နည်းပြ နူနိုဆန်းတို့ ထုတ်ပယ်ခံရပြီးနောက် ပထမဆုံးပွဲစဉ်မှာ ဟက်ထရစ်သွင်းပြလိုက်တဲ့ ဘန်ဇီးမား
9:58 AM, 11 November
ကာရင်မ်ဘန်ဇီးမားဟာ နည်းပြ နူနိုဆန်းတို့ ရာထူးကနေ ထုတ်ပယ်ခံရပြီး ရက်ပိုင်းအတွင်းမှာပဲ အယ်လ်အစ်တီဟတ်အသင်းအတွက် ဟက်ထရစ်သွင်းယူပေးခဲ့ပါတယ်။ ရီးရဲလ်မက်ဒရစ် တိုက်စစ်မှူးဟောင်းဟာ မနေ့ညက အက်ဘ်ဟာနဲ့ ပွဲစဉ်အတွင်း ပင်နယ်တီကနေ ဦးဆောင်ဂိုး သွင်းခဲ့ပြီး နောက်ထပ်နှစ်ဂိုး ထပ်သွင်းနိုင်ခဲ့သလို အယ်လ်အစ်တီဟတ်ကလည်း ၄-၂ဂိုးနဲ့ အနိုင်ရခဲ့ပါတယ်။
ဘန်ဇီးမားနဲ့ နူနိုတို့ကြား ပြဿနာတွေဖြစ်ပွားခဲ့ပြီးနောက် အယ်လ်အစ်တီဟတ်ဟာ လိဂ်မှာ ငါးပွဲဆက်တိုက် နိုင်ပွဲပျောက်ခဲ့ပါတယ်။ ကြားရက် AFC ချန်ပီယံလိဂ်ပွဲစဉ်မှာ အီရတ်ကလပ် အယ်ကူဝါကို ရှုံးခဲ့ပြီးနောက် ဘန်ဇီးမားနဲ့ နူနိုတို့ကြား ပြဿနာတွေ ဖြစ်ပွားခဲ့တယ်လို့ သိရပါတယ်။
ယမန်နှစ်ရာသီက ဆော်ဒီပရိုလိဂ်ချန်ပီယံဖြစ်ခဲ့တဲ့ အယ်လ်အစ်တီဟတ်ဟာ နည်းပြ နူနိုကို အာရှချန်ပီယံလိဂ် ရှုံးပွဲအပြီး နှစ်ရက်အကြာမှာ ထုတ်ပယ်ခဲ့ပါတယ်။ နူနိုဟာ သူ့ရဲ့ဆော်ဒီကလပ်နည်းပြဘ၀ နောက်ဆုံးအပတ်တွေမှာ ပြိုင်ပွဲစုံ ၉ပွဲအတွင်း ၂ပွဲသာ အနိုင်ရအောင် စွမ်းဆောင်နိုင်ခဲ့ပါတယ်။
အယ်လ်အစ်တီဟတ်အသင်းဟာ နွေရာသီမှာ ဘန်ဇီးမားနဲ့အတူ ကန်တီနဲ့ ဖာဘင်ဟိုတို့ကိုလည်း ခေါ်ယူအားဖြည့်ခဲ့ပါတယ်။ ယခုအပတ်တွေအတွင်း ရလဒ်ဆိုးရွားမှုတွေကြောင့် အယ်လ်အစ်တီဟတ်ဟာ ဇယားထိပ်က အယ်လ်ဟီလယ်နဲ့ ၁၁မှတ်အထိ ကွာဟသွားခဲ့ပါတယ်။