ပြီးပြည့်စုံတဲ့ ဘောလုံးရာသီတစ်ခု ဖြစ်လာဖို့ အီဆက်ခ်အတွက် ဘာတွေလိုအပ်မလဲဆိုတာ ရှင်းပြလိုက်တဲ့ အီရာအိုလာ
လီဗာပူးအသင်းနည်းပြအန်ဒိုနီအီရာအိုလာက ၂၀၂၆-၂၀၂၇ ပရီးမီးယားလိဂ်ဘောလုံးရာသီသစ်မစတင်မီ အီဆက်ခ်အတွက် စိန်ခေါ်မှုသစ်တစ်ခု ချမှတ်လိုက်ပါတယ်။
အီဆက်ခ်က ပြီးခဲ့တဲ့နွေရာသီကာလအတွင်း နယူးကာဆယ်မှ လီဗာပူးဆီ ပရီးမီးယားလိဂ်စံချိန်တင်ပြောင်းရွှေ့ကြေး ပေါင် ၁၂၅ သန်းဖြင့် ရောက်ရှိလာပါတယ်။ ဒီကလပ်အသင်းနှစ်ခုကတော့ ဒီည၊ စိန့်ဂျိမ်းစ်ပတ်ခ်မှာ ရာသီအဖွင့်ပွဲစဉ်အဖြစ် ထိပ်တိုက်ရင်ဆိုင်သွားရပါမယ်။
ဆွီဒင်ကြယ်ပွင့်က နည်းပြဟောင်းအန်းစလော့လက်အောက် အန်ဖီးလ်မှာ ဖြတ်သန်းခဲ့တဲ့ ပထမဆုံးဘောလုံးရာသီအတွင်း ဒဏ်ရာတွေနဲ့အတူ ရုန်းကန်ခဲ့ရပြီး တိုင်နီဆိုဒ်မြေဆီ ပြန်လည်ရောက်ရှိလာချိန် ရန်လိုတဲ့ကြိုဆိုမှုမျိုးနဲ့ ရင်ဆိုင်ရနိုင်ပါတယ်။
ကမ္ဘာ့ဖလားပြိုင်ပွဲဝင် အသက် ၂၆ နှစ်အရွယ်တိုက်စစ်မှူးက အခုလအတွင်း ကလပ်အသင်းနဲ့ ပြန်လည်ပူးပေါင်းလာပြီး ရာသီကြိုခြေစမ်းပွဲစဉ်တွေမှာ ပါဝင်ကစားကာ အီရာအိုလာကို အထင်ကြီးစေခဲ့ပါတယ်။
ဆိုစီဒက်တိုက်စစ်မှူးဟောင်းက နယူးကာဆယ်အတွက် ၈၆ ပွဲကစားရာမှာ ၅၄ ဂိုးအထိ သွင်းယူပေးခဲ့ပြီး စိန့်ဂျိမ်းစ်ပတ်ခ်ကွင်းဆီ ပြန်လည်ရောက်ရှိချိန် ဖိအားတွေ ကြုံတွေ့ရနိုင်ပါတယ်။ ဒါပေမဲ့ အီရာအိုအာလကတော့ အီဆက်ခ်သာ ကြံ့ခိုင်မှုပြည့်၀နေမယ်ဆိုရင် လီဗာပူးအသင်းမှာ တိုက်စစ်မှူးရဲ့အကောင်းဆုံးပုံစံကို မြင်တွေ့ရလိမ့်မယ်လို့ ယုံကြည်နေပါတယ်။
"ဒါက အီဆက်ခ်အတွက် အရေးကြီးတဲ့ ဘောလုံးရာသီတစ်ခု ဖြစ်ပါတယ်။ ဒါက အချက်နှစ်ခုအပေါ် မူတည်တယ်ဆိုတာ သူ သိပါတယ်။ ပထမတစ်ခုက အသင်းမှာ ပါဝင်ကစားနိုင်ဖို့ဖြစ်ပြီး ပထမအချက် မရှိဘဲနဲ့တော့ ဒုတိယအချက်ဖြစ်တဲ့ သူ့ရဲ့ကစားနိုင်စွမ်းရလဒ်ကို ကျွန်တော်တို့ မရရှိနိုင်ပါဘူး။
ဒါက ကျွန်တော်တို့အတွက် ပထမဆုံးပစ်မှတ်ဖြစ်ပြီး သူပါဝင်ကစားနိုင်တဲ့ အနေအထားကောင်းတစ်ခုမှာ ထိန်းထားပေးရပါမယ်။ အကယ်၍ ကျွန်တော်တို့ ဒါကို လုပ်ဆောင်နိုင်မယ်ဆိုရင် သူ ကောင်းကောင်းစွမ်းဆောင်နိုင်လိမ့်မယ်လို့ သေချာပါတယ်၊ ဘာဖြစ်လို့လဲဆိုတော့ သူက ရာသီကြိုပွဲစဉ်တွေမှာ တကယ့်ကို ကောင်းမွန်ခဲ့လို့ပါပဲ။
ကျွန်တော်တို့ သူ့ကို အဆင့်အတန်းကောင်းတစ်ခုမှာ ထိန်းသိမ်းထားနိုင်မယ်ဆိုရင် သူက ဂိုးတွေသွင်းယူနိုင်ပြီး ပြိုင်ဘက်တွေအတွက် ခြိမ်းခြောက်မှု ဖြစ်လာပါလိမ့်မယ်။ သူ့ရဲ့ အရည်အသွေးအပေါ် ကျွန်တော့်မှာ သံသယဖြစ်စရာ မရှိပါဘူး။
သူက ဘောလုံးလက်ခံရယူရာမှာ နည်းစနစ်ပိုင်းအရ အလွန်သေသပ်သလို နေရာလွတ်တွေမှတဆင့် တိုက်စစ်ဆင်ရာမှာလည်း အလွန်ကောင်းမွန်ပါတယ်။ ဒါကြောင့် တကယ့်ကိုထူးခြားတဲ့ No.9 တိုက်စစ်မှူးတစ်ဦး ဖြစ်ပါတယ်" လို့ လီဗာပူးနည်းပြက ဆိုပါတယ်။
