အသင်းကြီးတွေ စိတ်ဝင်စားနေချိန်မှာ အပြောင်းအရွှေ့အကြောင်း အရိပ်အမြွက်ပြောကြားလိုက်တဲ့ ကိုင်ဆီဒိုအေးဂျင့်
10:44 AM, 12 May
အသင်းကြီးတွေစိတ်ဝင်စားနေချိန်မှာ ဘရိုက်တန်စတား ကိုင်ဆီဒိုရဲ့အေးဂျင့်က အပြောင်းအရွှေ့အကြောင်း ထုတ်ဖော်ပြောကြားလိုက်ပါတယ်။ အီကွေဒေါသားဟာ ဘစ်ဆူးမားတစ်ယောက် တော့တင်ဟမ်ကို ပြောင်းသွားပြီးနောက် ဘရိုက်တန်အသင်းမှာ အဓိက ကစားသမားဖြစ်လာခဲ့တာဖြစ်ပါတယ်။
ဘစ်ဆူးမားက တော့တင်ဟမ်မှာ ရုန်းကန်နေရပေမယ့် ကိုင်ဆီဒိုကတော့ ဘရိုက်တန်ကို အသင်းသမိုင်းတစ်လျှောက် ပထမဆုံးအကြိမ် ဥရောပပြိုင်ပွဲ ကစားခွင့်ရအောင် ကူညီပေးနေပါတယ်။ ဒါပေမယ့် ဇန်နဝါရီတုန်းက ကိုင်ဆီဒို အပြောင်းအရွှေ့သတင်းတွေထွက်ခဲ့သေးတာဖြစ်ပြီး အာဆင်နယ်နဲ့ ချဲလ်ဆီးတို့က ကမ်းလှမ်းခဲ့သေးတာဖြစ်ပါတယ်။
အာဆင်နယ်ဟာ ၂ ကြိမ်တိုင် ကမ်းလှမ်းခဲ့ပေမယ့် ဘရိုက်တန်က ပယ်ချခဲ့ပါတယ်။ အဲ့နောက် အာဆင်နယ်ဟာ အပြောင်းအရွှေ့နောက်ဆုံးရက်မှာ ဂျော်ဂျင်ဟိုကိုသာ အစားထိုးခေါ်ယူခဲ့ပြီး ချဲလ်ဆီးက ဘင်ဖီကာစတား အန်ဇိုဖာနန်ဒက်ဇ်ကို ခေါ်ယူခဲ့ပါတယ်။ ကိုင်ဆီဒိုဟာ ဖေဖော်ဝါရီတုန်းက ကာလရှည်စာချုပ်သက်တမ်း တိုးခဲ့ပေမယ့် ထိပ်တန်းအသင်းတွေက ချိတ်ဆက်နေဆဲဖြစ်ပါတယ်။
ကိုင်ဆီဒိုရဲ့အေးဂျင့် ဆီရာက သူ့စတားဟာ ဘောလုံးကစားတာကို နှစ်သက်တဲ့သူလို့ ပြောကြားခဲ့ပါတယ်။ “အခုဆို သူအသင်းနဲ့ ရာသီသိမ်းနိုင်ဖို့ပဲ အာရုံစိုက်ထားပါတယ်။ အဲ့တာက အံ့သြစရာတော့မဟုတ်ပါဘူး။ ဘာလို့လဲဆိုတော့ ဥရောပတစ်ခွင်မှာ ငယ်ရွယ်ပြီး အရည်အချင်းရှိတဲ့ကွင်းလယ်လူ အများအပြားမရှိပါဘူး။ သူက ပွဲတိုင်းမှာ တိုးတက်လာနိုင်မယ်လို့ ကျွန်တော်ယုံကြည်ပါတယ်။ သူက ဘယ်အသင်းမှာမဆို အံဝင်နိုင်မှာဖြစ်သလို အဲ့အတွက်လည်း အဆင်သင့်ဖြစ်မယ်လို့ ထင်ပါတယ်။ သူ့အိပ်မက် ချန်ပီယံလိဂ်ကစားဖို့ပါ။ သူ့အိုင်ဒေါက ကန်တီပါ”လို့ ဆီရာက ပြောကြားခဲ့ပါတယ်။
ကိုင်ဆီဒိုဟာ လာမယ့်ရာသီချဲလ်ဆီး ပြောင်းဖြစ်ခဲ့ရင် သူ့အိုင်ဒေါဖြစ်တဲ့ ကန်တီနဲ့ တွဲကစားရမှာဖြစ်ပါတယ်။ ဒါပေမယ့် ကန်တီက အသင်းမှာဆက်ရှိမလား မရှိဘူးလားဆိုတာ မသေချာသေးပဲ တယ်လီဂရက်ဖ်သတင်းဌာနရဲ့အဆိုအရ ချဲလ်ဆီးကို ပိုချက်တီနို ရောက်လာခဲ့ရင် ကန်တီဆက်ရှိနေနိုင်တယ်လို့ ဖော်ပြခဲ့ပါတယ်။