စာချုပ်သစ်အတွက် ဆွေးနွေးမှုတွေ ပျက်ပြားသွားခဲ့ပြီးနောက် အခုနွေရာသီ၊ စာချုပ်သက်တမ်းကုန်ဆုံးချိန်မှာပဲ လီဗာပူးအသင်းမှ ကိုနာတေးထွက်ခွာတော့မယ်ဆိုတဲ့ သတင်းတွေ ထွက်ပေါ်လာပါတယ်။

ကစားသမားရော၊ ကလပ်အသင်းဘက်ကပါ လပေါင်းများစွာဆွေးနွေးမှုတွေ ပြုလုပ်ခဲ့ပြီး အခြေအနေကောင်းမယ်လို့ အစောပိုင်းမှာ မျှော်လင့်ခဲ့ကြပေမဲ့ ဇူလိုင် ၁ ရက်နောက်ပိုင်း စာချုပ်သက်တမ်းတိုးဖို့ သဘောတူညီမှုမရရှိခဲ့လို့ ကိုနာတေးက အလွတ်ပြောင်းရွှေ့ကြေးဖြင့် ထွက်ခွာလာဖို့ ရှိနေပါတယ်။

အသက် ၂၇ နှစ်အရွယ်နောက်ခံလူထွက်ခွာမှုက အကူးအပြောင်းကာလအတွက် ပြင်ဆင်နေတဲ့ လီဗာပူးအသင်းနည်းပြအန်းစလော့ရဲ့အစီအစဉ်တွေအတွက် ကြီးမားတဲ့ ထိုးနှက်ချက်တစ်ခု ဖြစ်လာပါတယ်။

၂၀၂၄-၂၀၂၅ ပရီးမီးယားလိဂ်ချန်ပီယံဆုရယူနိုင်ခဲ့တဲ့ရာသီမှာ အဓိကအခန်းကဏ္ဍမှပါဝင်ခဲ့ကြတဲ့ မိုဆာလက်နဲ့ ရောဘတ်ဆန်တို့လို နာမည်ကြီးကစားသမားတွေရဲ့ထွက်ခွာမှုတွေနဲ့အတူ ကိုနာတေးလည်း အသင်းမှ ထွက်ခွာသွားပါတော့မယ်။

ကိုနာတေးက အခုဘောလုံးရာသီ၊ ကြိုးကြာနီတွေအတွက် လိဂ်ပွဲစဉ် ၃၈ ပွဲအနက် ၃၆ ပွဲအထိ ပါဝင်ကစားကာ ပုံမှန်ပွဲထွက်ခွင့်ရရှိခဲ့ပြီး ဗဟိုခံစစ်ပိုင်းမှာလည်း အရေးပါသူတစ်ဦးအဖြစ် ဆက်တိုက်ရပ်တည်နိုင်ခဲ့ပါတယ်။

အန်ဖီးလ်မှာ ငါးနှစ်ကြာဖြတ်သန်းခဲ့တဲ့ကာလတလျှောက် သူက ဗန်ဒိုက်နဲ့အတူ ခိုင်မာတဲ့ တွဲဖက်မှုကို တည်ဆောက်နိုင်ခဲ့သလို နည်းပြယာဂန်ကလော့ပ်ရော၊ အန်းစလော့ရဲ့လက်အောက်မှာပါ အဓိက ကစားသမားတစ်ဦးအဖြစ် ခြေစွမ်းပြသနိုင်ခဲ့ပါတယ်။