အာဆင်နယ်နည်းပြမီခေးလ်အာတီတာက တနင်္ဂနွေနေ့ညက ယှဉ်ပြိုင်ခဲ့တဲ့ ပရီးမီးယားလိဂ်ပွဲစဉ်မှာ ချဲလ်ဆီးကို ဂိုးမပေးခဲ့ရဘဲ ၁-၀ နဲ့ကပ်နိုင်ခဲ့ပေမယ့် ပွဲအပြီးမှာ ချဲလ်ဆီးဟာ လိဂ်ရဲ့တိုက်စစ်အကောင်းဆုံးအသင်းဖြစ်တယ်လို့ ချီးကျူးပြောဆိုလာခဲ့ပါတယ်။ 

ယခုပွဲစဉ်မှာ အာဆင်နယ်အတွက် တစ်လုံးတည်းသောအနိုင်ဂိုးကို ပထမပိုင်းမှာပဲ ကွင်းလယ်လူမီခေးလ်မီရီနိုက မာတင်အိုဒီဂတ်ရဲ့ထောင့်ကန်ဘောမှတစ်ဆင့် ‌ခေါင်းတိုက်သွင်းယူခဲ့တာဖြစ်ပါတယ်။ အဓိက ကစားသမားတွေဖြစ်တဲ့ ကိုးလ်ပယ်လ်မာ၊ နီကိုလက်စ်ဂျက်ဆန်နဲ့ နိုနီမာဒူကီတို့ကို ထည့်သွင်းအသုံးပြုနိုင်ခဲ့ခြင်းမရှိတဲ့ ချဲလ်ဆီးကတော့ အဝေးကွင်းမှာ သွင်းဂိုးမရရှိခဲ့ဘဲ အခွင့်အရေးဖန်တီးဖို့ပင် ရုန်းကန်ခဲ့ရပါတယ်။ 

သို့သော်လည်း အာတီတာကတော့ "ဒီပွဲကို ကျွန်တော်အရမ်းကျေနပ်ပါတယ်။ ရလဒ်အရရော၊ ခြေစွမ်းအရပါ ကျေနပ်ပါတယ်။ ကျွန်တော်တို့ အခွင့်အရေးတွေအများကြီးဖန်တီးနိုင်ခဲ့ပြီး ပြိုင်ဘက်ရဲ့တိုက်စစ်ကလည်း ထက်မြက်ခဲ့လို့ ကျွန်တော်တို့ဂိုးသမားဒေးဗစ်ရာယာလည်း အနည်းငယ်အခက်ကြုံခဲ့ရပါတယ်။ ကျွန်တော့်ရဲ့အမြင်က ချဲလ်ဆီးက ပရီးမီးယားလိဂ်ရဲ့တိုက်စစ်အကောင်းဆုံးအသင်းဖြစ်လို့၊ ဒီနိုင်ပွဲအတွက် အသင်းကို ချီးကျူးရပါမယ်" လို့ပြောကြားခဲ့ပါတယ်။ 

ယခုနိုင်ပွဲကြောင့် အာဆင်နယ်ဟာ ပရီးမီးယားလိဂ်အမှတ်ပေးဇယားရဲ့ ဒုတိယနေရာမှာ ဆက်လက်ရပ်တည်ခဲ့ပြီး ထိပ်ဆုံးကလီဗာပူးနဲ့ ရမှတ် ၁၂ မှတ်ကွာဟကာ တတိယနေရာက နော်တင်ဟမ်ဖောရက်စ်ကိုတော့ ၄ မှတ်ဖြတ်ထားနိုင်ခဲ့ပါတယ်။ ရှုံးပွဲကြုံခဲ့တဲ့ချဲလ်ဆီးကတော့ အမှတ်ပေးဇယားရဲ့ အဆင့် ၄ နေရာမှာ ဆက်လက်ရပ်တည်နေဆဲဖြစ်ပေမယ့် အာဆင်နယ်နဲ့ ၉ မှတ်အထိကွာဟသွားခဲ့ပါတယ်။ 

ချဲလ်ဆီးဟာဒီရာသီ ပရီးမီးယားလိဂ်မှာ သွင်းဂိုး ၅၃ ဂိုးအထိရရှိထားတာကြောင့် အာဆင်နယ်နဲ့ ရဂိုးအရေအတွက်တူညီပေမယ့် လီဗာပူးနဲ့မန်စီးတီးထက်တော့ ပိုမိုနည်းပါးနေပါသေးတယ်။ နောက်ရာသီမှာ ချဲလ်ဆီးအနေနဲ့ ပရီးမီးယားလိဂ်ဆုဖလားကို စိန်ခေါ်နိုင်မယ်လို့ထင်သလားလို့မေးမြန်းခဲ့ရာမှာ အာတီတာက "စိန်ခေါ်နိုင်မှာသေချာပါတယ်။ ဒဏ်ရာပြဿနာတွေက သူတို့ကို ဒုက္ခပေးနိုင်ပေမယ့် သူတို့ရဲ့မန်နေဂျာက အရမ်းတော်တဲ့နည်းပြတစ်ယောက်ဖြစ်ပြီး အရည်အသွေးရှိတဲ့လူစာရင်းကို ဖန်တီးနိုင်ပါတယ်။ ကျွန်တော်တို့အနေနဲ့လည်း ဒီပွဲမှာ ဒီထက်ပိုပြီးစွမ်းဆောင်ရည်ကောင်းခဲ့သင့်ပေမယ့် ဘာပဲဖြစ်ဖြစ် အနိုင်ရခဲ့လို့ ကျေနပ်ပါတယ်"

"ကျွန်တော်တို့က ထိပ်တန်းပြိုင်ဘက်နဲ့တွေ့ဆုံးခဲ့ရတာဖြစ်ပြီး စိတ်ဓာတ်ပိုင်းမှာ မယုံနိုင်စရာကောင်းလောက်အောင်ကြံ့ခိုင်ခဲ့ပါတယ်။ အခုတော့ နိုင်ငံတကာပွဲစဉ်တွေကျင်းပသွားတော့မှာပါ။ ကျွန်တော်တို့ အခုထက်ပိုကောင်းအောင်ကြိုးစားပြီး ပွဲစဉ်တိုင်းကို အနိုင်ယူရပါမယ်။ ဒီလိုလုပ်နိုင်မယ်ဆိုရင် အသင်းက ပိုကောင်းတဲ့နေရာတစ်ခုမှာရောက်နေမှာပါ" လို့ပြောကြားခဲ့ပါတယ်။