ဆော်ဒီပရိုလိဂ်ဆီ ပြောင်းရွှေ့ဖို့ ဆုံးဖြတ်ခဲ့တဲ့ နေမာရဲ့ အမိုက်စားမော်ဒယ်လ်မြင့်ကားသစ်ကြီးတွေကို အခုသီတင်းပတ်မှာ ဖော်ပြပေးချင်ပါတယ်။

ဘရာဇီးကြယ်ပွင့်က အသစ်စက်စက် Aston Martin နဲ့ Lamborghini ကားသစ်ကြီးတွေကို ပေါင်တစ်သန်းကျော် တန်ကြေးရှိတဲ့ သူ့ကိုယ်ပိုင်မော်တော်ကားစာရင်းမှာ ထပ်မံထည့်သွင်းခဲ့ပါတယ်။ ဆော်ဒီပရိုလိဂ်ဆီပြောင်းရွှေ့တော့မယ်လို့ အခုသီတင်းပတ်အတွင်းမှာပဲ ကြေညာခဲ့ပြီးနောက် အရှေ့အလယ်ပိုင်းဆီ ရောက်ရှိလာတော့မယ့် နေမာရဲ့ ရင်သပ်ရှုမောဖွယ်ရာ အကောင်းစားမော်တော်ကားရှစ်စီးကို အာရပ်ရပ်ဝန်းမှာ မြင်တွေ့ရပါတော့မယ်။

Bentley Continental GT
---------------------------
လွန်ခဲ့တဲ့နှစ်ပေါင်း ၁၀၀ ကျော်လောက်ကတည်းက Bentley ဆိုတာ ကြွယ်ဝချမ်းသာမှုတို့ရဲ့ပြယုဂ်တစ်ခု ဖြစ်ခဲ့တာကြောင့် ဒီလိုမော်တော်ကားမျိုး နေမာပိုင်ဆိုင်ထားတာ အံ့သြစရာတော့ မရှိပါဘူး။ နေမာ ပိုင်ဆိုင်တဲ့မော်တော်ကားရဲ့ မော်ဒယ်လ်ကို အတိအကျမသိရသေးပေမယ့် နောက်ဆုံးပေါ် Continental GT တစ်စီးကိုပင် ကာလပေါက်ဈေး ပေါင် ၂၃၀,၀၀၀ တန်ကြေး ရှိပါတယ်။

Bentley မော်တော်ကားတွေရဲ့ထုံးစံအတိုင်း အတွင်းပိုင်းတွေကို သားရေတွေအသုံးပြုကာ ကျယ်ကျယ်ဝန်းဝန်း တည်ဆောက်ထားပြီး စတိုင်ကျလှပမှုကို အလေးပေးဖော်ပြနေပါတယ်။ ဒါပေမယ့် ၂၀၂၁ ခုနှစ်ထုတ် GT Speed မော်တော်ကားတွေရဲ့ဒီဇိုင်းပိုင်းတွေက Sport type ပုံစံမျိုးနဲ့ ပိုနီးစပ်နေပြီး စွမ်းဆောင်ရည်ပိုင်းကို ကြည့်မယ်ဆိုရင်တော့ ကောင်းမွန်လွန်းတဲ့ W 12 အင်ဂျင်တွေက နာမည်ကြီးတံဆိပ်ဆိုတဲ့အတိုင်း မြန်နှုန်းမြင့်အရှိန်နှုန်းကို ပေးစွမ်းနိုင်ပါတယ်။

မြင်းကောင်ရေ ၆၅၀ အားရှိတဲ့ ဒီမော်တော်ကားအမျိုးအစားဟာ အမြင့်ဆုံးမြန်နှုန်း တစ်နာရီလျှင် ၂၀၈ မိုင်အထိ စွမ်းဆောင်ရည်ရှိပါတယ်။

Aston Martin DBX
---------------------
နေမာလိုမျိုးစွမ်းဆောင်ရည်ကောင်းတွေကို လိုချင်တယ်ဆိုရင် DBX ထက် အခြားရွေးချယ်စရာ ရှိမှာမဟုတ်ပါဘူး။ ချောမွတ်တောက်ပြောင်နေသလို အရွယ်အစားမကြီးလွန်း၊ မသေးလွန်းတဲ့ SUV အမျိုးအစားမော်တော်ကားက Bentley ထက်ကို ပိုမိုမြန်ဆန်ပြီး V8 အင်ဂျင်တွေရဲ့ကျေးဇူးနဲ့ ၃ ဒဿမ ၃ စက္ကန့်အတွင်းမှာပဲ မိုင် ၆၀ အထိ ရုန်းအား ရှိနေပါတယ်။

၂၀၂၃ ခုနှစ်၊ သြဂုတ်လအတွင်းမှာပဲ ပီအက်စ်ဂျီတိုက်စစ်မှူးရဲ့ ပိုင်ဆိုင်မှုစာရင်းထဲမှာ တစ်စီးတည်းသော ဗြိတိန်ထုတ်မော်တော်ကားအဖြစ် ပါဝင်လာခဲ့တာပါ။

Lamborghini Huracan
-------------------------
Bentley တို့၊ Aston တို့လို အရမ်းကြီး မထည်ဝါနေပေမယ့် အရှိန်အဟုန်ကိုသုံးပြီး မြန်နှုန်းမြင့် မောင်းနှင်ရာမှာ အထူးသင့်လျော်တဲ့ မော်တော်ကားမျိုးဖြစ်ပါတယ်။ အပေါ်မှာ ဖော်ပြထားခဲ့တဲ့ ကားတွေထက် တစ်တန်လောက်ပိုမိုပေါ့ပါးပေမယ့် Sport Type V 10 အင်ဂျင်အမျိုးအစားတွေကြောင့် Lamborghini က မုန်တိုင်းတစ်ခုကိုပင် ဖြတ်ကျော်သွားနိုင်တဲ့ အရည်အချင်းတွေ ပိုင်ဆိုင်ထားပါတယ်။

၃ ဒဿမ ၁ စက္ကန့်အတွင်းမှာပဲ မိုင် ၆၀ အထိ ရုန်းအားရှိသလို အမြင့်ဆုံးမြန်နှုန်းမိုင် ၂၀၀ ကျော်အထိ စွမ်းဆောင်ရည်ရှိတဲ့ ဒီကားအမျိုးအစားကို Lamborghini ရဲ့ထူးခြားတဲ့ဒီဇိုင်းနဲ့အတူ wizardry နည်းပညာတွေနဲ့ ပေါင်းစပ်ထုတ်လုပ်ထားတာကြောင့် သန့်ရှင်းသပ်ရပ်လှပတဲ့ ပြိုင်ကားအမျိုးအစားတစ်ခုအဖြစ် မြင်တွေ့ရပါလိမ့်မယ်။

Mercedes G Wagon
------------------------
မကြာသေးမီနှစ်များအတွင်း ကမ္ဘာ့အနှံ့အပြားရှိ နာမည်ကြီးပုဂ္ဂိုလ်တွေရဲ့ စိတ်နှလုံးကို ဆွဲဆောင်နိုင်ခဲ့တဲ့ ဒီကားအမျိုးအစားကို နေမာက ပင်လယ်ကွေ့ဒေသဆီ ရွှေ့ပြောင်းရာမှာ အသုံးပြုခဲ့တယ်လို့ သိရပါတယ်။

Aston လိုပဲ ဇိမ်ခံ SUV အမျိုးအစားမော်တော်ကားဖြစ်ပေမယ့် သူ့ရဲ့ခက်ထန်တဲ့ ပုံပန်းသွင်ပြင်ကြောင့် ပိုမို လူသိများထင်ရှားပါတယ်။ G Wagon တွေကို ခေတ်သစ်ဇိမ်ခံကားတွေလိုမဟုတ်ပဲ ကားဘော်ဒီမှာပဲ ဖရိန်တွေကို တပ်ဆင်ထားတဲ့အချက်ဟာ ထူးခြားလှပါတယ်။ ဒီကားအမျိုးအစားက ဗြိတိန်ထုတ် Jeep တွေလိုပဲ စီးပွားဖြစ်စတင်မရောင်းချမီ စစ်ဘက်ရေးရာတွေမှာ အသုံးပြုဖို့ ထုတ်လုပ်ခဲ့တာပါ။ ဒါကြောင့် Aston လောက် မြန်နှုန်းမြင့်မားဖို့ မရှိပေမယ့် နေမာသွားချင်တဲ့နေရာတိုင်းကိုတော့ ပို့ဆောင်ပေးနိုင်စွမ်းရှိပါတယ်။

Mercedes Van
-----------------
ဒါနဲ့ပတ်သက်လို့ အသေးစိတ်မသိရှိရသေးမယ့် နေမာက Mercedes Van တစ်စီးကို ယာဉ်မောင်းတစ်ဦးနဲ့အတူ အချိန်ပြည့်ထားရှိပေးဖို့ အယ်လ်ဟီလယ်အသင်းပိုင်ရှင်တွေဆီ တောင်းဆိုခဲ့ဟန် ရှိပါတယ်။ ဒီမော်တော်ကားကို ကြယ်ပွင့်တိုက်စစ်မှူးက သူ့ရဲ့မိသားစုနဲ့ သူငယ်ချင်းတွေ ရာသီကုန်ကာလမှာ လာရောက်လည်ပတ်ရင် ပို့ဆောင်ပေးဖို့ အသုံးပြုသွားပါလိမ့်မယ်။

အပြောင်းအရွှေ့သဘောတူညီမှုရဲ့အစိတ်အပိုင်းအဖြစ် ဒီယဉ်မောင်းဟာ နေမာရဲ့ဆန္ဒအတိုင်း ပို့ဆောင်ပေးဖို့ တစ်နှစ်ပတ်လုံး စက္ကန့်မလပ် အသင့်ရှိနေရပါလိမ့်မယ်။

Ferrari 458 Italia
--------------------
မြန်နှုန်းမြင့်ဘောလုံးအားကစားသမားဖြစ်တဲ့ နေမာမှာ အီတလီထုတ် Ferrari တစ်စီးပိုင်ဆိုင်ထားတာ အံ့သြစရာတော့ မရှိပါဘူး။ ပေါင် ၁၆၀,၀၀၀ ဝန်းကျင် တန်ကြေးရှိ ဒီမော်တော်ကားအမျိုးအစားက ထိပ်တန်းစူပါမော်တော်ကားအမျိုးအစား ဖြစ်ပါတယ်။ ဒါ့အပြင် Ferrari 458 Italia ကားအမျိုးအစားကို အိုဇေးလ်၊ ဆာဟာနဲ့ မာလော့တယ်လီတို့လည်း ဝယ်ယူစီးနင်းခဲ့ဖူးပါတယ်။


Maserati MC 12
-------------------
၂၀၀၄ ခုနှစ်မှ ၂၀၀၅ ခုနှစ်အတွင်း အစီးရေ ၅၀ သာ ထုတ်လုပ်ခဲ့တာကြောင့် ဒီကားအမျိုးအစားကို မြင်တွေ့ရဖို့ အလွန်ခက်ခဲပါတယ်။ Maserati MC 12 ပြိုင်ကားအမျိုးအစားဟာ ပေါင် ၄၁၅,၀၀၀ အထိတန်ကြေးရှိတယ်လို့ သိရပါတယ်။ နေမာမှာ ဒီလိုမော်တော်ကားအမျိုးအစားကို ပိုင်ဆိုင်ထားတယ်ဆိုတာ သိရပေမယ့် ဘယ်လိုဝယ်ယူရရှိခဲ့သလဲဆိုတာတော့ မသိရပါဘူး။

Audi မော်တော်ကားများစွာ
----------------------------
နေမာက သူ့ရဲ့အသင်းဟောင်းဖြစ်တဲ့ ဘာစီလိုနာကို စပွန်ဆာပေးခဲ့တဲ့ Audi ကုမ္ပဏီထုတ် မော်တော်ကားတွေကိုလည်း ပိုင်ဆိုင်ထားပါတယ်။ ခရီးစဉ်တစ်ခုကို ကြော့ကြော့မော့မော့ထွက်ခွာရမယ်ဆိုရင် နေမာက ပေါင် ၁၂၀,၀၀၀ ဝန်းကျင် တန်ကြေးရှိ Audi R8 Spyder ကို မောင်းနှင်လေ့ရှိပါတယ်။

ဒီနေရာမှာ မြင်းကောင်ရေ ၆၅၀ ရှိတဲ့ RS 7 ကလည်း အထင်ကြီးစရာကောင်းသလို ပေါင် ၁၂၀,၀၀၀ ဝန်းကျင် တန်ကြေးရှိပါတယ်။ သက်သောင့်သက်သာမောင်းနှင်လိုတဲ့အချိန်မှာပဲဖြစ်ဖြစ်၊ လေ့ကျင့်ရေးကွင်းတွေဆီ သွားတဲ့ခရီးမျိုးမှာပဲဖြစ်ဖြစ် နေမာကို Audi Q7 ပေါ်မှာ မြင်တွေ့ရလေ့ရှိပါတယ်။ ဒီကားအမျိုးအစားကတော့ ပေါင် ၅၀,၀၀၀ ဝန်းကျင် တန်ကြေးရှိပါတယ်။

Porsche Panamera Turbo
------------------------------
နေမာပိုင်ဆိုင်တဲ့ နောက်ထပ်မြန်နှုန်းမြင့်မော်တော်ကားတစ်စီးကတော့ Panamera Turbo ပဲဖြစ်ပါတယ်။ ၃ ဒဿမ ၁ စက္ကန့်အတွင်း မိုင် ၆၀ အထိ ရုန်းအားရှိတာကြောင့် ဘရာဇီးကြယ်ပွင့်ရဲ့ Lamborghini မော်တော်ကားလိုမျိုး မြန်နှုန်းမြင့်စွမ်းဆောင်ရည် ရှိပါတယ်။ ဒါပေမယ့် ကားရဲ့ရှေ့ပိုင်းမှာ အင်ဂျင်ခန်းကို ထားရှိမှုက Lamborghini မော်တော်ကားနဲ့တော့ အသွင်အပြင် အနည်းငယ် ကွာခြားနေပါလိ့မ်မယ်။

VW Touareg
---------------
ဘောလုံးကွင်းထဲမှာ ထက်ထက်မြက်မြက်ယှဉ်ပြိုင်ကစားလေ့ရှိတဲ့ နေမာက မော်တော်ကားကို သက်သောင့်သက်သာမောင်းနှင်ရတာမျိုး ကြိုက်နှစ်သက်ပါတယ်။ ဘာစီလိုနာကြယ်ပွင့်ဟောင်းက သွင်းဂိုးမှော်ဆရာတစ်ဦးအသွင်နဲ့ လိုက်ဖက်ညီတဲ့ Volkswagen ရဲ့ ဂန္တဝင်မြောက် Touareg မော်တော်ကားကို သဘောကျသူဖြစ်ပါတယ်။ ဒီကားအမျိုးအစားကို အနည်းဆုံးပေါင် ၄၄,၀၀၀ ဝန်းကျင်မှ စတင်ရောင်းချလို့ နေမာပိုင်ဆိုင်ထားတဲ့ မော်တော်ကားတွေထဲမှာ ဈေးအသက်သာဆုံးဖြစ်ပါတယ်။