အင်တာမီယာမီစူပါစတား လီယွန်နယ်မက်ဆီဟာ တနင်္လာနေနံနက်က အတ္တလန္တာနဲ့ယှဉ်ပြိုင်ခဲ့တဲ့ မေဂျာလိဂ်ပွဲစဉ်မှာ အသင်းအတွက် ပွဲချိန်ပြည့်ပါဝင်ကစားနိုင်ခဲ့ပေမယ့် မတ်လအတွင်း ကမ္ဘာ့ဖလားခြေစစ်ပွဲစဉ်တွေ ယှဉ်ပြိုင်သွားမယ့် အာဂျင်တီးနားရဲ့ လူစာရင်းကနေ နုတ်ထွက်ထားခဲ့တယ်လို့သိရပါတယ်။ 

တောင်အမေရိကဇုန် ကမ္ဘာ့ဖလားခြေစစ်ပွဲစဉ်တွေအဖြစ် အာဂျင်တီးနားဟာ ဘရာဇီး၊ ဥရုဂွေးတို့နဲ့ယှဉ်ပြိုင်သွားရမှာဖြစ်ပြီး ယခုအခါမှာ‌တော့ အဆိုပါပွဲစဉ်တွေကို မက်ဆီတစ်ယောက်လွဲချော်သွားမှာဖြစ်ပါတယ်။ အင်တာမီယာမီရဲ့ထုတ်ပြန်ချက်အရတော့ ဘောလွန်းဒီအော် ၈ ဆုရှင်ဟာ ကြွက်သားဒဏ်ရာရရှိခဲ့တယ်လိုသိရပါတယ်။ 

တနင်္လာနေ့က အတ္တလန္တာကို ၁-၂ နဲ့အနိုင်ရခဲ့တဲ့ပွဲစဉ်မှာ အင်တာမီယာမီအတွက် ပွဲထွက်ပါဝင်ကစားပေးခဲ့ပြီး အဖွင့်ဂိုးကိုလည်းသွင်းယူပေးနိုင်ခဲ့တဲ့ မက်ဆီဟာ မိနစ် ၉၀ အပြည့်ပါဝင်ကစားခဲ့ပါတယ်။ မကြာသေးမီက မက်ဆီဟာ အင်တာမီယာမီရဲ့ ပြိုင်ပွဲစုံ နောက်ဆုံး ၃ ပွဲကို လွဲချော်ထားခဲ့တာဖြစ်ပြီး ယခုအခါမှ ကြံ့ခိုင်မှုပြန်လည်ပြည့်ဝနေတာဖြစ်ပါတယ်။ 

အင်တာမီယာမီက အာဂျင်တီးနားအသင်းခေါင်းဆောင်ဟာ ကြွက်သားဒဏ်ရာရရှိခဲ့တာကြောင့် အာဂျင်တီးနားအတွက် ပါဝင်ကစားပေးနိုင်မှာမဟုတ်ဘူးလို့ဆိုပါတယ်။ အတ္တလန္တာနဲ့ယှဉ်ပြိုင်သွားရမယ့်ပွဲစဉ်မတိုင်မီမှာ မက်ဆီရဲ့ကြံ့ခိုင်မှုအခြေအနေနဲ့ပတ်သက်ပြီး အင်တာမီယာမီနည်းပြ မာရှေယာနိုက "ကျွန်တော်တို့ မက်ဆီကို သူလုပ်နိုင်တာထက်ကျော်လွန်ပြီး လုပ်ခိုင်းသွားမှာမဟုတ်ပါဘူး။ အကောင်းဆုံးနည်းလမ်းနဲ့ ကိုင်တွယ်ဖို့ကြိုးစားထားပါတယ်။ ဒဏ်ရာမရစေဖို့ အတတ်နိုင်ဆုံးကာကွယ်သွားမှာပါ" လို့ပြောကြားခဲ့ပါတယ်။ 

ဆက်လက်ပြီး မာရှေယာနိုက "အသင်းရဲ့ဆရာဝန်တွေက မက်ဆီနဲ့ပတ်သက်ပြီး အာဂျင်တီးနားဆေးအဖွဲ့က ဆရာဝန်တွေနဲ့ အဆက်အသွယ်လုပ်ထားပါတယ်။ ပြီးတော့ မက်ဆီရဲ့အခြေအနေကို ပွင့်ပွင့်လင်းလင်းပဲတိုင်ပင်ဆွေးနွေးကြပါတယ်။ ကျွန်တော်လောလောဆယ်မှာတော့ နည်းပြဝန်ထမ်းတွေနဲ့ စကားမပြောရသေးပါဘူး။ ဒါပေမယ့် သူတို့ကလည်း ဆရာဝန်တွေနဲ့ တစ်ချိန်လုံးအဆက်အသွယ်ရှိနေလို့ ကျွန်တော့်အနေနဲ့ ပြောစရာတောင်လိုမယ်မထင်ပါဘူး" လို့ပြောကြားခဲ့ပါတယ်။ 

လက်ရှိအချိန်မှာတော့ အာဂျင်တီးနားအသင်းဟာ တောင်အမေရိကဇုန် ကမ္ဘာ့ဖလားခြေစစ်ပွဲအမှတ်ပေးဇယားကို ထိပ်ဆုံးကနေဦးဆောင်ထားပြီး ၁၂ ပွဲကစားပြီးချိန်မှာ ၂၅ မှတ်အထိစုဆောင်းထားနိုင်ပါတယ်။ အာဂျင်တီးနားအတွက်ပြိုင်ပွဲစုံ ၁၉၁ ပွဲကစားထားတဲ့မက်ဆီဟာ နိုင်ငံရဲ့ ဂိုးသွင်းအများဆုံးကစားသမားအဖြစ် ၁၁၂ ဂိုးနဲ့စံချိန်တင်ထားပါတယ်။ 

အာဂျင်တီးနားဟာ မတ်လ ၂၁ ရက်နေ့မှာ ဥရုဂွေး၊ မတ်လ ၂၅ ရက်နေ့မှာ ဘရာဇီးတို့နဲ့ယှဉ်ပြိုင်သွားရမှာဖြစ်ပြီး အဆိုပါပွဲစဉ်တွေကိုလွဲချော်သွားမယ့်မက်ဆီကတော့ မတ်လ ၂၉ ရက်နေ့ ဖီလာဒယ်ဖီယာယူနီယံနဲ့ကစားသွားရမယ့် အင်တာမီယာမီရဲ့ မေဂျာလိဂ်ပွဲစဉ်မှာ ပြန်လည်ပါဝင်လာနိုင်မလား စောင့်ကြည့်ရပါမယ်။