အာဆင်နယ်နည်းပြ မီကယ်အာတီတာက ဘရန့်ဖို့ဒ်နဲ့ပွဲမှာ အနိုင်ဂိုးသွင်းယူသွားခဲ့တဲ့ ကိုင်ဟားဗက်ဇ်ကို အထူးချီးကျူးမှုတွေ ပြုလုပ်သွားခဲ့ပါတယ်။ဂန်းနားတွေဟာ ရမ်းစ်ဒေးရဲ့ အမှားကြောင့် ဘရန့်ဖို့ဒ်တို့ ချေပဂိုးရသွားပြီးတဲ့နောက် ဦးဆောင်ဂိုးရဖို့ ရုန်းကန်ခဲ့ရပေမယ့် ဟားဗက်ဇ်ရဲ့ နောက်ကျအနိုင်ဂိုးကြောင့် ဇယားထိပ်ကို တက်လှမ်းလာနိုင်ခဲ့ပါတယ်။

ပွဲအပြီးမှာ အာတီတာက "ကျွန်တော် အရမ်းပျော်ပါတယ်။ သူ အခုလို ပရိသတ်အချစ်တော်ကစားသမားဖြစ်လာပြီး တစ်ကွင်းလုံးက သူ့အကြောင်း သီချင်းလုပ်မယ်ဆိုတာ ပထမ နှစ်လ၊ သုံးလက လာပြောရင် ကျွန်တော်လည်း ယုံချင်မှာမဟုတ်ပါဘူး။ဒါက လူကောင်းတွေအပေါ်မှာပဲ သက်ရောက်ပါတယ်။

သူက သူများနဲ့မတူတဲ့ ကစားသမားတစ်ယောက်ပါ။ သူ အခုလို ဂိုးတွေစသွင်းလာနိုင်ရင် အခြားကစားသမားတွေလည်း ပိုပြီးချိတ်ဆက်ကစားလာပါလိမ့်မယ်။သူတို့အားလုံး ဟားဗက်ဇ်ရဲ့ လုပ်အားနှုန်း၊ အသင်းအတွက် ပါဝင်ပတ်သက်မှု၊ အသိဉာဏ်တို့ကို မြင်တွေ့ခဲ့ကြပါတယ်။ ဒါကြောင့် သူ့ကို မချစ်တဲ့သူဆိုတာ မရှိပါဘူး။"လို့ ပြောခဲ့ပါတယ်။