ယူရို ၂၀၂၄ မတိုင်ခင် အဓိက ကစားသမားအချို့ဒဏ်ရာပြဿနာရှိနေတဲ့ အီတလီ
အီတလီအသင်းရဲ့အဓိက ကစားသမားအချို့ဟာ ယူရို ၂၀၂၄ မတိုင်ခင် ဒဏ်ရာပြဿနာရှိနေတယ်လို့ သိရပါတယ်။ လွန်ခဲ့တဲ့ ၃ နှစ်တုန်းက အီတလီဟာ ယူရိုဖိုင်နယ်မှာ အင်္ဂလန်ကို ပင်နယ်တီအဆုံးအဖြတ်နဲ့ အနိုင်ကန်ပြီး ဆုဖလားရယူနိုင်ခဲ့တာဖြစ်ပါတယ်။
၂၀၂၂ ကမ္ဘာ့ဖလားဝင်ခွင့်ကျရှုံးခဲ့ပြီးနောက် အီတလီနည်းပြ ရာထူးကို မန်ချီနီက တာဝန်ယူထားတာဖြစ်ပါတယ်။ အခုတော့ စပယ်လက်တီက အီတလီကို ဦးဆောင်နေကာ ယူရိုချန်ပီယံဆုကို ကာကွယ်ရမှာဖြစ်ပါတယ်။ ဒါပေမယ့်လည်း ပြိုင်ပွဲစဖို့ ၂ ပတ်တောင်မလိုတော့တဲ့အချိန်မှာ ကြီးမားတဲ့ဒဏ်ရာပြဿနာ ရှိနေခဲ့တာဖြစ်ပါတယ်။
စီးရီးအေနောက်ဆုံးပွဲဖြစ်တဲ့ အတ္တလန္တာနဲ့ ဖီအိုရင်တီးနားတို့နဲ့ ပွဲမှာ ယူရိုပါလိဂ်ချန်ပီယံနောက်ခံလူ စကယ်လ်ဗီနီနေရာမှာ ဟာတီဘိုဝါနဲ့ လူစားလဲခဲ့ရပါတယ်။ သတင်းတွေအရ စကယ်လ်ဗီနီရဲ့အခြေအနေဟာ အရွတ်ကြောဒဏ်ရာဖြစ်တာကြောင့် ယူရို ၂၀၂၄ကို လွဲချော်နိုင်တယ်လို့ ဖော်ပြနေကြပါတယ်။
အပြောင်းအရွှေ့အကျော်အမော် ရိုမာနိုက လူမှုမီဒီယာမှာ “စကယ်လ်ဗီနီက ဘယ်ဘက်ဒူးအရွတ်ကြောဒဏ်ရာ ရခဲ့တာပါ။ သူက ယူရို ၂၀၂၄ ကို လွဲချော်နိုင်ပါတယ်။ အတ္တလန္တာနောက်ခံလူဟာ ဇန်နဝါရီမှာ ပြန်လာမှာပါ။ အမြန်ဆုံးသက်သာပါစေ”လို့ ရေးသားတင်ခဲ့ပါတယ်။ စကယ်လ်ဗီနီဟာ အတ္တလန္တာမှာ ခြေစွမ်းပြသနိုင်ခဲ့ပြီးနောက် အီတလီအသင်းမှာ ရွေးချယ်ခံခဲ့ရတာဖြစ်ပါတယ်။
အသက် ၂၀ အရွယ်ကစားသမားဟာ ပြိုင်ပွဲစုံ ၄၄ ပွဲအထိ ပါဝင်ကစားပေးထားကာ ယူရိုပါလိဂ်ဖိုင်နယ်မှာ လူစားလဲမှုလည်း ပါဝင်ခဲ့တာဖြစ်ပါတယ်။ အတ္တလန္တာကလည်း စကယ်လ်ဗီနီထံ မက်ဆေ့ချ်ပေးပို့ခဲ့ပြီး “ငါတို့အားလုံးမင်းနဲ့ အတူရှိနေပါတယ်။ စကယ်ရေ”လို့ တင်ခဲ့ပါတယ်။
အီတလီဟာ တူရကီ၊ ဘော့စနီးယားတို့နဲ့ ခြေစမ်းပွဲ ၂ ပွဲကန်ဦးမှာဖြစ်ပါတယ်။ ယူရို ၂၀၂၄ အဖွင့်ပွဲမှာ အီတလီဟာ အယ်လ်ဘေးနီးယားနဲ့ ရင်ဆိုင်ရမှာဖြစ်ပြီး မရဏအုပ်စုထဲမှာ စပိန်၊ ခရိုအေးရှားတို့နဲ့ တစ်အုပ်စုတည်းကျရောက်နေပါတယ်။
