြစ်ပါတယ်။