ယမန်နေ့ည ပွဲစဉ်အတွင်း မက်ဆီကို မင်းတို့နိုင်မှာ မဟုတ်ဘူးလို့ အော်ဟစ်ခဲ့တဲ့ ဆော်ဒီကစားသမား
9:10 AM, 23 November
ဆော်ဒီနောက်ခံလူ အလီအယ်ဘူလာဟီဟာ ယမန်နေ့ည အာဂျင်တီးနားနဲ့ ပွဲစဉ်အတွင်း လီယွန်နယ်မက်ဆီကို ဘာတွေအော်ဟစ်ခဲ့လဲဆိုတာ ပြောပြလာခဲ့ပါတယ်။ ဆော်ဒီအသင်းဟာ အဆိုပါပွဲစဉ်မှာ ယခုနှစ်ကမ္ဘာ့ဖလားကို ဆွတ်ခူးမယ်လို့ ရေပန်းစားနေတဲ့ အာဂျင်တီးနား အသင်းကို ၂-၁ဂိုးနဲ့ အနိုင်ရခဲ့ပါတယ်။
အာဂျင်တီးနာက မက်ဆီရဲ့ ပင်နယ်တီဂိုးနဲ့ ဦးဆောင်နိုင်ခဲ့ပေမယ့် ဒုတိယပိုင်းမှာ ဆော်ဒီက အကောင်းဆုံး ပြန်လာနိုင်ခဲ့ကာ ၂-၁ဂိုးနဲ့ နိုင်ခဲ့ပါတယ်။ ဆော်ဒီအသင်း ဒုတိယဂိုး သွင်းခဲ့ပြီးနောက် အယ်ဘူလာဟီဟာ အသင်းဖော်တွေနဲ့ အောင်ပွဲခံမယ့်အစား မက်ဆီဘက်ကိုလှည့်ကာ အော်ဟစ်မှုတွေ ပြုလုပ်ခဲ့ပါတယ်။
ယခုအချိန်မှာတော့ အယ်ဘူလာဟီက မက်ဆီဘက်ကို ဘာတွေအော်ပြောခဲ့လဲဆိုတာ ပြောပြလာခဲ့ပါတယ်။
အယ်ဘူလာဟီက “မင်းတို့ဒီပွဲကို နိုင်မှာမဟုတ်ဘူး။ နိုင်မှာမဟုတ်ဘူး”လို့ အော်ခဲ့တာဖြစ်ကြောင်း ပြောပြလာပါတယ်။ အာဂျင်တီးနား အသင်းက နောက်ပိုင်းပွဲချိန်တွေမှာ လူစားလဲမှုတွေ ပြုလုပ်ကာ တိုက်စစ်မြင့်ခဲ့ပေမယ့် ချေပဂိုးပြန်သွင်းနိုင်ခြင်းမရှိဘဲ အဖွင့်ပွဲမှာ ရှုံးပွဲတွေ့ခဲ့ပါတယ်။