လီဗာပူးအသင်းခေါင်းဆောင်ဗန်ဒိုက်က ပီအက်စ်ဂျီနဲ့ရင်ဆိုင်ရမယ့် ချန်ပီယံလိဂ်ပွဲစဉ်မှာ သူတို့အသင်းရဲ့တန်ဖိုးကို သက်သေပြသွားဖို့ ကလပ်အသင်းဖော်တွေဆီ တိုက်တွန်းပြောဆိုခဲ့ပါတယ်။ လာမယ့်ဗုဒ္ဓဟူးနေ့၊ ပြင်သစ်နိုင်ငံမြို့တော်မှာ ချန်ပီယံလိဂ် ၁၆ သင်းရှုံးထွက်အဆင့်ပထမအကျော့ပွဲစဉ်အဖြစ် ပရီးမီးယားလိဂ်အမှတ်ပေးဇယားဦးဆောင်သူလီဗာပူးနဲ့ လီဂူးဝမ်းချန်ပီယံပီအက်စ်ဂျီကို ထိပ်တိုက်ရင်ဆိုင်မယ့် မျက်စိကျစရာပွဲကြီးပွဲကောင်းတစ်ခု ရှိနေပါတယ်။ အခုပွဲစဉ်ပြိုင်ဘက်တွေဖြစ်တဲ့ ကြိုးကြာနီတွေရော၊ ပါရီသားတွေပါ သက်ဆိုင်ရာလိဂ်တွေမှာ အနီးဆုံးပြိုင်ဘက်တွေကို ၁၃ မှတ်အထိဖြတ်ပြီး ရာသီကုန်လိဂ်ချန်ပီယံဖြစ်လာဖို့ ရေပန်းအစားဆုံးအသင်းတွေ ဖြစ်နေပါတယ်။ အခုပွဲကြီးပွဲကောင်းမတိုင်ခင် ဗန်ဒိုက်က ချန်ပီယံလိဂ်ပြိုင်ပွဲမှာ အကြီးမားဆုံးအဆင့်တွေဆီ တက်လှမ်းနိုင်ရေး ကြိုးပမ်းကြရန် ကလပ်အသင်းဖော်တွေဆီ တိုက်တွန်းလာခဲ့ပါတယ်။

သတင်းထောက်တွေနဲ့တွေ့ဆုံချိန် ဒတ်ချ်နောက်ခံလူက “ အရမ်းကောင်းတဲ့ပွဲစဉ်တစ်ခု ဖြစ်လာပါလိမ့်မယ်။ ပုံစံကောင်းရနေတဲ့အသင်းတစ်ခုနဲ့ ရင်ဆိုင်ရမှာဖြစ်လို့ ကျွန်တော်ကတော့ အခုထက်တောင် ပိုပြီး မျှော်လင့်မိပါတယ်။ သူတို့တွေက ဘရက်စ်နဲ့ရင်ဆိုင်ရတဲ့ နောက်ဆုံးချန်ပီယံလိဂ်ပွဲစဉ်တွေမှာ အရမ်းကောင်းအောင် ကစားနိုင်ခဲ့တယ်လို့ ထင်ပါတယ်။

ဒီပွဲစဉ်က ခက်ခဲပါလိမ့်မယ်။ ဒါပေမယ့် အခုလိုပွဲစဉ်မျိုးတွေက ကိုယ်ယှဉ်ပြိုင်ကစားချင်တဲ့ပွဲစဉ်တွေဖြစ်ပြီး ကျွန်တော်လည်း စောင့်မျှော်နေပါတယ်။ အခုပွဲစဉ်မတိုင်ခင် မိသားစုနဲ့အတူ အချိန်တစ်ခုလောက် အတူနေခွင့် ရရှိခဲ့ပါတယ်။ လွန်ခဲ့တဲ့သီတင်းပတ်နှစ်ခုလောက်အတွင်း ဖြစ်ပျက်ခဲ့တဲ့အရာတွေကို ပြန်စဉ်းစားရင်း ရင်သွေးတွေနဲ့အတူ အချိန်တစ်ခုလောက် အတူနေရတဲ့ အခွင့်အလမ်းတစ်ခု ဖြစ်ပါတယ်။ ဒီနောက်ပိုင်းမှာတော့ ကျွန်တော်တို့က ကိုယ်ရင်ဆိုင်ရမယ့်အရာတွေကို စောင့်မျှော်သွားပါမယ်”လို့ ပြောပါတယ်။

ဆက်လက်ပြီး ဗန်ဒိုက်က “ဟုတ်ပါတယ်၊ အမှန်ပါပဲ။ အခုချန်ပီယံလိဂ်ပြိုင်ပွဲက အဆင့်တစ်ခုတက်သွားသလို ခံစားမိပါတယ်။ ကျွန်တော်တို့တွေ ရှုံးထွက်အဆင့်ဆီ ရောက်ရှိနေပြီး အခြေခံအားဖြင့် အမှားအယွင်းတွေ (သို့မဟုတ်) ကစားပုံဆိုးရွားမှုတွေအတွက် အချိန်ပေးလို့ မရတော့ပါဘူး။ ကျော်ဖြတ်ရမယ့်ပွဲစဉ်နှစ်ခုရှိပြီး ကျော်ဖြတ်နိုင်ဖို့အတွက် ထိုက်တန်မယ့် ကောင်းမွန်မှုမျိုးဖြစ်လာဖို့ လိုအပ်ပါတယ်။

ဒါပေမယ့် ပြိုင်ဘက်ကိုအနိုင်ရရှိဖို့အတွက် ကိုယ့်မှာရှိသမျှ ခွန်အားတွေကို အသုံးချပြီး တိုက်ပွဲဝင်သွားရပါမယ်။ ဒါကပဲ ကျွန်တော်တို့ ကြိုးစားသွားရမယ့်အရာဖြစ်ပါတယ်။ ဒါပေမယ့် ကျွန်တော်တို့က ပြိုင်ဘက်အကြောင်း လုံးဝသိပါတယ်။ သူတို့ကို ပါရီမြေမှာ ရင်ဆိုင်ပြီးသွားရင် အန်ဖီးလ်မှာ ထပ်ပြီးရင်ဆိုင်သွားရပါမယ်။ ဒါက ကိုယ့်ရဲ့တန်ဖိုးကို တစ်ကမ္ဘာလုံးဆီ ချပြပြီး အကောင်းဆုံးစွမ်းဆောင်သွားရမယ့် ညမျိုးတွေပါပဲ”လို့ ပြောပါတယ်။ မာဆေးဆိုဒ်ကလပ်အသင်းက အခုသီတင်းပတ်အတွင်း ပါရီမြေဆီ ခရီးထွက်ပြီးနောက် လာမယ့်စနေနေ့၊ အန်ဖီးလ်မှာ ဆောက်သမ်တန်ကို ပရီးမီးယားလိဂ်ပြိုင်ဘက်အဖြစ် ဧည့်ခံကစားသွားရပါမယ်။