တီယာနေးကို ခေါ်ယူလိုပါက ပြောင်းရွှေ့ကြေး ပေါင်သန်း ၃၀ ကုန်ကျမည်ဟု ပြောကြားလိုက်တဲ့ အာဆင်နယ်
2:45 PM, 9 June
အာဆင်နယ် အသင်းသည် ယခုနွေရာသီတွင် ၎င်းတို့၏ နောက်ခံလူ တီယာနေးကို ခေါ်ယူလိုပါက ပေါင်သန်း ၃၀ ကုန်ကျမည်ဟု နယူးကာဆယ်အသင်းအား ပြောကြားထားကြောင်းသိရပါတယ်။
အက်ဒီဟောင်း၏အသင်းသည် ချန်ပီယံလိဂ်အတွက် ပြင်ဆင်ရန် တီယာနေးကို ပေါင် သန်း ၃၀ ဖြင့် ခေါ်ယူနိုင်ဖွယ်ရှိနေပါတယ်။ ဒါပေမယ့် အာဆင်နယ်အသင်းဟာ စကော့တလန်လက်ရွေးစင်အတွက် ပိုကြီးတဲ့ အခကြေးငွေကို တောင်းဖို့ကြိုးပမ်းနေတယ်လို့ Telegraphက ဖော်ပြခဲ့ပါတယ်။
တီယာနေးသည် ပြီးခဲ့သည့်ရာသီတွင် အာဆင်နယ်အသင်းအတွက် ပုံမှန်ပွဲထွက်ခွင့်ရရန် ရုန်းကန်ခဲ့ရပါတယ်။ ဂန်းနားများသည် ၂၀၁၉ ခုနှစ်တွင် စကော့တလန်ချန်ပီယံ ဆဲလ်တစ် မှ တီယာနေးကို ပေါင် ၂၅ သန်းသုံးစွဲကာ ခေါ်ယူခဲ့ပြီး အဆိုပါ ၂၆ နှစ်အရွယ် ကစားသမားသည် အာဆင်နယ်အသင်းတွင် ၎င်း၏ ကစားသမားဘဝအတွက် အလားအလာကောင်းများဖြင့် စတင်ခဲ့ပါတယ်။ ဒါပေမယ့် တီယာနေးဒဏ်ရာ ရနေချိန် ပြီးခဲ့တဲ့ နွေရာသီက မန်စီးတီးကနေ ဇင်ချန်ကို ပြောင်းရွှေ့လာပြီးနောက် ပွဲထွက်ခွင့်များဆုံးရှုံးခဲ့ရပြီး အမ်းမရိတ် ကစားသမားဘဝကနေ အခြားအသင်းကို ပြောင်းရွှေ့ဖို့ဆုံးဖြတ်နိုင်ဖွယ်ရှိနေပါတယ်။
တီယာနေးဟာ အာဆင်နယ်အသင်းအတွက် စုစုပေါင်း ၁၂၃ ပွဲ ကစားထားပြီး ၎င်းရဲ့စာချုပ်သက်တမ်းဟာ ၂၀၂၆ ခုနှစ်အထိ ရှိနေတာဖြစ်ပါတယ်။ နယူးကာဆယ်နှင့် လီဗာပူးတောင်ပံကစားသမားဟောင်းဖြစ်သူ ဂျွန်ဘားနက်စ်က တီယာနေးအနေဖြင့် နယူးကာဆယ်ကို ငြင်းဆန်ပြီး အာဆင်နယ်တွင် ၎င်း၏နေရာအတွက် တိုက်ပွဲဝင်ရန် တိုက်တွန်းခဲ့ပါတယ်။
"တီယာနေးဟာ နယူးကာဆယ်အတွက် သေချာပေါက် အံဝင်ခွင်ကျဖြစ်မယ့် ကစားသမားကောင်းတစ်ဦးဖြစ်ပေမယ့် အာဆင်နယ်အတွက်လည်း အံဝင်ခွင်ကျဖြစ်နေပါပြီ။ သူက အာဆင်နယ် ကစားသမားဖြစ်ပြီး အာဆင်နယ်က သူ့အတွက် သင့်တော်ပါတယ်။ ဟုတ်ပါတယ် သူတို့မှာ အခု တီယာနေးရဲ့ နေရာမှာ ကစားနေတဲ့ ဇင်ချန်ကို ရှိပါတယ်၊ ဒါပေမယ့် ဒီအချိန်မှာ သူဘာလို့ အာဆင်နယ်ကနေ ထွက်သွားချင်လဲဆိုတာ ကျွန်တော် မတွေးမိပါဘူး"လို့ ဂျွန်ဘားနက်စ်က ပြောကြားခဲ့ပါတယ်။