The network connection is lost.

Banner Image

တော့တင်ဟမ်ပရိသတ်တွေကိုယ်တိုင် ယုံကြည်မှုပျောက်ဆုံးနေတယ်လို့ ဝန်ခံလိုက်တဲ့ ပိုစတီကိုဂလူ

ပြည်တွင်းပြိုင်ပွဲတွေမှာ တော့တင်ဟမ်အသင်း ရုန်းကန်နေရချိန် နည်းပြပိုစတီကိုဂလူက သူနဲ့ သူ့ရဲ့နည်းစနစ်တွေကို တော့တင်ဟမ်ပရိသတ်အများစု ယုံကြည်မှုကင်းမဲ့နေတယ်လို့ ဝန်ခံပြောဆိုလိုက်ပါတယ်။ တော့တင်ဟမ်က အခုဘောလုံးရာသီမှာ ပြည်တွင်းရှုံးထွက်ဖလားပြိုင်ပွဲနှစ်ရပ်မှ ထွက်ခွာခဲ့ရပြီး ပရီးမီးယားလိဂ်အမှတ်ပေးဇယားအဆင့်-၁၄ နေရာမှာ ရပ်တည်နေသလို မကြုံစဖူးဒဏ်ရာပြဿနာများစွာနဲ့ ရင်ဆိုင်ခဲ့ရပါတယ်။မည်သို့ပင်ဆိုစေကာမူ အခုဘောလုံးရာသီ၊နောက်ဆုံးမျှော်လင့်ချက်အဖြစ် ယူရိုပါလိဂ်ပြိုင်ပွဲကျန်ရှိနေသေးပေမယ့် အသင်းအပေါ်ထားရှိတဲ့ယုံကြည်မှုကို ထိန်းသိမ်းနိုင်ဖို့ တော့တင်ဟမ်ပရိသတ်အများစု ရုန်းကန်နေရတယ်လို့ ပိုစတီကိုဂလူက ဝန်ခံခဲ့ပါတယ်။

တော့တင်ဟမ်က ယူရိုပါလိဂ်ကွာတားဖိုင်နယ်အဆင့်မှာ ဖရန့်ဖတ်နဲ့ ထိပ်တိုက်ရင်ဆိုင်နေရပြီး သြစတြေးလျသားအနေဖြင့် သူ့ရဲ့ရာထူးကို မဆုံးရှုံးစေချင်ရင် ဒီပြိုင်ပွဲမှာ ရှေ့ဆက်သွားနိုင်ဖို့ မဖြစ်မနေလိုအပ်နေတယ်လို့ ယုံကြည်ရပါတယ်။တော့တင်ဟမ်အသင်းဘက်ကလည်း နွေရာသီကာလမှာ ပိုစတီကိုဂလူကို ရာထူးမှထုတ်ပယ်မယ်ဆိုရင် နည်းပြသစ်အဖြစ် ဘုန်းမောက်ရဲ့အာရီယိုလာကို ခေါ်ယူသွားဖို့ ချိတ်ဆက်မှုတွေ ရှိနေပါတယ်။

Optus Sport သတင်းဌာနနဲ့တွေ့ဆုံချိန် ပိုစတီကိုဂလူက “လူတွေအတွက်ဘယ်လိုခံစားချက်မျိုးရှိသင့်လဲဆိုတာ ခဏခဏပြောနေရတာကို ကျွန်တော်မကြိုက်ဘူးလို့ အမြဲပြောခဲ့ပြီးပါပြီ။ တော့တင်ဟမ်ပရိသတ်အများစုက အခုကျွန်တော်တို့လုပ်နေတဲ့အရာတွေအပေါ် ယုံကြည်ချက်ပျောက်ဆုံးနေတယ်ဆိုတာ သံသယမရှိလိုက်ပါနဲ့။

ပြီးခဲ့တဲ့နှစ်မှာ သူတို့တွေ့မြင်ခဲ့တဲ့အရာက သူတို့ကို အားတက်စေခဲ့တယ်လို့ ကျွန်တော်ထင်ပါတယ်။ အဲ့ဒါမျိုးဆိုတာ အလိုလိုမထွက်ပေါ်လာပါဘူး။ကျွန်တော်ကတော့ လက်ရှိရရှိထားတဲ့လူစာရင်းပိုင်းနဲ့ပတ်သက်လို့ အကောင်းမြင်မှုအပြည့်၊ ယုံကြည်မှုအပြည့် ရှိပါတယ်။ ခက်ခဲကြမ်းတမ်းတဲ့ကာလတစ်ခုကို ဖြတ်သန်းနိုင်လာတာနဲ့အမျှ ကစားသမားတွေထဲမှာ ကြီးမားတဲ့တိုးတက်မှုတွေ ရှိလာပါလိမ့်မယ်။ ခက်ခဲကြမ်းတမ်းတဲ့ကာလတွေအတွင်း ရှင်သန်ရပ်တည်နိုင်မှုက ခိုင်မာတဲ့စည်းလုံးညီညွှတ်မှုတစ်ခုကို ဖြစ်တည်စေနိုင်ပါတယ်။

ဘာကြောင့်လဲဆိုတော့ ကျွန်တော်တို့ ဖြတ်သန်းခဲ့ရတဲ့လမ်းလောက် ဆိုးရွားတာမျိုး ဘာမှမရှိနိုင်ဘူးလို့ ယူဆမိနေလို့ပဲဖြစ်ပါတယ်။ ကျွန်တော်တို့ အတူတကွဖြတ်သန်းပြီး ရှင်သန်လွတ်မြောက်လာခဲ့ပါပြီ။ အဲ့ဒါရဲ့တစိတ်တပိုင်းအဖြစ် လူတွေက စိတ်ပျက်စရာရလဒ်တွေမှတပါး ကျွန်တော်ကိုယ်တိုင်စိတ်လှုပ်ရှားနေရတဲ့ အသင်းလူစာရင်းတစ်ခုကို မြင်တွေ့သွားရပါလိမ့်မယ်။

သူတို့ကို မျှော်လင့်ချက်တွေ ဖန်တီးပေးခြင်းကသာ သူတို့ကိုလွှမ်းမိုးနိုင်မယ့် အကောင်းဆုံးနည်းလမ်းလို့ ထင်ပါတယ်။ ဥရောပအဆင့်မှာကစားရဖို့ ရှိနေသေးပြီး ဘောလုံးရာသီကို အပေါင်းလက္ခဏာဆောင်တဲ့ အဆုံးသတ်မျိုးဖြစ်လာအောင် ကြိုးစားသွားဖို့ လိုအပ်ပါတယ်”လို့ ပြောပါတယ်။

တော့တင်ဟမ်က ကြာသပတေးနေ့၊ စတမ်းဖို့ဒ်ဘရစ်ချ်မှာ ချဲလ်ဆီးနဲ့ရင်ဆိုင်ပြီးနောက် သီတင်းပတ်ကုန်မှာ ဆောက်သမ်တန်နဲ့ ထပ်မံရင်ဆိုင်ရပါမယ်။ အဲ့ဒီပွဲစဉ်တွေအပြီး ဖရန့်ဖတ်နဲ့ ယူရိုပါလိဂ်ကွာတားဖိုင်နယ်ပထမအကျော့ကို ဆင်နွှဲရပါမယ်။