လီဗာပူးကပ္ပတိန်ဗန်ဒိုက်က သူ့ရဲ့အနာဂတ်နဲ့ပတ်သက်လို့ နောက်ဆုံးအခြေအနေကို ဖွင့်ဟလာခဲ့ပြီး ပရီမီးယားလိဂ်ချန်ပီယံအဖြစ် ရာသီသိမ်းနိုင်ရန် အရာအားလုံးပေးဆပ်အားထုတ်ကြဖို့ အသင်းဖော်တွေဆီ တိုက်တွန်းပြောဆိုခဲ့ပါတယ်။

ပြီးခဲ့တဲ့သီတင်းပတ်အတွင်း ကြိုးကြာနီတွေက ချန်ပီယံလိဂ်ပြိုင်ပွဲမှာ ပီအက်စ်ဂျီ၊ ကာရာဘောင်းဖလားဗိုလ်လုပွဲမှာ နယူးကာဆယ်တို့ကို ဆက်တိုက်ရှုံးနိမ့်ကာ ငါးရက်တာကာလအတွင်းမှာပဲ ဆုဖလားလမ်းကြောင်းနှစ်ခုကို စွန့်ခွာသွားခဲ့ပါတယ်။ ဒါပေမယ့် မာဆေးဆိုဒ်ကလပ်အသင်းက ပရီးမီးယားလိဂ်ချန်ပီယံဖြစ်လာဖို့ ရှင်းရှင်းလင်းလင်းရေပန်းစားနေဆဲဖြစ်ပြီး အမှတ်ပေးဇယားထိပ်ဆုံးနေရာမှာ ၁၂ မှတ်အသာစီးရရှိကာ ရပ်တည်နေပါတယ်။ ဗန်ဒိုက်ကလည်း ဆုဖလားတစ်လုံးကိုင်မြှောက်ပြီး ဘောလုံးရာသီပိတ်သိမ်းနိုင်ဖို့အတွက် ကြိုးစားပေးကြရန် အသင်းဖော်တွေဆီ တိုက်တွန်းပြောဆိုခဲ့ပါတယ်။

ဝင်ဘာလေကွင်းရှုံးပွဲအပြီး သတင်းထောက်တွေနဲ့တွေ့ဆုံချိန် ဗန်ဒိုက်က “ လက်ရှိအခြေအနေကို ကျွန်တော်တို့ အလှည့်အပြောင်းပြုလုပ်သွားရပါမယ်။ ဘောလုံးလောကက အခုလိုပုံစံမျိုးနဲ့ပဲ လုပ်ကိုင်ဆောင်ရွက်ပါတယ်။ ငါးရက်အတွင်း နှစ်ပွဲရှုံးနိမ့်ပြီး ကမ္ဘာကြီးတစ်ခုလုံး ကပြောင်းကပြန်တွေ ဖြစ်သွားပါတယ်။ ဒီမတိုင်ခင် နှစ်ပတ်လောက်တုန်းက အရာရာတိုင်းဟာ နေရာတိုင်းမှာ တောက်ပခမ်းနားလွန်းခဲ့ပါတယ်။ ချန်ပီယံလိဂ်ပြိုင်ပွဲနဲ့ အက်ဖ်အေဖလားပြိုင်ပွဲတွေမှာ ကျွန်တော်တို့ စောစောစီးစီးပဲ ထွက်ခွာလာခဲ့ရပြီးပါပြီ။ ကျွန်တော်တို့တွေ လက်ကျန်ကိုးပွဲကစားရဖို့ ရှိနေပြီး အလုပ်ပြီးမြောက်စေဖို့အတွက် စိတ်အားလှုံ့ဆော်မှုတစ်ခုလိုအပ်မယ်လို့တော့ မထင်ပါဘူး။

ရာသီအစမှာကတည်းက အပြင်းအထန်ကြိုးစားအားထုတ်ခဲ့ရတဲ့ အကြီးမားဆုံးဆုလာဒ်အတွက် ယှဉ်ပြိုင်ကစားသွားရပါမယ်။ ကျွန်တော်တို့ကို ဘယ်သူကမှ ပရီးမီးယားလိဂ်ချန်ပီယံဆုစိန်ခေါ်နိုင်သူ ဖြစ်လာမယ်လို့ မထင်ထားခဲ့ပါဘူး။ ဒီဆုဖလားက အမိအရကိုင်မြှောက်နိုင်ဖို့ အခက်ခဲဆုံးဆုဖလား ဖြစ်ပါတယ်။ ဒီနေရာမှာ အလောင်းအစားတွေလည်း အများကြီးရှိတယ်။ အပြုသဘောဆောင်ပြီး ကောင်းတဲ့အရာတွေလည်း စောင့်ကြိုနေပါတယ်။ ဒီဆုဖလားအတွက် ကျွန်တော်တို့ ရေကုန်ရေခမ်းကြိုးစားသွားရပါမယ်။ အခုတော့ လူတိုင်းက ကိုယ့်နိုင်ငံလက်ရွေးစင်အသင်းဆီ ပြန်သွားကြပါပြီ။ ကြံ့ခိုင်မှုပိုင်းကောင်းမွန်နေဖို့အတွက်လည်း မျှော်လင့်မိပါတယ်။ ပြီးရင်တော့ ကျွန်တော်တို့က ခက်ခဲမယ်ဆိုတာသေချာနေတဲ့ အဲဗာတန်နဲ့အိမ်ကွင်းပွဲစဉ်အတွက် အဆင်သင့်ဖြစ်နေရပါမယ်”လို့ ပြောပါတယ်။

ဆက်လက်ပြီး ဒတ်ချ်လက်ရွေးစင်က သူ့ရဲ့အန်ဖီးလ်အနာဂတ်နဲ့ပတ်သက်ပြီး “ ရာသီကုန်မတိုင်ခင်အထိ ဒါတွေက သတင်းတွေအဖြစ်ပဲ ဆက်ရှိနေပါဦးမယ်။ ကျွန်တော်ကတော့ ကလပ်အသင်းကို သစ္စာအပြည့်ရှိပြီး ရှေ့လာမယ့်စိန်ခေါ်မှုတွေပေါ်မှာပဲ အပြည့်အ၀ အာရုံစိုက်ထားပါတယ်။ ကျွန်တော် ဒီကလပ်အသင်းကို ချစ်ပါတယ်။ ဒါ အဓိကအချက်ဖြစ်ပါတယ်”လို့ ပြောပါတယ်။

အန်းစလော့ရဲ့အသင်းက မတ်လနိုင်ငံတကာသီတင်းပတ်အပြီး ဧပြီ ၂ ရက်၊ အိမ်ကွင်းအန်ဖီးလ်မှာ ခါးသီးပြိုင်ဘက်အဲဗာတန်နဲ့ မာဆေးဆိုဒ်ဒါဘီပွဲစဉ် ဆင်နွှဲသွားရပါမယ်။