အာဆင်နယ်အသင်းခေါင်းဆောင် ဘူကာယိုဆာကာက အသင်းဟာ တနင်္ဂနွေနေ့က နယူးကာဆယ်ကို ၂-၁ နဲ့အနိုင်ရခဲ့ပေမယ့် ပွဲကစားချိန်အတွင်း မမျှတဲ့ဆုံးဖြတ်ချက်တွေ ချမှတ်ခံခဲ့ရတာကြောင့် VAR အပေါ် အပြစ်တင်ဝေဖန်မှုတွေပြုလုပ်ခဲ့ပါတယ်။ 

ယခုပွဲစဉ်ရဲ့ ပထမပိုင်းအတွင်း အာဆင်နယ်တိုက်စစ်မှူး ဗစ်တာယော်ကရက်စ်ဟာ ဂိုးဧရိယာအတွင်း နယူးကာဆယ်ဂိုးသမား နစ်ခ်ပုပ်ရဲ့ဖြတ်ထုတ်မှုကြောင့် လဲကျခဲ့ပြီးနောက် ကွင်းလယ်ဒိုင်က ပင်နယ်တီသတ်မှတ်ပေးခဲ့ပေမယ့် VAR ရဲ့ဆုံးဖြတ်ချက်ကြောင့် ပြန်လည်ပယ်ဖျက်ခဲ့ပါတယ်။ 

အာဆင်နယ်အနေနဲ့ မမျှတဲ့ဆုံးဖြတ်ချက်တွေချမှတ်ခံခဲ့ရပေမယ့် ဒုတိယပိုင်းအတွင်း ကွင်းလယ်လူမီခေးလ်မီရီနို၊ နောက်ခံလူ ဂါဘရီရယ်တို့ရဲ့နောက်ကျသွင်းဂိုးတွေကြောင့် နယူးကာဆယ်ကို အနိုင်ရရှိခဲ့ပါတယ်။ ပွဲအပြီးမှာတော့ ဆာကာက ယော်ကာရက်စ်ဖြတ်ထုတ်ခံခဲ့ရတဲ့ပြစ်ဒဏ်ကျူးလွန်မှုဟာ ပင်နယ်တီအဖြစ်သတ်မှတ်ခဲ့သင့်ပေမယ့် VAR ကမမျှတတဲ့ဆုံးဖြတ်ချက်နဲ့ အမှားလုပ်ခဲ့တယ်လို့ ဝေဖန်လာခဲ့ပါတယ်။

အင်္ဂလန်လက်ရွေးစင်က "ကျွန်တော်တို့ပြောစရာ နည်းနည်းပဲရှိပါတယ်။ ဥပမာ ပင်နယ်တီရမယ့်အခြေအနေကနေ ပယ်ဖျက်ခံခဲ့ရတာမျိုးပေါ့။ ကျွန်တော့်အတွက်ဆိုရင်တော့ ဒီပြစ်ဒဏ်ကျူးလွန်မှုကို VAR ကဆုံးဖြတ်ခဲ့တယ်ဆိုပေမယ့် မှန်ကန်တယ်လို့မထင်ပါဘူး။ ကွင်းလယ်ဒိုင်အတွက်တောင် ဒီကိစ္စက အချိန်ယူပြီးဆုံးဖြတ်ခဲ့ရတာပါ။ ကျွန်တော်တို့အမြဲတမ်း ဒီလိုပဲဆန့်ကျင်ခံနေရပါတယ်။ ဒါပေမယ့် ဒီနေ့နိုင်ပွဲက အသင်းနဲ့ထိုက်တန်တယ်ဆိုတာ ကျွန်တော်တို့သက်သေပြနိုင်ခဲ့ပါတယ်။ ဘာတွေဖြစ်ခဲ့ဖြစ်ခဲ့ အသင်းနိုင်ဖို့က ပိုအရေးကြီးပါတယ်" လို့ပြောကြားခဲ့ပါတယ်။

ယခုနိုင်ပွဲကြောင့် အာဆင်နယ်ဟာ ပရီးမီးယားလိဂ်အမှတ်ပေးဇယား တတိယနေရာအထိ တက်လှမ်းလာနိုင်ခဲ့ပြီး ထိပ်ဆုံးကလီဗာပူးနဲ့ ရမှတ် ၂ မှတ်သာကွာဟတော့တာဖြစ်ပါတယ်။ လီဗာပူးဟာ စနေနေ့က ခရစ္စတယ်ပဲလေ့စ်ကို အဝေးကွင်းမှာသွားရောက်ရင်ဆိုင်ခဲ့ပြီး ဒီရာသီ ပထမဆုံးရှုံးပွဲနဲ့ စတင်ကြုံတွေ့ခဲ့ရပါတယ်။

လာမယ့် ကြာသပတေးနေ့မှာတော့ အာဆင်နယ်ဟာ ချန်ပီယံလိဂ်ပွဲစဉ်အဖြစ် အိုလံပီယာကော့စ်ကို အိမ်ကွင်း အမ်းမရိတ်စ်မှာ ဧည့်ခံကစားသွားရမှာဖြစ်ပြီး နိုင်ပွဲဆက်နေမှုကို ဆက်လက်ထိန်းသိမ်းနိုင်မလား စောင့်ကြည့်ပါတယ်။စနေနေ့မှာတော့ အာဆင်နယ်ဟာ ပရီးမီးယားလိဂ်ပွဲစဉ်အဖြစ် ဝက်စ်ဟမ်းနဲ့ဆက်လက်ယှဉ်ပြိုင်သွားရပါမယ်။