ယမန်နေ့ ညပိုင်း Comeback နိုင်ပွဲဟာ နည်းပြသက်တမ်းတလျှောက် အကောင်းဆုံး ပွဲစဉ်ဖြစ်နိုင်တယ်လို့ ဖွင့်ဟလာတဲ့ ယာဂန်ကလော့ပ်
ယမန်နေ့ညပိုင်း၊ စိန့်ဂျိမ်းပတ်ခ်မှာ နယူးကာဆယ်ကို ကစားသမားတစ်ဦးလျော့အနေအထားမှာပဲ Comeback ဖြင့် အနိုင်ယူခဲ့တဲ့ ပွဲစဉ်ဟာ နှစ် ၂၀ ကျော် နည်းပြဘဝသက်တမ်းတလျှောက် အကောင်းဆုံးပွဲစဉ်တွေအနက် တစ်ပွဲဖြစ်တယ်လို့ လီဗာပူးနည်းပြ ယာဂန်ကလော့ပ်က ပြောပါတယ်။
ဒီပွဲစဉ်ရဲ့ ပထမဆုံးပွဲချိန်အတွင်း လီဗာပူးက အဲဗာတန်ကစားသမားဟောင်း ဂေါ်ဒွန်ရဲ့ဦးဆောင်ဂိုးကို ခွင့်ပြုပေးခဲ့ရသလို တိုက်ရိုက်အနီကတ်ပြသခံရတဲ့ အသင်းခေါင်းဆောင်ဗန်ဒိုက်ကိုလည်း လက်လွှတ်ခဲ့ရပါတယ်။ ဒါပေမယ့် လက်ကျန် ပွဲချိန်တွေမှာ လီဗာပူးက ပြိုင်ဘက်နဲ့ အကြိတ်အနယ်ယှဉ်ပြိုင်ကစားခဲ့ပြီး လူစားဝင်ကစားသမားဒါဝင်နူနက်ဇ်ရဲ့ နောက်ကျသွင်းဂိုးနှစ်ဂိုးနဲ့အတူ ချိုမြိန်တဲ့နိုင်ပွဲတစ်ခုကို ဖော်ဆောင်ရင်း ထိုက်တန်တဲ့အနိုင်သုံးမှတ်နဲ့အတူ အိမ်ပြန်ခရီးစဉ်လှပစေခဲ့ပါတယ်။
ကွင်းလယ်ဒိုင်တွေရဲ့ဆုံးဖြတ်ချက်နဲ့ ပတ်သက်လို့ အမြဲလိုလိုဒေါသထွက်ရလေ့ရှိတဲ့ ယာဂန်ကလော့ပ်က အခုပွဲစဉ်ဟာ နည်းပြသက်တမ်းတလျှောက် အကောင်းဆုံးပွဲစဉ်ဖြစ်ကောင်းဖြစ်နိုင်တယ်လို့ ဖွင့်ဟလိုက်ပါတယ်။
အဆိုပါအမြင်နဲ့ ပတ်သက်လို့ မေးမြန်းလာမှုကို ကလော့ပ်က “သေချာသလောက်ပါပဲ။ ဒီပွဲစဉ်က ဘာစီလိုနာကို ချန်ပီယံလိဂ်ဆီမီးဖိုင်နယ်အဆင့်၊ အဝေးကွင်းမှာ သုံးဂိုးပြတ်ရှုံးနိမ့်ခဲ့တဲ့ပွဲစဉ်ထက် ပိုခက်ခဲခဲ့ပါတယ်။ နည်းပြတစ်ယောက်အဖြစ် ကျွန်တော် ပွဲ ၁၀၀၀ ကျော်လောက် ကိုင်တွယ်ဖူးပေမယ့် ဒီပွဲစဉ်လိုမျိုး တစ်ခါမှ မကစားခဲ့ရပါဘူး။ ၁၀ ယောက်ကျန်အနေအထားမှာ အဝေးကွင်းပရိသတ်ကြီးရဲ့ အံ့ဖွယ်အားပေးမှုကြီးကို ကျော်ဖြတ်ရတာမျိုး မကြုံခဲ့ဖူးဘူးဆိုတာ သေချာပါတယ်။ ဒီလိုအခိုက်အတန့်မျိုးက ရှားပါးပြီး အလွန်ထူးခြားဆန်းကြယ်ပါတယ်။ ဒီလိုပွဲစဉ်မျိုးမှာ ကိုယ့်ရဲ့မြေးမြစ်တွေလက်ထက်အထိ ပြောပြနိုင်တဲ့ သမိုင်းကြောင်းကို ဖန်တီးနိုင်ခွင့်ရှိတယ် ဆိုတာ ပထမပိုင်းပွဲချိန်အပြီး ကစားသမားတွေကို ကျွန်တော်ပြောပြခဲ့ပါတယ်။ နောက် ၁၀ ရက်လောက်နေရင် ကျွန်တော်လည်း မြေးလေးတွေနဲ့ တွေ့ရဦးမှာဆိုတော့ ဒီပွဲစဉ်အကြောင်း ပြောပြရပါဦးမယ်။ ကျွန်တော်တို့ ဒုတိယမြောက်ဂိုး မပေးခဲ့ရသလို အာနိုးလ်လည်း ဒုတိယမြောက်အဝါကတ် မရရှိခဲ့ဘူး။ ဒီလိုအခြေအနေမျိုးတွေ ပေါ်ပေါက်လာပြီးနောက်မှာ ကျွန်တော့်တို့အတွက် အခွင့်အရေးတစ်ခု ရှိလာပါတယ်”လို့ ပြောပါတယ်။
စိန့်ဂျိမ်းပတ်ခ်မှာ လီဗာပူးအတွက် သူရဲကောင်းဖြစ်ခဲ့တဲ့ လူစားဝင်ကစားသမား ဒါဝင်နူနက်ဇ်နဲ့ပတ်သက်လို့ ကလော့ပ်က ဥရုဂွေးတိုက်စစ်မှူးဟာ ပွဲထွက်ခွင့်မရရှိတဲ့ အချိန်မှာ နည်းပြရဲ့သူ့အပေါ်ရှုမြင်ထားတဲ့ အကဲဖြတ်ချက်တွေ မှားယွင်းတယ်ဆိုတာကို သက်သေပြဖို့ သူ့ရဲ့အားသာချက်တွေကို ထုတ်သုံးသွားတယ်လို့ ပြောဆိုခဲ့ပါတယ်။
“ကျွန်တော်ကတော့ ဒါဝင်နူနက်ဇ်ကို ပွေ့ဖက်ပြီး အသင်းအတွက် အကောင်းဆုံးကြိုးစားပေးဖို့ တိုက်တွန်းခဲ့ပါတယ်။ သူက ပွဲထွက်ခွင့်မရရှိခဲ့လို့ မပျော်ရွှင်ပါဘူး။ ဒါပေမယ့် အချိန်တိုင်းမှာ ပွဲထွက်ခွင့်ပေးနိုင်တာ ကစားသမား ၁၁ ဦးထက် ပိုမရှိပါဘူး။ ဒါကြောင့် တည်ငြိမ်မှုရှိနေရပါမယ်။ ကစားသမားတွေကတော့ ပွဲထွက်ခွင့်မရရင် မပျော်ရွှင်ပါဘူး။ ကျွန်တော်တို့တွေက ကစားဟန်အသစ်တစ်ခုကို ဖော်ဆောင်ဖို့ လိုအပ်နေပြီး ဒီနည်းလမ်းမှာ နူနက်ဇ်က အဓိကအစိတ်အပိုင်းတစ်ခု ဖြစ်လာနိုင်ပါတယ်။ သူ့ရဲ့အဓိကအားသားချက်တွေက အတော်လေးထူးခြားပါတယ်။ ဒီလိုမျိုးသာဆက်ဖြစ်သွားမယ်ဆိုရင် အရာရာတိုင်းဟာ အဆင်ပြေသွားပါလိ့မ်မယ်။ ဒီအတိုင်းလေးပဲ ဆက်လုပ်သွားကြရအောင်ပါ”လို့ ကလော့ပ်က ဆက်ပြောခဲ့ပါတယ်။
ဒါ့အပြင် ဗန်ဒိုက်ကို တိုက်ရိုက်အနီကတ်ဖြင့် ထုတ်ပယ်ခဲ့တဲ့ ဆုံးဖြတ်ချက်အပေါ် ဒေါသထွက်နေတဲ့ ဂျာမန်လူမျိုးနည်းပြကြီးက “ကျွန်တော်ကတော့ အနီကတ်ပြစ်ဒဏ်လို့ မယူဆမိပါဘူး။ ထိတွေ့မှုလည်း မရှိပေမယ့် ကျွန်တော့်အနေနဲ့ ဘာပြောနိုင်မှာလဲ၊ ဆုံးဖြတ်ချက်က ချပြီးသွားပြီဖြစ်လို့ ကျွန်တော်လည်း မပြောင်းလဲပေးနိုင်ပါဘူး။ လေ့ကျင့်ရေးကွင်းမှာဆိုရင် ဒီလိုအခြေအနေအတွက် ပြစ်ဒဏ်ပေးမှာလား? ကျွန်တော်ဆိုရင်တော့ လုံးဝပေးမှာမဟုတ်ဘူးဆိုတာ သေချာပါတယ်။ ဒါပေမယ့် ကျွန်တော်က ကွင်းလယ်ဒိုင်မဟုတ်ဘူးဆိုတဲ့ အကြောင်းပြချက်တစ်ခုတော့ ရှိနေပါတယ်”လို့ ဆက်ပြောခဲ့ပါတယ်။
