မာရက်ဇ်ရဲ့ သွင်းဂိုး၂ဂိုးနဲ့ အတူ ချဲလ်ဆီးကို ဂိုးပြတ်အနိုင်ယူကာ အက်ဖ်အေဖလား စတုတ္ထအဆင့်ကို တက်ရောက်ခဲ့တဲ့ မန်စီးတီး
9:04 AM, 9 January
ရီယက်မာရက်ဇ်ဟာ ယမန်နေ့ညက အက်ဖ်အေဖလား တတိယအဆင့်ပွဲစဉ်မှာ မန်စီးတီးအတွက် သွင်းဂိုး၂ဂိုး ရယူပေးခဲ့ပါတယ်။
စီးတီးတို့ ၄ဂိုးပြတ်အနိုင်ရခဲ့တဲ့ ပွဲစဉ်အတွင်း ပထမပိုင်းမှာတင် မာရက်ဇ်၊ အယ်ဗာရက်ဇ်၊ ဖိုဒန်တို့ရဲ့ဂိုးတွေနဲ့အတူ ချဲလ်ဆီးကို ဦးဆောင်နိုင်ခဲ့ပါတယ်။ ဒုတိယပိုင်းမှာတော့ မာရက်ဇ်ကပဲ ပင်နယ်တီကနေ မန်စီးတီးအတွက် စတုတ္ထဂိုးကို သွင်းယူပေးခဲ့ပါတယ်။
မန်စီးတီးအသင်းဟာ ခြေစွမ်းကောင်းတွေပျောက်ဆုံးနေတဲ့ ချဲလ်ဆီးအသင်းကို ၃ရက်အတွင်း ၂ပွဲဆက် အနိုင်ရခဲ့တာလည်း ဖြစ်ပါတယ်။ မန်စီးတီးအသင်းဟာ စတုတ္ထအဆင့်မှာတော့ အောက်စ်ဖို့ဒ်ကို ကျော်ဖြတ်နိုင်ဖွယ်ရှိနေတဲ့ အာဆင်နယ်နဲ့ ဆက်လက်ရင်ဆိုင်ရမှာဖြစ်ပါတယ်။ ချဲလ်ဆီးနဲ့ ပွဲစဉ်အတွင်း စီးတီးက ဟာလန်း၊ ဒီဘရိုင်းတို့ကို အနားပေးကာ ကစားခဲ့ပေမယ့် ပထမပိုင်းမှာတင် ဂိုးပြတ်ဦးဆောင်နိုင်ခဲ့တာပဲ ဖြစ်ပါတယ်။
ချဲလ်ဆီးကလည်း လူစာရင်းကို အပြောင်းအလဲလုပ်ကာ လူငယ်အများစု ထည့်သွင်းကစားခဲ့တာပေမယ့် စီးတီးကိုတော့ ယှဉ်နိုင်ခဲ့ခြင်းမရှိပါဘူး။ ယခုလို ဂိုးပြတ်အရှုံးနဲ့ ထပ်မံကြုံတွေ့ရခြင်းကြောင့် ချဲလ်ဆီးနည်းပြ ပေါ်တာကတော့ ကြီးမားတဲ့ဖိအားတွေနဲ့ ရင်ဆိုင်နေရပြီ ဖြစ်ပါတယ်။