ရင်ဘတ်နာကျင်မှုကြောင့် ဆေးရုံတက်နေရတယ်လို့ ကားလို့စ်တိဗက်ဇ် ဝန်ခံပြောကြား
8:55 AM, 25 April
ယူနိုက်တက်ဂန္ထဝင်ဟောင်း ကားလို့စ်တိဗက်ဇ်က သူ့အနေနဲ့ ရင်ဘတ်နာကျင်မှုကြောင့် ဆေးရုံတက်နေရတယ်လို့ ဝန်ခံပြောကြားလိုက်ပါတယ်။ လက်ရှိမှာ အာဂျင်တိုင်းသားဟာ ဗြူနိုအေးရိစ်မှာရှိတဲ့ဆေးရုံမှာ တက်ရောက်နေတယ်လို့ သိရပါတယ်။
အာဂျင်တီးနားလိဂ်အသင်းဖြစ်တဲ့ အင်ဒီပန်ဒီတီအသင်းကတော့ တိဗက်ဇ်အခြေအနေနဲ့ပတ်သက်ပြီး “ကျွန်တော်တို့နည်းပြ တိဗက်ဇ်က ရင်ဘတ်နာကျင်မှုကြောင့် ဆေးရုံတက်နေရပါတယ်။ သူတို့စစ်ဆေးမှုတွေပြုလုပ်နေပါတယ်”လို့ ကြေညာချက်ထုတ်ပြန်ခဲ့ပါတယ်။
အင်ဒီပန်ဒီတီအသင်းက တိဗက်ဇ်အခြေအနေကို စစ်ဆေးမှုတွေအပြင် အခြားစစ်ဆေးမှုတွေပါ လုပ်ဆောင်နေတယ်လို့ အတည်ပြုခဲ့ပါတယ်။ အာဂျင်တီးနားအသင်းအတွက် ၂၀၀၄ ကနေ ၂၀၁၅ အထိ တိဗက်ဇ်ဟာ ၇၆ ပွဲအထိ ပါဝင်ကစားပေးထားပြီး ၂၀၂၃ သြဂုတ်လတုန်းက အင်ဒီပန်ဒီတီအသင်းနည်းပြဖြစ်လာခဲ့ပါတယ်။
ပရီးမီးယားလိဂ်မှာတော့ ၂၀၀၆ ကနေ ၂၀၁၃ အထိ ကစားခဲ့ပြီး ယူနိုက်တက်နဲ့အတူ ပရီးမီးယားလိဂ် ၂ ကြိမ် ၊ စီးတီးနဲ့အတူ ပရီးမီးယားလိဂ် ၁ ကြိမ်ရယူနိုင်ခဲ့သလို ချန်ပီယံလိဂ် နဲ့ ကလပ်ကမ္ဘာ့ဖလားတွေကိုပါ ယူနိုက်တက်နဲ့ရယူနိုင်ခဲ့ပါတယ်။
အာဂျင်တိုင်းသားဟာ ယူနိုက်တက်မှာ ဝိန်းရွန်းနီနဲ့အတွဲအဖက်ညီခဲ့တာဖြစ်ပြီး ၂၀၀၇ ကနေ ၂၀၀၉ အထိ အတူတူကစားခဲ့တာဖြစ်ပါတယ်။ အဲ့နောက် တိဗက်ဇ်တစ်ယောက် ဂျူဗင်တပ်စ်၊ ဘိုကာဂျူနီယာ၊ ရှန်ဟိုင်းရှင်ဟွာ၊ ဘိုကာ စတဲ့အသင်းတွေမှာ ကစားခဲ့သေးတာဖြစ်ပါတယ်။