ကရင်မ် အာဒီယာမီဟာ ဒီနွေရာသီမှာ ဒေါ့မွန်အသင်းကနေ ထွက်ခွာပြီး ဘာစီလိုနာအသင်းဆီ ပြောင်းရွှေ့ဖို့ အဆင်သင့်ဖြစ်နေပါပြီ။

ဂျာမနီလက်ရွေးစင်အသင်းရဲ့ ကမ္ဘာ့ဖလားလူစာရင်းမှာ ရွေးချယ်မခံခဲ့ရတဲ့ အာဒီယာမီဟာ အသင်းရဲ့ တိုက်စစ်ပိုင်းကို အဆင့်မြှင့်တင်နေတဲ့ စပိန်ထိပ်သီးကလပ်ဆီ ပြောင်းရွှေ့တော့မှာ ဖြစ်ပါတယ်။

အံ့ဩစရာကောင်းတာက အာဒီယာမီဟာ ဒေါ့မွန်အသင်းမှာ သူ့ရဲ့ အခန်းကဏ္ဍက လျော့နည်းလာခဲ့ပြီး ရာသီဝက်နောက်ပိုင်းမှာ ပွဲထွက်ခွင့် ကျဲပါးလာခဲ့တာကြောင့် ကမ္ဘာ့ဖလားလူစာရင်းကနေ ချန်လှပ်ခံခဲ့ရတာပါ။

အပြောင်းအရွှေ့ ကျွမ်းကျင်သူ ဖာဘရီဇီယို ရိုမာနိုကတော့ နယူးကာဆယ်က အန်တိုနီ ဂေါ်ဒွန်ကို ခေါ်ယူပြီးနောက် ဘာစီလိုနာက ဒုတိယမြောက် တောင်ပံကစားသမားတစ်ဦး ထပ်မံခေါ်ယူဖို့ ကြိုးစားနေချိန်မှာ အပြောင်းအရွှေ့ကိစ္စတွေ ဆက်လက်လုပ်ဆောင်နေကြောင်း ကြာသပတေးနေ့ မနက်ပိုင်းမှာ သတင်းထုတ်ပြန်ခဲ့ပါတယ်။

"သတင်းထူး - ကရင်မ် အာဒီယာမီက ဘာစီလိုနာနဲ့ သဘောတူညီမှု ရရှိသွားပြီး ဘာကာကိုပဲ ပြောင်းချင်တယ်လို့ ဒေါ့မွန်ကို အသိပေးလိုက်ပါပြီ။ အာဒီယာမီဟာ ၂၀၂၇ ဇွန်လမှာ စာချုပ်သက်တမ်းကုန်ဆုံးမှာဖြစ်ပြီး စာချုပ်သစ်ချုပ်ဖို့ အစီအစဉ်မရှိပါဘူး။ ဘာစီလိုနာက အာဒီယာမီကို အခုပဲ ခေါ်ယူနိုင်ဖို့ ဒေါ့မွန်ဆီ တရားဝင် ကမ်းလှမ်းချက် ပို့ထားပြီး အမြန်ဆုံး အပြီးသတ်နိုင်ဖို့ ကြိုးစားနေပါတယ်" လို့ သူက ဆိုပါတယ်။

စိတ်ဝင်စားစရာကောင်းတာက ဘာစီလိုနာနည်းပြ ဟန်ဆီ ဖလစ်ဟာ ၂၀၂၁ ခုနှစ်မှာ အသက် ၂၄ နှစ်အရွယ် အာဒီယာမီကို ဂျာမနီလက်ရွေးစင်အသင်းမှာ ပထမဆုံး ပွဲထွက်ကစားခွင့် ပေးခဲ့သူဖြစ်သလို ၂၀၂၂ ကမ္ဘာ့ဖလားမှာလည်း ခေါ်ဆောင်သွားခဲ့သူပါ။ ဖလစ်က အာဒီယာမီကို အလွန်သဘောကျသူလို့ သိရပြီး ဒီနွေရာသီ အပြောင်းအရွှေ့ ဖြစ်မြောက်လာဖို့အတွက် သူက အဓိကတွန်းအားပေးသူ ဖြစ်တယ်ဆိုတာ သံသယဖြစ်စရာ မရှိပါဘူး။

အာဒီယာမီအပြင် ဘာစီလိုနာဟာ အက်သလက်တီကို မက်ဒရစ်က ဂျူလီယန် အယ်လ်ဗာရက်ဇ်ကိုလည်း ဆက်လက် လိုက်လံကမ်းလှမ်းနေပြီး အဲဒီအပြောင်းအရွှေ့ကိုလည်း လက်လျှော့မှာမဟုတ်ကြောင်း သတင်းတွေက ဖော်ပြနေပါတယ်။