စပိန်လက်ရွေးစင်ဟောင်းနဲ့ ဘာစီလိုနာကွင်းလယ်လူဟောင်း ဂါဇီကာ မန်ဒီယေတာက ဘာစီလိုနာကြယ်ပွင့် လီဝန်ဒေါစကီး နောက်ထပ်ဘယ်အသင်းကို ပြောင်းရွှေ့သင့်သလဲဆိုတာနဲ့ ပတ်သက်ပြီး သူ့ရဲ့အမြင်ကို ပြောပြခဲ့ပါတယ်။

အသက် ၃၇ နှစ်အရွယ် လီဝန်ဒေါစကီးဟာ ဒီနွေရာသီမှာ စာချုပ်သက်တမ်းကုန်ဆုံးတော့မှာ ဖြစ်တာကြောင့် အသင်းကနေ ထွက်ခွာတော့မှာဖြစ်ကြောင်းနဲ့ ရာသီသစ်အတွက် အသင်းသစ် ရှာဖွေနေကြောင်း ဒီအပတ်ထဲမှာ ကြေညာခဲ့ပါတယ်။

ဒီဂန္ထဝင်တိုက်စစ်မှူးက သူ့ရဲ့ Instagram မှာ "စိန်ခေါ်မှုတွေနဲ့ ကြိုးစားအားထုတ်မှုတွေ ပြည့်နှက်နေတဲ့ လေးနှစ်တာကာလအပြီးမှာတော့ အသစ်တစ်ခုဆီကို ရှေ့ဆက်ဖို့ အချိန်တန်ပါပြီ။ ကျွန်တော့်ရဲ့ တာဝန်တွေ ပြီးမြောက်သွားပြီဆိုတဲ့ ခံစားချက်နဲ့အတူ ထွက်ခွာခဲ့တာပါ။ လေးရာသီအတွင်းမှာ ချန်ပီယံဆု သုံးကြိမ် ရရှိခဲ့ပါတယ်" လို့ ရေးသားခဲ့ပါတယ်။

လီဝန်ဒေါစကီးဟာ ပရီးမီးယားလိဂ်ကို ပြောင်းရွှေ့ဖို့ နီးစပ်နေပြီး မန်ချက်စတာယူနိုက်တက် အပါအဝင် ကလပ်အသင်းအတော်များများနဲ့ သတင်းတွေ ထွက်ပေါ်နေပါတယ်။

ဒါပေမဲ့ မန်ဒီယေတာကတော့ PlayUK နဲ့ အင်တာဗျူးမှာ လီဝန်ဒေါစကီးအနေနဲ့ ထိပ်တန်းလိဂ်တွေကို ရှောင်ပြီး ရည်မှန်းချက်ကြီးမားတဲ့ အဆင့်နိမ့်အသင်းတစ်သင်းကိုပဲ ရွေးချယ်သင့်တယ်လို့ အကြံပြုခဲ့ပါတယ်။

"လီဝန်ဒေါစကီးက အဆင့်နိမ့်တဲ့လိဂ်တွေမှာ ကစားဖို့ လမ်းဖွင့်ထားတယ်လို့ ပြောထားပါတယ်။ တကယ်လို့ သူက ဘောလုံးကစားသမားဘဝကနေ အနားယူပြီးရင် သရုပ်ဆောင်တစ်ယောက် ဖြစ်ချင်တယ်ဆိုရင်တော့ ဝရက်ဇ်ဟမ်း (Wrexham) က သူသွားသင့်တဲ့ နေရာပါပဲ။ သူက နောက်ထပ်ခြေလှမ်းသစ်တစ်ခုကို ရှာဖွေနေတာပါ။ ဘောလုံး ဆက်ကစားချင်သေးတယ်ဆိုရင်တော့ သူ့အတွက် ရွေးချယ်စရာတွေ အများကြီးရှိပါတယ်။ ဘယ်အဆင့်အတန်းရှိတဲ့ လိဂ်မှာ ကစားမလဲဆိုတာတော့ ကျွန်တော် သေချာမပြောနိုင်ဘူး။ ဒါပေမဲ့ ဒီလိုကစားသမားမျိုးတွေက ချန်ပီယံရှစ် ဒါမှမဟုတ် စပိန်ဒုတိယတန်းလို လိဂ်တွေမှာ အမြဲတမ်း အောင်မြင်ဖို့ဆိုတာ မလွယ်ပါဘူး။ အဲဒီလိဂ်တွေက သူ့လိုကစားသမားတွေအတွက် အင်မတန် ခက်ခဲပါတယ်။ ဒါပေမဲ့ သူ့ရဲ့ အရည်အချင်းနဲ့ စွမ်းဆောင်ရည်တွေက အသင်းအတွက် တစ်ခုခုတော့ ပေးစွမ်းနိုင်ပါသေးတယ်။ သူ့အတွက် ကမ်းလှမ်းမှုတွေ မပြတ်နိုင်တာမို့ ဘာတွေဆက်ဖြစ်မလဲ စောင့်ကြည့်ရမှာပါ။ ဒါက တကယ့်ကို စိတ်လှုပ်ရှားဖို့ ကောင်းပါတယ်" လို့ မန်ဒီယေတာက ဆိုပါတယ်။

၂၀၂၆ ကမ္ဘာ့ဖလားမှာ ပါဝင်ကစားရတော့မှာ မဟုတ်တဲ့ လီဝန်ဒေါစကီးအနေနဲ့ ယူနိုက်တက်လို အသင်းကြီးဆီ သွားမလား ဒါမှမဟုတ် တန်းတက်ဖို့ ကြိုးစားနေတဲ့ ဝရက်ဇ်ဟမ်းလို စိတ်ဝင်စားစရာ စီမံကိန်းရှိတဲ့ အသင်းဆီ သွားမလားဆိုတာ ဆုံးဖြတ်ဖို့ အချိန်အများကြီး ရရှိထားပါတယ်။