ယူနိုက်တက်ကွင်းလယ်လူ ဗန်ဒီဘိခ်ဟာ အာဆင်နယ်ဂန္ထဝင်တိုက်စစ်မှူး ဒင်းနစ်ဘားကမ့်ရဲ့သမီးဖြစ်သူနဲ့ ဒိတ်လုပ်နေပြီး အခုဆိုရင် ပထမဆုံးရင်သွေးလေး ပိုင်ဆိုင်ရတော့မှာဖြစ်ပေမယ့် သူက ဘောလုံးဂန္ထဝင်ကြီးတွေရဲ့ ရှုမငြီးတဲ့ ချစ်သမီးလေးတွေနဲ့ ဒိတ်လုပ်တဲ့ ပထမဆုံးကစားသမားတော့မဟုတ်ပါဘူး။

၂၀၂၀ နွေရာသီက အေဂျက်စ်ကနေ ပေါင် ၃၅ သန်းနဲ့ ယူနိုက်တက်ကို ရောက်လာခဲ့တဲ့ နယ်သာလန်လက်ရွေးစင် ဗန်ဒီဘိခ်ဟာ အက်စ်တယ်လီဘားကမ့်နဲ့ ချစ်ကြိုးသွယ်နေတာ ၂၀၁၉ ခုနှစ်ကတည်းကဖြစ်ပါတယ်။ ဗန်ဒီဘိခ်အနေနဲ့ ယူနိုက်တက်မှာ ရင်ဆိုင်နေရတဲ့ အိပ်မက်ဆိုးတွေကို ဖယ်ရှားနိုင်ဖို့ ကောင်မလေးရဲ့ဖားသားကြီးဆီကနေ အကြံဉာဏ်တောင်းလို့ရပြီး ဘားကမ့်က အာဆင်နယ်မှာ ၁၁နှစ်ကြာကစားခဲ့သလို ပရီးမီးယားလိဂ်ရဲ့အကြီးကျယ်ဆုံးကစားသမားတစ်ဦးအဖြစ်လည်း သတ်မှတ်ခံထားရပါတယ်။

ဒွန်နီဗန်ဒီဘိခ်နဲ့ အက်စ်တယ်လီဘားကမ့်
-----------------------------------------
ဗန်ဒီဘိခ်ဟာ အက်စ်တယ်လီနဲ့ လွန်ခဲ့တဲ့ ၂နှစ်က နယ်သာလန်မြို့တော် အမ်စတာဒမ်မှာ စတင်တွေ့ဆုံခဲ့တာဖြစ်ပြီး အဲဒီကတည်းက သူတို့နှစ်ယောက်ရဲ့သံယောဇဉ်နှောင်ကြိုးက ခိုင်မြဲခဲ့တာဖြစ်ပါတယ်။ ဒါကြောင့်လည်း ၂၀၂၀ စက်တင်ဘာမှာ အေဂျက်စ်ကနေ ယူနိုက်တက်ကို ဗန်ဒီဘိခ်ပြောင်းရွှေ့တော့ အက်စ်တယ်လီလည်း အမ်စတာဒမ်ကနေ မန်ချက်စတာကို ချစ်ရသူနဲ့အတူ တစ်ခါတည်းပြောင်းရွှေ့လာခဲ့တာပါ။

သူတို့စုံတွဲဟာ အစောပိုင်းမှာ အချစ်တွေကို လျှို့ဝှက်ထားခဲ့ပေမယ့် နောက်ပိုင်းမှာတော့ ပရိသတ်တွေကို အသိပေးခဲ့ပြီး အင်စတာဂရမ်မှာ ဓာတ်ပုံတွေမကြာခဏတင်ခဲ့ပါတယ်။ သူတို့နှစ်ယောက်ဟာ အားလပ်ရက်တွေမှာ ကမ္ဘာကြီးကို လှည့်ပတ်အပန်းဖြေခဲ့ပြီးနောက် ယခုတော့ ပထမဆုံးရင်သွေးလေး ပိုင်ဆိုင်ရတော့မှာဖြစ်ပါတယ်။ သူတို့နှစ်ယောက် ကလေးလေးရတော့မယ့်အကြောင်းကို အက်စ်တယ်လီက အင်စတာဂရမ်ကနေ အသိပေးခဲ့တာဖြစ်ပါတယ်။

ဆာဂျီယိုအဂူရိုနဲ့ ဂီယန်နီနာမာရာဒိုနာ
---------------------------------------
ဘာစီလိုနာတိုက်စစ်မှူး အဂူရိုကလည်း ဘောလုံးမိသားစုထဲကနေ မထွက်သူဖြစ်ပြီး အက်သလက်တီကိုမှာ ကစားခဲ့စဉ်က အာဂျင်တီးနားဂန္ထဝင်ကစားသမားကြီး ဒီယေဂိုမာရာဒိုနာရဲ့သမီးဖြစ်သူနဲ့ လက်တွဲခဲ့ပါတယ်။ ၂၀၀၈ မှာ သူတို့နှစ်ယောက်ကို မာရာဒိုနာကိုယ်တိုင် မိတ်ဆက်ပေးခဲ့တာဖြစ်ပြီး အဲဒီနောက် သူတို့နှစ်ယောက် လက်ထပ်ဖြစ်ခဲ့သလို ၂၀၀၉ ဖေဖော်ဝါရီလမှာ ဘင်ဂျမင်လို့ခေါ်တဲ့ သားလေးကိုပါ ပိုင်ဆိုင်နိုင်ခဲ့ပါတယ်။ ဒါပေမဲ့ ဆာဂျီယိုနဲ့ ဂီယန်နီနာတို့ဟာ ၂၀၁၂ မှာ လမ်းခွဲသွားခဲ့ပြီး အာဂျင်တီးနားမီဒီယာတွေရဲ့ဖော်ပြချက်အရ ဂီယန်နီနာရဲ့ ပါတီပွဲကြိုက်လွန်းတဲ့ ဝါသနာကြောင့် နှစ်ဦးသား သဘောထားကွဲလွဲခဲ့တာဖြစ်ကြောင်း သိရပါတယ်။

ယခုနှစ်အစောပိုင်းကမှ ကွယ်လွန်သွားခဲ့တဲ့ ဒီယေဂိုမာရာဒိုနာဟာ သမီးဖြစ်သူရဲ့အိမ်ထောင်ရေးအဆင်မပြေမှုအတွက် သမက်ဖြစ်သူကို ကြိမ်းမောင်းပြစ်တင်ခဲ့ဖူးပါတယ်။ ''သူက ငကြောက်ဗျ။ နာမည်တော့ ထုတ်တောင်မပြောချင်တော့ပါဘူးဗျာ။ ကျွန်တော့်သမီးက အခုဆို ရှေ့နေနဲ့ တွေ့ဆုံဆွေးနွေးတော့မယ်။ ကျွန်တော်လည်း သမီးဘက်ကနေ လိုက်ရမယ်။ နောက်တစ်ခေါက်ကျရင် အဂူရို ဘာပြောမလဲဆိုတာ စောင့်ကြည့်ရမယ်''လို့ မာရာဒိုနာက ပြောခဲ့ဖူးပါတယ်။

ဒယ်လီအယ်လီနဲ့ မာရီယာဂွါဒီယိုလာ
-----------------------------------
ပြီးခဲ့တဲ့လက Daily Mail သတင်းစာမှာ အယ်လီနဲ့ မာရီယာဂွါဒီယိုလာတို့ရဲ့ဓာတ်ပုံတွေ ထွက်ပေါ်လာခဲ့ပြီး အယ်လီက မန်စီးတီးအသင်းနည်းပြ ပက်ဂွါဒီယိုလာရဲ့သမီးဖြစ်သူ အသက် ၂၀ အရွယ်ရှိ မာရီယာနဲ့အတူတူ စားသောက်ဆိုင်ကနေ ထွက်လာတဲ့ပုံတွေဖြစ်ပါတယ်။ တော့တင်ဟမ်ကြယ်ပွင့် အယ်လီဟာ မေလကလည်း လန်ဒန်မှာ မာရီယာနဲ့ အကြင်နာပေးခဲ့တဲ့ဓာတ်ပုံတွေ ထွက်ပေါ်ခဲ့ဖူးပြီး အခုလည်း ၅လအကြာမှာ တွဲနေတယ်ဆိုတဲ့သံသယတွေ ပိုကြီးမားလာအောင် ဓာတ်ပုံတွေ ထပ်မံထွက်ပေါ်လာတာဖြစ်ပါတယ်။

The Sun သတင်းစာရဲ့ဖော်ပြချက်အရ ဖေဖော်ဝါရီလက မော်ဒယ် ရူဘီမေးနဲ့ လမ်းခွဲခဲ့တဲ့ အယ်လီဟာ စားသောက်ဆိုင်ရဲ့ rooftop မှာ မာရီယာကို ရင်ချင်းအပ်အကြာနာမပေးခင် ၁လအလိုကတည်းက ချစ်ကြိုးသွယ်နေခဲ့တာဖြစ်ကြောင်း သိရပါတယ်။

အယ်လ်ဗာရိုဗက်စ်ကွက်နဲ့ ကလော်ဒီယာဟီယာရို
--------------------------------------------------
ရီးရဲလ်မက်ဒရစ်ဂန္ထဝင်နောက်ခံလူ ဖာနန်ဒိုဟီယာရိုကလည်း စပိန်တိုက်စစ်မှူး အယ်လ်ဗာရိုဗက်စ်ကွက်ဇ်ကို သမက်အဖြစ် ဆွေမျိုးတော်စပ်ခဲ့ဖူးပြီး ဗက်စ်ကွက်ဇ်ဟာ အက်စ်ပန်ညို၊ ဂီတာဖေးတို့နဲ့အတူ လာလီဂါမှာ ဆယ်စုနှစ်တစ်ခုနီးပါးအကြာ ကျင်လည်ဖြတ်သန်းခဲ့သူဖြစ်ပါတယ်။

ပရီးမီးယားလိဂ်မှာ ဆွမ်ဆီးနဲ့အတူ ကာလတိုကျင်လည်ခဲ့ဖူးတဲ့ ဗက်စ်ကွက်ဟာ ဟီယာရိုရဲ့သမီးဖြစ်သူ ကလော်ဒီယာနဲ့ ဒိတ်လုပ်ခဲ့ဖူးပေမယ့် သူတို့နှစ်ယောက်ရဲ့ဆက်ဆံရေးက ရေရှည်မခံဘဲ လမ်းခွဲခဲ့ကြရပါတယ်။ အခုတော့ ကလော်ဒီယာဟာ မော်ဒယ် အိုင်ဗန်ဘာနာဘီနဲ့ တွဲနေပြီဖြစ်သလို ဗက်စ်ကွက်ကလည်း ပေါ်လာဂါဂိုနဲ့ တွဲနေပါတယ်။