ဘန်ဇီးမားဟာ သူ့ရဲ့နည်းစနစ်နဲ့ အံမဝင်ဘူးလို့ အယ်လ်-အီတီဟက်အသင်း ဘုတ်အဖွဲ့ထံ အသိပေးထားတဲ့ နူနိုဆန်းတို့စ်
9:01 AM, 24 August
အယ်လ်-အီတီဟက်အသင်းနည်းပြ နူနိုဆန်းတို့စ်က ရီးရဲလ်ဂန္ထဝင် ဘန်ဇီးမားဟာ မိမိရဲ့နည်းစနစ်နဲ့အံမဝင်ဘူးလို့ အသင်းဘုတ်အဖွဲ့ထံ အသိပေးလိုက်ပါတယ်။
ဆော်ဒီသတင်းစာ အယ်ရှာရက်ကတော့ နူနိုဆန်းတို့စ်ဟာ ဘန်ဇီးမားတစ်ယောက် သူ့ကစားကွက်နဲ့အံမဝင်ဘူးလို့ အသိပေးထားကြောင်း အခိုင်အမာဆိုပါတယ်။ တော့တင်ဟမ်နည်းပြဟောင်းက သူ့အနေနဲ့ အသင်းထံ ဘန်ဇီးမားကို ခေါ်ယူပေးဖို့ တောင်းဆိုတာလည်း မရှိဘူးလို့ ပြောကြားခဲ့ပြီး ၂ ဦးကြား အဝတ်လဲခန်းထဲမှာ တင်းမာမှုကို ဖြစ်ပွားလာဖွယ်ရှိနေပါတယ်။
ဘန်ဇီးမားက အသင်းခေါင်းဆောင်ရာထူးတောင်းဆိုထားပေမယ့် ပေါ်တူဂီသားနည်းပြက ငြင်းဆန်ခဲ့တယ်လို့ သိရပါတယ်။ ပြင်သစ်သားဟာ အယ်လ်-အီတီဟက် အသင်းမှာ အလုပ်လုပ်ရတာ အဆင်မပြေတော့ပဲ အသင်းပြောင်းဖွယ်ရှိနေတယ်လို့ သတင်းကြီးနေပါတယ်။
ဘန်ဇီးမားဟာ ဒီရာသီအယ်လ်-အီတီဟက်အသင်းအတွက် ၂ ပွဲ ပါဝင်ကစားပေးထားပေမယ့် ဂိုးမသွင်းနိုင်သေးပဲ Al-Raed အသင်းကို ၃ ဂိုးပြတ်အနိုင်ရခဲ့တဲ့ပွဲမှာ ဂိုးဖန်တီးမှုပြုလုပ်နိုင်ခဲ့ပါတယ်။ အခုလိုအနေအထားကြောင့် နောက်လာမယ့် အချိန်တွေမှာ ဘာဖြစ်မလဲဆိုတာ စောင့်ကြည့်ရဖွယ်ရှိနေပြီး အယ်လ်-အီတီဟက်အသင်းနဲ့ ဘန်ဇီးမားတို့ကြား ၂ နှစ်ခွဲစာချုပ် ချုပ်ဆိုထားတာဖြစ်ပါတယ်။