ကွင်းလယ်ပိုင်းအားဖြည့်ရန် အာဂျင်တီးနားကြယ်ပွင့် ဒီပေါလ်ကို ခေါ်ယူရေး ကမ်းလှမ်းမှုပြုလုပ်လိုက်တဲ့ အယ်အာလီ
10:17 AM, 22 August
ကမ္ဘာ့အကောင်းဆုံး ကစားသမားဆု ၅ကြိမ်အထိရထားတဲ့ ပေါ်တူဂီဝါရင့်တိုက်စစ်မှုး ရော်နယ်ဒိုရဲ့ အပြောင်းအရွှေ့အပြီးမှာ ဥရောပအခြေစိုက် ထိပ်တန်းကစားသမား ခေါ်ယူမှုတွေ ခပ်စိပ်စိပ် ပြုလုပ်လာတဲ့ ဆော်ဒီပရိုလိဂ်ရဲ့ အင်အားကြီးအသင်း တစ်သင်းဖြစ်တဲ့ အယ်အာလီအသင်းက အက်သလက်တီကိုမက်ဒရစ်အသင်းရဲ့ ကွင်းလယ်ကစားသမား ဒီပေါလ်အတွက် ကမ်းလှမ်းမှု ပြုလုပ်လိုက်တာပဲ ဖြစ်ပါတယ်။
ဆော်ဒီလိဂ်ပြိုင်ပွဲအတွင်း အင်အားကြီးအသင်းတစ်သင်းဖြစ်တဲ့ အယ်အာလီအသင်းက ပရီးမီးယားလိဂ်ရဲ့ နာမည်ကျော် တိုက်စစ်မှုးတွေဖြစ်တဲ့ ရော်ဘတ်တိုဖာမီနို၊ စိန့်မက်ဆီမင်တို့အပြင် မန်ဒီ၊ ဖရန့်ကက်ဆီတို့အား ခေါ်ယူထားခဲ့တာဖြစ်ပြီး ကွင်းလယ်ပိုင်းအတွက် ဖရန့်ကက်ဆီနဲ့ တွဲဖက်ကစားရန် ကမ္ဘာ့ဖလားချန်ပီယံ အာဂျင်တီးနားကြယ်ပွင့် ဒီပေါလ်ကို ခေါ်ယူရေး လုပ်ဆောင်လာတာလည်း ဖြစ်ပါတယ်။
နာမည်ကျော် အီတလီသတင်းထောက် ဖာဘရီဇီယိုရိုမာနိုရဲ့ ဖော်ပြချက်အရ အယ်အာလီအသင်းက ရိုဒရီဂိုဒီပေါလ်အတွက် အက်သလက်တီကိုမက်ဒရစ်အသင်းကို ပြောင်းရွှေ့ကြေး ပေါင် ၃၂သန်းဖြင့် ကနဦး ကမ်းလှမ်းမှု ပြုလုပ်လိုက်တာ ဖြစ်ပါတယ်။ ဆော်ဒီကလပ်ရဲ့ ကမ်းလှမ်းချက်ကို ကစားသမားဘက်က စိတ်အားထက်သန်မှုရှိနေပြီး နည်းပြ ဆီမြွန်နီရဲ့ ကလပ်အသင်းဘက်မှ တုံ့ပြန်မှုကို စောင့်နေရတာလည်း ဖြစ်ပါတယ်။
အယ်အာလီအသင်းက ယခုနှစ်ဘောလုံးရာသီအတွက် ဆော်ဒီပရိုလိဂ် ချန်ပီယံဖြစ်ရန် အကောင်းဆုံးပြင်ဆင်နေပြီး ရာသီအဖွင့် ပွဲစဉ် ၂ပွဲစလုံးကို သက်သောင့်သက်သာ အနိုင်ရထားခဲ့တာ ဖြစ်ပါတယ်။ ပွဲစဉ် (၃) တွင် အယ်အာလီအသင်းက အယ်လ်အက်ဒိုအန်အသင်းနဲ့ ဩဂုတ်လ ၂၄ ရက်နေ့၌ ယှဉ်ပြိုင်ကစားသွားရမှာပဲ ဖြစ်ပါတယ်။