မန်ချက်စတာယူနိုက်တက်နဲ့ ချဲလ်ဆီးတို့ အကောင်းဆုံး ပြန်လာနိုင်လိမ့်မယ်လို့ ဟောကိန်းထုတ်တဲ့ ပက်ဂွါဒီယိုလာ
အခုပရီးမီးယားလိဂ်ရာသီသစ်အစပိုင်းမှာ ရလဒ်ဆိုးတွေနဲ့ ရုန်းကန်နေရတဲ့ မန်ချက်စတာယူနိုက်တက်၊ ချဲလ်ဆီးတို့ဟာ ပြန်လည်တိုးတက်လာလိမ့်မယ်လို့ မန်စီးတီးနည်းပြ ပက်ဂွါဒီယိုလာက ထောက်ခံပြောဆိုလိုက်ပါတယ်။
ပြီးခဲ့တဲ့စနေနေ့၊ ဘရိုက်တန်ကို အိမ်ကွင်းမှာ ၁-၃ ဂိုးဖြင့် အရေးနိမ့်ခဲ့တဲ့ပွဲစဉ်အပြီး ယူနိုက်တက်နည်းပြ တန်ဟက်အတွက် ဖိအားတွေ တိုးပွားလာခဲ့သလို ချဲလ်ဆီးကလည်း တိုက်စစ်ပိုင်းရုန်းကန်နေရမှုနဲ့အတူ တနင်္ဂနွေနေ့ အဝေးကွင်းပွဲစဉ်မှာ ဘုန်းမောက်ကို ဂိုးမရှိသရေရလဒ်သာ ကစားနိုင်ခဲ့ပါတယ်။
လက်ရှိ ပရီးမီးယားလိဂ်ငါးပွဲကစားပြီးချိန် ယူနိုက်တက်က သုံးပွဲရှုံးနိမ့်ထားသလို နည်းပြပိုချက်တီနိုရဲ့အသင်းကလည်း တစ်ပွဲသာ အနိုင်ရရှိပြီး ရမှတ်ငါးမှတ်သာ စုဆောင်းထားနိုင်ပါတယ်။ ဒါပေမယ့် မန်စီးတီးနည်းပြပက်ဂွါဒီယိုလာကတော့ ရာသီသစ်မှာ ပုံစံကောင်းတွေဆက်တိုက်ပြသနေတဲ့ အာဆင်နယ်၊ လီဗာပူးတို့ကို ချီးကျူးစကားဆိုခဲ့သလို ယူနိုက်တက်၊ ချဲလ်ဆီးတို့ကလည်း အနှေးနဲ့အမြန် ပုံစံကောင်းတွေ ရရှိလာလိမ့်မယ်လို့ ထောက်ခံပြောဆိုလိုက်ပါတယ်။
ဒီနေ့ညပိုင်း၊ ရက်ဒ်စတားဘဲလ်ဂရိတ်နဲ့ ရင်ဆိုင်ရမယ့် ချန်ပီယံလိဂ်အုပ်စုအဖွင့်ပွဲစဉ် မတိုင်ခင် သတင်းစာရှင်းလင်းပွဲအတွင်း ပက်ဂွါဒီယိုလာက “ကျွန်တော်တို့လည်း အခုဘောလုံးရာသီမှာ အကျဘက် ရောက်သွားတာမျိုး ရှိလာပါလိမ့်မယ်။ ဒါကြောင့် အခုလိုအခြေအနေတွေက တစ်ရာသီလုံးတော့ ဖြစ်နေမှာမဟုတ်ဘူး။ အကျဘက်မရောက်စေဖို့အတွက် အသင်းကြီးတွေကလည်း အကောင်းဆုံး စတင်နိုင်ဖို့ ကြိုးစားနေကြပါတယ်။ အာဆင်နယ်ဆိုလည်း ဘယ်လောက်တောင် တောင့်တင်းလာသလဲဆိုတာ ခင်ဗျားတို့ သိကြပါတယ်။ အဲဗာတန်နဲ့ ရင်ဆိုင်ရတဲ့ သူတို့ပွဲစဉ်ကို ကျွန်တော် ကြည့်ရှုခဲ့ရပြီး သူတို့အသင်းက ထူးခြားချက်တွေ ရှိနေပါတယ်။ လီဗာပူးဆိုလည်း သူတို့ရဲ့စိတ်ဓါတ်ပိုင်းနဲ့အတူ ရှေ့ဆက်နေပါပြီ”လို့ ပြောပါတယ်။
မန်ချက်စတာယူနိုက်တက်ရဲ့ ရာသီသစ်စတင်မှုနဲ့ပတ်သက်လို့ မေးမြန်းမှုကိုတော့ ပက်ဂွါဒီယိုလာက ရယ်ရယ်မောမောဖြင့် အခုလိုပဲ ပြန်တုံ့ပြန်ခဲ့ပါတယ်။ “ကောင်းပြီ။ သူတို့မျှော်လင့်ထားသလို၊ ကျွန်တော်တွေးထင်ထားသလို ပုံစံမျိုးနဲ့ မစတင်နိုင်ခဲ့ပါဘူး။ ချဲလ်ဆီးလိုပါပဲ။ ဒါပေမယ့် မန်ချက်စတာယူနိုက်တက်ရော၊ ချဲလ်ဆီးပါ အနှေးနဲ့အမြန် သူတို့ရဲ့ပုံစံကောင်းကို ပြန်ရပါလိမ့်မယ်။ ဒါပေမယ့် သမိုင်းဝင်ဆုဖလားသုံးလုံးအောင်ပွဲရရှိခဲ့ပြီးနောက် အသင်းလိုက်ပုံစံကောင်း ရရှိနေဖို့က ကျွန်တော်တို့အတွက် အရေးအကြီးဆုံးပါပဲ။ ငါးပွဲကစား၊ ငါးပွဲနိုင်ဆိုတာက အရမ်းကောင်းပါတယ်”လို့ ပက်ဂွါဒီယိုလာက ရှင်းပြပါတယ်။
