သူ့ရဲ့ဒဏ်ရာ ရရှိမှုအတွက် ဂါဗီမှာ အပြစ်မရှိပါဘူးလို့ ပြောကြားလိုက်တဲ့ ချူအာမီနီ
1:25 PM, 31 October
ကလက်စီကိုပွဲကို မိနစ် ၉၀ ပြည့်ကစားပြီးနောက် သူ့ရဲ့ခြေထောက်တွင် ဒဏ်ရာ ရရှိခဲ့ကြောင်း တွေ့ရှိခဲ့ပြီး ရလဒ်အနေဖြင့် ချူအာမီနီဟာ နှစ်လအထိ နားရတော့မှာဖြစ်ကြောင်း သတင်းများက ဖော်ပြခဲ့ပါတယ်။
ဒဏ်ရာရရှိခဲ့တဲ့ အကြောင်းတရားကို ရှာဖွေတဲ့အခါ ဂါဗီနှင့် တိုက်မိတဲ့ ဗီဒီယိုဖိုင်ပေါ်ထွက်လာခဲ့ပြီး ဆိုရှယ်မီဒီယာတွင် စပိန်သားကို ပြစ်တင်ခဲ့ကြတာဖြစ်ပါတယ်။ ဘာစီလိုနာ ကွင်းလယ်ကစားသမားနဲ့ ချူအာမီနီတို့ဟာ တိုက်မိခဲ့ကြတာဖြစ်ပြီး ရီးရဲလ်ကစားသမားက ကွင်းအတွင်းကနေ ထော့နင်းထော့နင်းနဲ့ ထွက်ခွာသွားရတာကြောင့် စပိန်သားကို အပြစ်တင်နေကြတာဖြစ်ပါတယ်။
ဒီဗီဒီယိုကို တုံ့ပြန်တဲ့အနေနဲ့ ချူအာမီနီက ဆိုရှယ်မီဒီယာမှာ "ဒါဟာ ဂါဗီရဲ့အမှားမဟုတ်ပါဘူး။ ပထမပိုင်းအပြီးမှာ ကျွန်တော် ဒဏ်ရာရခဲ့တာပါ" လို့ ရေးသားထားပါတယ်။
ချူအာမီနီ မရှိတော့တာကြောင့် ကွင်းလယ်တွင် အန်ဆယ်လော့တီအတွက် အဓိကယိုအပေါက်တစ်ခုဖြစ်လာပါတယ်။ သူ့ရဲ့ ပြင်သစ်အသင်းဖော် ပြန်လည်သက်သာလာမယ့်အချိန်အထိ ကာမာဗင်ဂါက ကွင်းလယ်မှာ ကစားရဖို့ရှိနေပြီး ပြီးခဲ့တဲ့ရာသီက တိုနီခရုစ်ဟာ အဆိုပါနေရာတွင် ကစားခဲ့သော်လည်း ရွေ့လျားနိုင်မှုနည်းပါးမှုကြောင့် ယခုနှစ်တွင် ဝေဖန်မှုများ ခံခဲ့ရပါတယ်။
လူကာမိုဒရစ်ဟာ လာလီဂါတွင် သုံးပွဲသာ ကစားထားရကာ စိတ်ပျက်စရာကောင်းတဲ့ လှုပ်ရှားမှုတစ်ခုအပြီးမှာတော့ နောက်ထပ်ပွဲထွက်ခွင့်များရရှိဖို့ ရှာဖွေနေပါတယ်။ မက်ဒရစ်အတွက် အားတက်စရာတစ်ခုကတော့ ကွင်းလယ်တိုက်စစ်ကစားသမားဖြစ်တဲ့ ဂူလာရဲ့ ပထမဆုံးပွဲထွက်ခြင်းပါပဲ။
တူရကီဆယ်ကျော်သက် ကစားသမားဟာ နွေရာသီတွင်အသင်းသို့ ရောက်လာခဲ့ပြီးနောက် မကြာမီတွင် ဒူးဒဏ်ရာကို ခွဲစိတ်မှုခံယူခဲ့ကာ ပြန်လည်ကောင်းမွန်ရန် ကြိုးပမ်းမှုတွင် ဆုတ်ယုတ်မှုကြုံတွေ့ခဲ့ရပါတယ်။ ဂူလာဟာ လေ့ကျင့်ခန်းပြန်ဆင်းနေပြီး အယ်ကလက်စီကိုပွဲနဲ့ လွဲချော်ခဲ့ပြီးနောက် လာမယ့်အပတ် ရေယိုဗယ်လိုကာနိုနဲ့ ယှဉ်ပြိုင်ကစားမယ့်ပွဲပြီးနောက် နိုဝင်ဘာလ ၈ ရက်နေ့ ချန်ပီယံလိဂ်ပွဲအဖြစ် ဘရာဂါနှင့် ယှဉ်ပြိုင်မယ့်ပွဲမှာ ပွဲဦးထွက်ကစားနိုင်မယ်လို့ သတင်းတွေအရ သိရပါတယ်။