အာဆင်နယ် အသင်းနဲ့ ပုဂ္ဂိုလ်ရေးအရ သဘောတူညီမှု ရခဲ့ပြီဖြစ်တဲ့ ဒေးဗစ်ရာယာ
9:18 AM, 2 August
ဘရန့်ဖို့ဒ်ဂိုးသမား ဒေးဗစ်ရာယာဟာ အာဆင်နယ်အသင်းထံ ပြောင်းရွှေ့ဖို့ ပုဂ္ဂိုလ်ရေးအရ သဘောတူခဲ့ပြီဖြစ်ပါတယ်။
ဂန်းနားတွေဟာ ပေါင်သန်း၄၀တန် ဂိုးသမားအတွက် အရှိန်မြင့်လှုပ်ရှားလာပြီဖြစ်ကြောင်း ဖာဘရီဇီယို ရိုမာနိုက ဖော်ပြခဲ့ပါတယ်။ ရာယာကလည်း အာဆင်နယ်ထံ ပြောင်းရွှေ့လိုကြောင်း ဘရန့်ဖို့ဒ်ကို အကြောင်းကြားထားပြီးဖြစ်တယ်လို့ ရိုမာနိုက အဆိုပါတယ်။
မကြာခင်မှာ နှစ်သင်းကြား ဆွေးနွေးမှုတွေ အရှိန်မြင့်လာမှာ ဖြစ်ပြီး သဘောတူညီမှုရနိုင်ဖွယ် ရှိနေပါတယ်။ အာဆင်နယ် အသင်းဟာ နံပါတစ်ဂိုးသမား ရမ်းစ်ဒေးနဲ့ အပြိုင်ဆိုင်ဖြစ်စေဖို့ ရာယာကို ခေါ်ယူရန် ကြိုးပမ်းလာတာ ဖြစ်ပါတယ်။
ရာယာကို ဘိုင်ယန်မြူးနစ်က ချိတ်ဆက်ခဲ့ပေမယ့် သဘောတူညီမှုမရခဲ့တဲ့နောက် အာဆင်နယ်က ကြားဖြတ်ခေါ်ယူရန် ကြိုးပမ်းလာတာလို့ သိရပါတယ်။ စပိန်သားဟာ ရမ်းစ်ဒေးရဲ့ နံပါတ်တစ်ဂိုးသမား နေရာကို ရရှိဦးမှာမဟုတ်ဘဲ ရှုံးထွက်ဖလားပွဲစဉ်တွေမှာသာ စတင်ပွဲထွက်ခွင့်ရဖို့ ရှိနေပါတယ်။
အာဆင်နယ်ဟာ နော်တင်ဟမ်ဖောရက်စ်ထံ ပြောင်းရွှေ့ဖွယ်ရှိနေတဲ့ နံပါတ်နှစ်ဂိုးသမား မတ်တာနာရဲ့ နေရာအတွက် ရာယာကို ခေါ်ယူလိုနေခြင်းလည်း ဖြစ်ပါတယ်။