ဒီရာသီချန်ပီယံလိဂ်ရနိုင်တဲ့အသင်း ၃ သင်းကို ရွေးချယ်လိုက်တဲ့ မူစီယာလာ

3:11 PM, 24 December

ဘိုင်ယန်မြူးနစ်စတား မူစီယာလာက ဒီရာသီချန်ပီယံလိဂ်ဖလားရနိုင်တဲ့ အသင်း ၃ သင်းကို ရွေးချယ်လိုက်ပါတယ်။

ဂျာမန်သားဟာ အင်္ဂလန်မှာကြီးပြင်းခဲ့တာဖြစ်ပြီး ဒီရာသီချန်ပီယံလိဂ်ဖိုင်နယ်ကို ဝင်ဘာလေမှာ ကန်ချင်နေပါတယ်။

 

မူစီယာလာကတော့ ချန်ပီယံလိဂ်အောင်မြင်မှုရဖို့ အိပ်မက်ရှိနေတာဖြစ်ပြီး ဒီရာသီချန်ပီယံဖလားပိုင်ရှင်ဖြစ်နိုင်မယ့် ၃ သင်းအဖြစ် ရီးရဲလ်မက်ဒရစ် ၊ မန်စီးတီး နဲ့ အာဆင်နယ်တို့ကိုရွေးချယ်ခဲ့ပါတယ်။

“ချန်ပီယံလိဂ်က အသင်းတစ်သင်းအတွက် အရေးကြီးတဲ့ဖလားတစ်ခုပါ။ ဒီဆုဖလားကိုရရှိဖို့ ကျွန်တော်အိပ်မက်ရှိပါတယ်။ ဒီရာသီဖိုင်နယ်က လန်ဒန်မြို့ ဝင်ဘာလေကွင်းမှာ ကန်ရမှာပါ။

ကျွန်တော် လန်ဒန်မှာကြီးပြင်းခဲ့တာကြောင့် အရမ်းကောင်းတဲ့ကွင်းဖြစ်တယ်လို့ ထင်ပါတယ်။ ဝင်ဘာလေက တကယ့်မှော်ဆန်တဲ့ကွင်းတစ်ကွင်းပါ။

ဖိုင်နယ်ကိုတက်ရောက်နိုင်ဖို့ ကျွန်တော်တို့အသင်းတစ်သင်းအနေနဲ့ အရာအားလုံးပေးဆပ်ကစားသွားဖို့ လိုအပ်ပါတယ်။ ချန်ပီယံဖလားပိုင်ရှင်က ရီးရဲလ် ၊ မန်စီးတီးတို့က ရေပန်းအစားဆုံးလို့ ကျွန်တော်ထင်ပါတယ်။

ဒါပေမယ့် ဒီရာသီ အာဆင်နယ်က အာတီတာလက်အောက်မှာကစားပြနေတာကလည်း အရမ်းကောင်းပါတယ်။ သူတို့ကိုလည်း ချန်ပီယံဆုစာရင်းထဲထည့်ရမှာပါ”လို့ မူစီယာလာက ပြောကြားခဲ့ပါတယ်။

အသက်  ၂၀ အရွယ်ကစားသမားဟာ ဘိုင်ယန်အသင်းနဲ့အတူ စွမ်းဆောင်ရည်ကောင်းတွေပြသနေတာဖြစ်ပြီး ပြိုင်ပွဲစုံ ၁၈ ပွဲမှာ ၅ ဂိုးသွင်း ၊ ၃ ဂိုးဖန်တီးထားနိုင်ခဲ့ပါတယ်။

ဘိုင်ယန်အတွက် လက်ရှိထိပ်တန်းဂိုးသွင်းရှင်တွေအဖြစ် ဟယ်ရီကိန်း နဲ့ ဆာနေးတို့က ရပ်တည်နေပြီး မူစီယာလာက တတိယနေရာမှာ ရပ်တည်နေပါတယ်။

အမှတ်ပေးဇယားမှာတော့ ဘိုင်ယန်ဟာ လေဗာကူဆင်နဲ့ ၄ မှတ်အကွာ အဆင့် ၂ နေရာမှာရပ်တည်နေပါတယ်။ 

ရီးရဲလ်အသင်းက ချန်ပီယံလိဂ် ၁၆ သင်းအဆင့်မှာ လိုက်ပ်ဇစ်နဲ့တွေ့ဆုံနေပြီး အာဆင်နယ်က ပေါ်တို ၊ မန်စီးတီးက ကိုဗင်ဟေဂင် ၊ ဘိုင်ယန်က လာဇီယိုတို့နဲ့တွေ့ဆုံနေပါတယ်။

#ဘိုင်ယန်မြူးနစ် #ဘွန်ဒက်စ်လီဂါ #မူစီယာလာ