ပိုပြီးသန်မာတဲ့သူအဖြစ် ပြန်လာမယ်လို့ ကြုံးဝါးလိုက်တဲ့ အယ်လ်နာဆာစတား ရော်နယ်ဒို
အယ်လ်နာဆာတိုက်စစ်မှူး ရော်နယ်ဒိုက ဒီရာသီဆုဖလားနဲ့ လွဲချော်ခဲ့ပေမယ့် ပိုပြီးသန်မာတဲ့သူအဖြစ် ပြန်လာမယ်လို့ ကြုံးဝါးလိုက်ပါတယ်။
ပေါ်တူဂီသားဟာ အသက် ၃၉ နှစ်အရွယ်မှာပဲ သမိုင်းမှတ်တိုင်တွေ ဆက်လက်စိုက်ထူနေပြီး ဆော်ဒီလိဂ်မှာ တစ်ရာသီအတွင်း ဂိုးအများဆုံး သွင်းယူနိုင်တဲ့သူဖြစ်လာခဲ့သလို မတူညီတဲ့တိုင်းပြည် ၄ ခုမှာ ရွှေဖိနပ်ဆုရယူနိုင်တဲ့ ပထမဆုံးကစားသမားလည်းဖြစ်လာခဲ့ပါတယ်။
King Cup ပြိုင်ပွဲမှာ အယ်လ်-ဟီလယ်ကို ပင်နယ်တီအဆုံးအဖြတ်နဲ့ အရေးနိမ့်ခဲ့ပြီးနောက် ရော်နယ်ဒိုတစ်ယောက် မျက်ရည်တွေနဲ့နှုတ်ဆက်ခဲ့ရတာ ဖြစ်ပါတယ်။ ဒါပေမယ့်လည်း အခုချိန်မှာတော့ ပေါ်တူဂီသားက လာမယ့်ရာသီသစ်မှာ အခုထက်ပိုကောင်းတဲ့သူအဖြစ် ပြန်လာမယ်လို့ အခိုင်အမာပြောကြားလိုက်ပါတယ်။
ပြိုင်ဘက်တွေကို သတိပေးတဲ့အနေနဲ့ ရော်နယ်ဒိုက အခုလိုမျိုး ပြောကြားခဲ့တာဖြစ်ပြီး လူမှုမီဒီယာမှာ အခုလိုမျိုးတင်ခဲ့ပါတယ်။ “ကစားပါ။ သင်ယူပါ။ ကြီးပြင်းပါ။ နောက်တစ်ကြိမ်ထပ်လုပ်ပါ။ ဒီရာသီအားပေးမှုတွေအတွက် ကျေးဇူးတင်ပါတယ်။ လာမယ့်ရာသီပိုကောင်းတဲ့သူအဖြစ် ပြန်လာပါမယ်”လို့ ရော်နယ်ဒိုက တင်ခဲ့ပါတယ်။
ရော်နယ်ဒိုနဲ့ အယ်လ်နာဆာတို့ကြား စာချုပ်သက်တမ်း ၁ နှစ်သာ ကျန်တော့တာဖြစ်ပြီး စိန်ခေါ်မှုတွေကနေ ဘယ်တော့မှ ထွက်ခွာသွားလေ့မရှိတာဖြစ်ပါတယ်။ အထူးသဖြင့် ပြိုင်ဘက် မက်ဆီက မေဂျာလိဂ်မှာ အင်တာမိုင်ယာမီနဲ့အတူ အောင်မြင်မှု ရယူနိုင်ဖို့ လုပ်ဆောင်ချိန်မှာ ရော်နယ်ဒိုကလည်း ဆက်လက်ကြိုးစားနေဆဲဖြစ်ပါတယ်။
