ထိတ်လန့်စရာခံစစ်ပိုင်းအမှားတွေအတွက် အသင်းဖော်တွေကို သတိပေးလိုက်တဲ့ လီဗာပူး ကပ္ပတိန်ဗန်ဒိုက်
11:13 AM, 3 August
ယမန်နေ့ညနေပိုင်း၊ စင်ကာပူမှာ ဘိုင်ယန်မြူးနစ်နဲ့ ယှဉ်ပြိုင်ကစားခဲ့တဲ့ ရာသီကြိုခြေစမ်းပွဲစဉ်အတွင်း လီဗာပူးအသင်းရဲ့ ထိတ်လန့်စရာခံစစ်ပိုင်းအမှားတွေနဲ့ ပတ်သက်လို့ နောက်ခံလူဗန်ဒိုက်က အသင်းဖော်တွေကို သတိပေးစကားဆိုလိုက်ပါတယ်။
လီဗာပူးအသင်းခေါင်းဆောင်အဖြစ် မကြာသေးမီကမှ တရားဝင်ခန့်အပ်ခံထားရသူက ရာသီသစ်မစတင်ခင် လုပ်ဆောင်စရာအလုပ်တွေ ကျန်ရှိနေသေးတယ်လို့ ဝန်ခံပြောဆိုပြီး ဘိုင်ယန်မြူးနစ်ကို ၄-၃ ဂိုးနဲ့ အရေးနိမ့်ခဲ့တဲ့ပွဲစဉ်အပေါ် ပြန်လည် သုံးသပ်ခဲ့ပါတယ်။ အခုပွဲစဉ်ရဲ့ပထမပိုင်းပွဲချိန်အတွင်း လီဗာပူးက ဂတ်ပို၊ ဗန်ဒိုက်တို့ရဲ့သွင်းဂိုးတွေနဲ့ ပွဲကို ဦးဆောင်နိုင်ခဲ့ပေမယ့် ဂါနာဘရီနဲ့ ဆာနေးတို့ကလည်း ဘိုင်ယန်မြူးနစ်အတွက် ချေပဂိုးတွေ ရှာဖွေပေးနိုင်ခဲ့ပါတယ်။
ဒုတိယပိုင်းပွဲချိန်တွေမှာလည်း ဒီယက်ဇ်က လီဗာပူးအတွက် ဦးဆောင်ဂိုး သွင်းယူပေးခဲ့ပေမယ့် စတန်နီဆစ်၊ ခရက်ဇစ်တို့ရဲ့ ပွဲချိန်နှောင်းပိုင်းသွင်းဂိုးတွေဟာ ဘွန်ဒက်စ်လီဂါချန်ပီယံတွေအတွက် နိုင်ပွဲရယူဖို့ လုံလောက်စေခဲ့ပါတယ်။ နယ်သာလန်လက်ရွေးစင်နောက်ခံလူကတော့ ရာသီကြိုခြေစမ်းပွဲစဉ်လေးပွဲမှာ ၁၀ ဂိုးအထိ ခွင့်ပြုပေးထားရတဲ့ အသင်းရဲ့ခံစစ်ပိုင်းဟာ စိုးရိမ်ရေမှတ်ဆီ ရောက်ရှိလာပြီလို့ ပြောဆိုခဲ့ပါတယ်။
ပွဲစဉ်အပြီး LFCTV နဲ့တွေ့ဆုံချိန် ဗန်ဒိုက်က “ဒီပွဲမှာ ကောင်းမွန်တဲ့အရာတွေရှိသလို တိုးတက်အောင်လုပ်ရမယ့် အရာတွေလည်း ရှိပါတယ်။ ဘိုင်ယန်မြူးနစ်က ပြိုင်ဘက်ကောင်းပါ။ သူတို့တွေက အလွန်တိုတောင်းတဲ့ အချိန်လေးအတွင်းမှာပဲ ပြိုင်ဘက်အသင်းကို ကောင်းကောင်းဒုက္ခပေးနိုင်တဲ့ အသင်းဖြစ်ပါတယ်။ ဒီနေ့ဖြစ်ပျက်ခဲ့တာတွေကလည်း ဒါပါပဲ။ ဒီနေရာမှာ ကျွန်တော်တို့တွေ မဖြစ်မနေလုပ်ဆောင်ရမယ့် အလုပ်တွေ ကျန်ရှိနေပါသေးတယ်။ သူတို့သာ အမှားကျူးလွန်ခဲ့မယ်ဆိုရင် ကျွန်တော်တို့မှာ အပြစ်ပေးနိုင်တဲ့ စွမ်းဆောင်ရည်မျိုးရှိပါတယ်။ ဒါကို ကျွန်တော်တို့ ဒီနေ့မှာ ပြသခဲ့ပါတယ်။ ဒါတွေက ကံကောင်းလို့ ဖြစ်တည်ခဲ့တာမျိုးမဟုတ်ဘဲ အစီအစဉ်တကျ ပေါ်ပေါက်လာခဲ့တာပါ။ ကျွန်တော်တို့ကစားခဲ့ရတဲ့ ပွဲစဉ်တွေနဲ့ လေ့ကျင့်ရေးတွေက ပြင်းထန်ခဲ့ပါတယ်”
“ကျွန်တော်တို့တွေ ပွဲတိုင်းမှာ အလွတ်တည်ကန်ဘောမှတဆင့် အခွင့်အရေးရယူနိုင်ဖို့ ကြိုးစားလေ့ကျင့်ခဲ့ပါတယ်။ ကျွန်တော်ဆိုရင်လည်း ဒီလိုအလွတ်တည်ကန်ဘောမှတဆင့် ရရှိလာတဲ့ အခွင့်အရေးကို အဆုံးသတ်သေချာအောင် လုပ်နိုင်ခဲ့သင့်ပါတယ်၊ ဒီအတွက်လည်း ကျွန်တော် ကြိုးစားနေပါတယ်။ ကျွန်တော်တို့တွေက ဒီလိုအသင်းတွေ၊ ကစားသမားတွေနဲ့ ယှဉ်ပြိုင်ပြီး အမြင့်ဆုံးအဆင့်အတန်းမှာ ကစားချင်ပါတယ်။ သူတို့ကလည်း ကျွန်တော့်တို့ အမှားလုပ်မိရင် အပြစ်ပေးနိုင်စွမ်း ရှိပါတယ်။ ဒါတွေပဲ ဖြစ်ပျက်ခဲ့တာပါ။ အခုအချိန်က ရာသီကြိုကာလအတွင်းမှာပဲ ရှိနေသေးသလို ကျွန်တော်တို့မှာ အပြောင်းအလဲတွေ ကြီးကြီးမားမားရှိခဲ့ပါတယ်”လို့ ပြောပါတယ်။
လီဗာပူးရဲ့အခုရာသီကြိုစွမ်းဆောင်ရည်ပိုင်းက အပြုသဘောဆောင်တဲ့ တိုက်စစ်စွမ်းဆောင်ရည်နဲ့အတူ ခံစစ်ပိုင်းမှာလည်း သိသာထင်ရှားတဲ့ အားနည်းချက်တွေ ရှိနေတယ်ဆိုတာ ပြသခဲ့ပါတယ်။ ကစားသမားသစ်ခေါ်ယူမှုတွေ ပေါင်းစပ်ထားတဲ့ အသင်းလိုက်လုပ်အားနှုန်း၊ နည်းဗျူဟာပိုင်းပြောင်းလဲမှုတွေအပြင် တိုးတက်မှုတွေ ရှာဖွေနိုင်ရေးရည်ရွယ်တဲ့ ဗန်ဒိုက်ရဲ့စကားတွေက အမြင့်ဆုံး အဆင့်အတန်းမှာ ဆက်လက်ယှဉ်ပြိုင်နိုင်ရေး အသင်းရဲ့ရည်မှန်းချက်ကို ရောင်ပြန်ဟပ်နေပါတယ်။
ယာဂန်ကလော့ပ်ရဲ့အသင်းက လာမယ့်တနင်္လာနေ့၊ အမေရိကန်နိုင်ငံမှာ ဘွန်ဒက်စ်လီဂါတန်းတက် ဒွန်းစတက်နဲ့ ခြေစမ်းပွဲ ကစားရဖို့ရှိပြီး ဒီပွဲစဉ်အပြီးမှာ ချဲလ်ဆီးနဲ့ ပရီးမီးယားလိဂ်ရာသီအဖွင့်ပွဲစဉ်ကို ယှဉ်ပြိုင်ကစားသွားရပါတယ်။