ယူနိုက်တက် အသင်းရဲ့ ချိတ်ဆက်မှုအချို့ လက်ခံရရှိထားတဲ့ အကြောင်းအတည်ပြု ပြောဆိုလိုက်တဲ့ ဂတ်ပို
10:07 AM, 29 August
မန်ချက်စတာယူနိုက်တက်အသင်းက ရော်နယ်ဒိုရဲ့အနာဂတ်မရေရာမှုနဲ့အတူ တိုက်စစ်ပိုင်းအားဖြည့်ဖို့ရန်အတွက် အပြောင်းအရွှေ့ပိတ်ခါနီးအချိန်မှာ အလုပ်များနေတဲ့ အသင်း တစ်သင်းအဖြစ် သတ်မှတ်ခံနေရပြီး အန်တိုနီကို ခေါ်ယူနိုင်ခဲ့အပြီးမှာတော့ နောက်ထပ် ပီအက်စ်ဗွီတောင်ပံမှာ ခြေစွမ်းပြ သွင်ဂိုးတွေ ဆက်တိုက် သွင်းယူပေးနေတဲ့ ကိုဒီဂတ်ပိုကို ဝယ်ယူဖို့ ချိတ်ဆက်မှုတွေ ရှိထားတယ်လို့ ကစားသမား ကိုယ်တိုင်က ထုတ်ဖော် ပြောကြားလာခဲ့တာပဲ ဖြစ်ပါတယ်။
ယူနိုက်တက်အသင်းက အေဂျက်စ်ညာတောင်ပံ ကစားသမား အန်တိုနီဆန်းတို့စ်အတွက် ပြောင်းရွှေ့ကြေး ပေါင် ၈၅သန်း (ယူရို သန်း ၁၀၀) ဖြင့် ခေါ်ယူဖို့ အေဂျက်စ်အသင်းနဲ့ သဘောတူညီမှု ရယူနိုင်ခဲ့ပြီ ဖြစ်တာကြောင့် နောက်ထပ် ခေါ်ယူမှုတွေ ပြုလုပ်လာဖို့ရှိနေပါသေးတယ်။
အပြောင်းအရွှေ့ကာလက လာမယ့် ကြာသပတေးနေ့မှာ ပိတ်သိမ်းတော့မှာ ဖြစ်ပြီး အန်တိုနီကို ခေါ်ယူဖို့ သဘောတူညီမှု မရယူနိုင်ခင်ကတည်းက ခေါ်ယူဖို့ သတင်းထွက်နေခဲ့ပြီး အန်တိုနီရဲ့ အေဂျက်စ်အသင်းနဲ့ ပြည်တွင်းပြိုင်ဘက်ဖြစ်တဲ့ ပီအက်စ်ဗွီရဲ့ညာတောင်ပံမှာ ခြေစွမ်းပြ နေတဲ့ ဂတ်ပိုကိုပါ ဆက်လက်ခေါ်ယူသွားနိုင်ခြေရှိနေတာပါ။
တနင်္ဂနွေညမှာ ကစားခဲ့တဲ့ ပီအက်ဗွီအသင်းက ရော့တာဒန် အသင်းကို ၆ဂိုး - ၁ဂိုးနဲ့ အနိုင်ရယူခဲ့တဲ့ ပွဲစဉ်အတွင်း ဂက်ပိုက ၂ဂိုး ဖန်တီး ၁ဂိုးသွင်းယူပြီး ယူနိုက်တက် အသင်းကို အပြောင်းအရွှေ့ပိတ်သိမ်းခါနီးမှာ ချိန်သားကိုက် လှုံ့ဆော်မှု ပြုလုပ်သွားနိုင်ခဲ့ပါတယ်။
အဆိုပါ ပွဲစဉ်အပြီးမှာပဲ ဂတ်ပိုက ယူနိုက်တက်အသင်းက သူ့အပေါ် စိတ်ဝင်စားမှုရှိတဲ့ အကြောင်းကို“ကျွန်တော်ကို ခေါ်ယူဖို့ ချိတ်ဆက်နေကြတဲ့ အသင်းတွေက များပါတယ်။ အဓိက စိတ်ဝင်စားမှု အရှိဆုံးအသင်းကတော့ မန်ချက်စတာယူနိုက်တက်ပေါ့။ ဖွင့်ဟ မပြောဖို့ စိတ်ကူးထားပေမဲ့ ဒါက ခက်ခဲပါတယ်” “အမှန်အတိုင်းပြောရရင် ၁၀သင်းလောက်ကကို ခေါ်ယူချင်နေကြတာပါ။ ဒါက ပဟေဠိတစ်ခုလိုဖြစ်နေပြီးတော့ ဘာတွေ ဆက်ဖြစ်လာမလဲဆိုတာတော့ ဒီချိန်မှာ မပြောပြ နိုင်သေးပါဘူး” လို့ESPN သတင်းဌာနကို ပြောဆိုသွားခဲ့တာပဲ ဖြစ်ပါတယ်။